La Presidenta de l’ALLA solicita una entrevista col Rector de la Universidá d’Uviéu pa tratar de solucionar el problema xurdíu en rellación cola redaición de tesis doctorales n’asturianu

Ana Cano, presidenta de la institución llingüística, fairá llegar a D. Vicente Gotor la posición de l’Academia de la Llingua Asturiana, nel sen d’afitar la posibilidá de que l’asturianu pueda emplegase con normalidá na redaición de tesis doctorales y qu’ello s’inxerte dientro del Reglamentu d’Estudios de Doctoráu, agora mesmo en discutiniu polos muérganos universitarios.

Tal posibilidá encóntase dafechu nel Artículu 6.2. de los Estatutos de la Universidá d’Uviéu que planteguen (sic):

La llingua asturiana sedrá oxetu d’estudiu, enseñanza ya investigación nos ámbitos que correspuendan. Asina mesmo, el so emplegu tendrá’l tratamientu qu’afiten l’Estatutu d’Autonomía y la llexislación complementaria, dándose seguranza de la non discriminación del que la emplegue.

Aguarda l’Academia, darréu de lo anterior, que nel articuláu del citáu Reglamentu, l’asturianu s’allugue como llingua de redaición de tesis doctorales n’igualdá de condiciones que’l restu d’idiomes contemplaos.

Uviéu, 29 de xunu de 2011

Nota de prensa de l’Academia de la Llingua Asturiana. LOS ESTUDIOS DE FILOLOXÍA ASTURIANA DIENTRO DE LA UNIVERSIDÁ D’UVIÉU

LLAR_ALLA

L’ Academia de la Llingua Asturiana, énte l’alcuerdu tomáu, el 24 de xunu, na Xunta de la Facultá de Filoloxía de nun incluyir l’asturianu dientro del catálogu de maiores y minores, quier manifestar lo que vien darréu:

  1. La so reconocencia al Equipu Decanal saliente, porque dexando a un llau estigmes y prexuicios estrallingüísticos, inxertó l’asturianu dientro de la propuesta del catálogu de maiores y minores a ufiertar nos nuevos títulos de Grau, al mesmu nivel que’l restu de les llingües que s’imparten nestos momentos na mentada Facultá.
  2. La so fonda esmolición énte la inseguridá xurídica que supón la decisión tomada, darréu qu’ésta asítiase oxetivamente a la escontra de los conteníos de la Llei d’Usu del Asturianu de 1998 (Art. 17: «La Universidá d’Uviéu, nel exerciciu de les sos competencies y col fin de garantizar la capacitación afayadiza del profesoráu necesariu pa la enseñanza del bable/asturianu, llevará darréu, al traviés de los correspondientes departamentos, la formación inicial d’ésti. Del mesmu mou, compete a la Universiá la investigación llingüística y filolóxica en rellación col bable/asturianu»).
  3. La so inquietú polos perxuicios causaos al alumnáu, al refugar un planteamientu académicu dafechu prudente y fondamente respetuosu col drechu a la llibre eleición per parte del mesmu, al proponer un bloque d’estudios d’asturianu optativu y combinable, d’un llau, y qu’atendía a les necesidaes reales de la demanda educativa del futuru profesoráu de Llingua Asturiana, d’otru. Hai que conseñar, amás, que la propuesta cuntaba col sofitu científicu y cola esperiencia d’un profesoráu que vien impartiendo materies rellacionaes col asturianu, dende va años, na Facultá de Filoloxía.
  4. La denuncia de los argumentos demagóxicos y alarmistes nos que se sofitaba la posición que foi aprobada, al entemecer lo académico colo político-ideolóxico, tal y como se pue apreciar, por exemplu, na llinia argumental que recoyía testualmente’l documentu de la enmienda: «yo —diz el proponente— no puedo respaldar una inclusión que contribuye a reforzar la imagen del asturiano como lengua nacional, eventualidad que yo al menos no desearía ver realizada».
  5. El so enfotu en que’l nuevu Equipu Decanal y la Xunta de Facultá seyan quien, xunto col Rectoráu y les autoridaes del Principáu d’Asturies, a reconducir la situación presente y dar a los estudios d’asturianu’l llugar que-yos correspuende, como una llingua más de les que s’ufierten na Facultá de Filoloxía, dientro de la estructura de los nuevos títulos de Grau. Y nun sedría aceutable nenguna otra solución intermedia.
  6. La petición a les fuerces polítiques parllamentaries asitiaes na Xunta Xeneral del Principáu pa qu’aborde la solución definitiva d’estos y otros problemes arreyaos al exerciciu de los derechos llingüísticos de los asturianos, pente medies del reconocimientu xurídicu del asturianu como llingua co-oficial nel Estatutu d’Autonomía d’Asturies.

Llamenta l’Academia que se llegue a esta situación xustamente porque nun cumplieron les correspondientes autoridaes un pautu anterior de la mesma Facultá que pidió nel so día que se creare la especialidá de Filoloxía Asturiana.

Cuando una demanda democrática nun s’atiende ta favoreciéndose que los intereses antidemocráticos actúen a la escontra de los más.

Uviéu, 26 de xunu de 2008