El XXXII Congresu de la FSA-PSOE abre nuevos calces pa la Oficialidá de la Llingua Asturiana

LLAR_ALLA

La llingua y la cultura d’Asturies vienen teniendo a lo llargo de les caberes décades un desendolcu innegable dende’l puntu de vista de la so codificación y normativización, del puxu algamáu pola so lliteratura, de los llogros de la so escolarización, etc. Al empar, les actitúes sociales y les demandes al rodiu de la normalización algamen posiciones calteníes y nidiamente mayoritaries ente la ciudadanía d’Asturies.

Llamentablemente, estos avances nun se vieron acompangaos de les midíes xurídiques que contempla la Constitución Española pa les respeutives llingües autonómiques y que pasaron –en tolos casos, menos nel asturianu– pel reconocimientu del estatus llegal d’oficialidá. Hai que dicir, nesti sen, que la denomada Llei d’Usu del Asturianu amosó, llueu de cuasi 20 años de vixencia, les sos insuficiencies a la hora de facer vidable la sobrevivencia del idioma asturianu: nin se xeneralizó la enseñanza en toles estayes educatives, nin se garanticen los derechos profesionales del profesoráu (especialidá docente), nin hai medios de comunicación públicos dafechu n’asturianu, nin hai promoción efeutiva del so usu n’espacios formales de comunicación…

Nestes circunstancies, una llingua minoritaria y minorizada como la nuesa nun podría tener futuru como llingua de cultura n’Asturies. La demanda de la oficialidá foi y sigue siendo, acordies colo anterior, la esixencia permanente d’una parte mui importante de la sociedá y de les instituciones asturianes, práuticamente dende la transición política.

L’Academia de la Llingua Asturiana (ALLA), acordies cola so función tutelar de los derechos llingüísticos de los asturianos, siempres demandó a les instancies polítiques la busca d’un consensu políticu al rodiu de la oficialidá del asturianu (y del eonaviegu o gallego-asturianu nes sos llendes territoriales), a vegaes énte la indiferencia ya incomprensión de los partíos mayoritarios n’Asturies.

Pues bien, l’ALLA nun pue sinón felicitase y felicitar a tolos asturianos y asturianes pola decisión de la FSA-PSOE d’amestar a les sos llinies programátiques la demanda de la oficialidá de la llingua hestórica del pueblu asturianu. Ello féxose esti caberu fin de selmana, solemne ya inequívocamente, dientro de los alcuerdos del so XXXII Congresu, celebráu n’Uviéu ente’l 29 de setiembre y el 1 d’ochobre.

Somos conscientes de que tal decisión –qu’emocionó a munchos de los delegaos y delegaes asistentes al Congresu– llega años dempués de qu’otros partíos asturianos parllamentarios la amestaren al so ideariu políticu, pero nun podemos por ello resta-y importancia. Con esta decisión, la FSA-PSOE, el partíu mayoritariu n’Asturies de magar el restablecimientu de la democracia, fai posible enanchar el consensu políticu pa facer vidable una reforma del Estatutu que lleve a la tan naguada oficialidá.

Ye una decisión que merez la reconocencia y el respetu de l’ALLA y que foi posible porque asina lo quixeron los militantes socialistes, pero tamién pola mor de l’anovación (xeneracional y estratéxica) d’unos dirixentes que, como Adrián Barbón, quieren abrir nuevos calces na so rellación cola llingua y la cultura d’Asturies.

A nós, como Academia de la Llingua Asturiana, tócanos agora collaborar pa que’l determín de los socialistes asturianos encaxe coles espeutatives ciudadanes que demanden un billingüismu social equilibráu ente asturianu y castellanu na nuesa comunidá y tamién pa tender pontes d’entendimientu ente les estremaes fuerces polítiques. Ye, cenciellamente, afitar un idioma milenariu, el nuesu.

Uviéu, 2 d’ochobre de 2017

ACADEMIA DE LA LLINGUA ASTURIANA

L’ALLA píde-yos a los dirixentes del PP d’Asturies una rectificación del so asitiamientu anti-asturianu

LLAR_ALLA

L’Academia de la Llingua Asturiana píde-yos a los dirixentes del PP d’Asturies una rectificación del so asitiamientu anti-asturianu

L’Academia de la Llingua Asturiana (ALLA), darréu de conocer la noticia de la impugnación per parte del Partíu Popular d’Asturies del denomáu «Plan Pilotu Esperimental de Promoción del Usu del Asturianu», promovíu pola Conseyería d’Educación y Cultura pel que s’abre la posibilidá d’ufiertar l’asturianu como llingua vehicular pa impartir dalguna asignatura del currículu d’Educación Primaria en seis centros, siempre col preste del Claustru y de les families de los escolinos, quier amosar la so perplexidá énte esta iniciativa, asina como la so esmolición pol desaxustáu facer que nesti ámbitu vienen poniendo en práutica determinaos dirixentes del principal partíu de la oposición n’Asturies.

Pela cueta, hai que conseñar que nun son pocos los militantes y simpatizantes del PP qu’apocayá vienen tresmitiendo a la institución llingüística que nun entienden l’oxetivu d’una estratexa que nun comparten y que, a la escontra, ellos sí que tienen en cuenta el valir social y cultural de la nuesa llingua.

Al empar, a l’ALLA resúlta-y difícil entender que daquién piense que ye rentable políticamente emplegar de contino’l despreciu y la negación de les posibilidaes de la llingua y la cultura asturiana, intentando facer d’ello un elementu de confrontación n’Asturies, mui en particular nel ámbitu educativu, na Xunta Xeneral o na vida diaria de los conceyos. Ello ye más llamadero entá si tenemos en cuenta los últimos datos ufiertaos pol III Estudiu Sociollingüísticu d’Asturies, del que se fixo públicu un «Avance» hai unos díes, pero que quiciabes los dirixentes del PP d’Asturies nun tienen interés en conocer. Los datos d’esti estudiu, n’efeutu, amuesen por exemplu que la mayor parte de los asturianos taríen d’acuerdu n’afitar la presencia escolar del asturianu (incluyendo la posibilidá del so usu vehicular al llau del castellán), la so presencia nos contestos institucionales y, mesmamente, na oficialidá de la llingua histórica d’Asturies.

Acordies colo anterior, l’Academia de la Llingua Asturiana píde-y a esti partíu, y mui en particular a los sos principales dirixentes, que reconsideren tal estratexa de crispación y falsos discutinios y recuérda-yos qu’hai yá cuasi un mes que la Xunta de Gobiernu de l’ALLA solicitó a la Presidenta del Partíu Popular un aconceyamientu francu, pa poder falar xuiciosamente de toes estes cuestiones y de delles otres que cinquen a la cultura d’Asturies, ensin qu’hasta’l momentu hubiere rempuesta dala a tal solicitú.

Uviéu, 19 de xunetu de 2017

ACADEMIA DE LA LLINGUA ASTURIANA

Xunta del Presidente de l’ALLA y el Direutor de la RTPA

LLAR_ALLA

Xunta del Presidente de l’Academia de la Llingua Asturiana y el Direutor de la RTPA

L’Academia propón a la Direición de la RTPA qu’ún de los sos espacios informativos diarios seya n’asturianu

El Presidente de l’Academia de la Llingua Asturiana, Xosé Antón González Riaño tuvo güei, 17 de xunetu, una xunta col Direutor de la RTPA, Antonio Virgili, na que, amás d’otres cuestiones, presentó al Ente de comunicación autonómicu una propuesta pa entamar un espaciu informativu diariu n’asturianu. Esti entamu afítase nos datos ufiertaos nel III Estudiu Sociollingüísticu d’Asturies, fechos públicos nel «Avance de datos» presentáu’l pasáu mes de xunu.

La propuesta de l’ALLA conseñóse nestos términos:

L’Academia de la Llingua Asturiana propón a la Direición de la RTPA qu’ún de los sos espacios informativos diarios (mediu día o tarde-nueche) seya n’asturianu.
L’oxetivu ye que la radiotelevisión pública asturiana contribuya a la dignificación y normalización de la llingua y cultura d’Asturies.
La propuesta afáyase dafechu a les demandes sociales (III Estudiu Sociollingüísticu):
• El 43% de los asturianos y asturianes sigue la programación n’asturianu qu’emite la RTPA.
• A esti 43% paez-y interesante (86%), de calidá (86%) y mui comprensible llingüísticamente (91%)
• Cuasi un 60% de la población asturiana reclama esta clas de programes informativos.
L’espaciu informativu n’asturianu incluiría portada y presentación, llocución de noticies, creitos, la información deportiva y la del tiempu.
Les emisiones entamaríen nel mes de mayu de 2018 (coincidiendo col Día de les Lletres Asturianes).
L’Academia de la Llingua Asturiana comprométese a diseñar un Plan de Formación Específicu y urxente pal personal de la RTPA y a llevalu alantre nes propies instalaciones de la RTPA. El citáu plan nun implicaría coste económicu pa la RTPA.

Nel aconceyamientu, al máximu nivel, participaron, amás de los máximos responsables de l’ALLA y de la RTPA, Marta Mori d’Arriba (Vicepresidenta de l’Academia), Francisco G. Orejas (Direutor de Producción de la RTPA), Bárbara Alonso (Direutora d’Informativos de la RTPA) y Lucía Herrera (Direutora d’Antena de la RTPA).
Per parte de la RTPA propúnxose, col preste de l’ALLA, estudiar con procuru les implicaciones de la propuesta y volver vese en setiembre p’algamar, si ye posible, un alcuerdu definitivu.

Uviéu, 17 de xunetu de 2017

ACADEMIA DE LA LLINGUA ASTURIANA

Estatutu y oficialidá. Llingua Asturiana y televisión

Estatutu y oficialidá

El Día de les Lletres Asturianes de 2005 l’Academia de la Llingua Asturiana daba anuncia pública de la so “Propuesta d’un alcuerdu social y políticu sobre la llingua y cultura d’Asturies”, nel qu’habríen participar, amás del Gobiernu del Principáu d’Asturies, les fuerces polítiques, los sindicatos y les organizaciones sociales y culturales. La “Propuesta”, encadarmada al rodiu de cinco exes, foi presentada darréu a los axentes sociales citaos, que, mayoritariamente, acoyéronla de mou favoratible. Llamentablemente la Federación Socialista (FSA-PSOE) nun taba naquel entós en disposición d’averase a un alcuerdu consensuáu como’l que se proponía, darréu que’l primer puntu yera’l d’asumir la declaración de co-oficialidá de la llingua asturiana (y del gallego-asturianu nel so territoriu) na próxima reforma del Estatutu. Por mor d’ello, l’ALLA nun siguió allanare col discutiniu del “Alcuerdu”. Ello nun quita un res pa que la institución siga trabayando, col mesmu enfotu de siempre, pol llogru d’esa reconocencia d’oficialidá y enconte’l labor que nel mesmu sen se fai dende otres instituciones, organizaciones o estayes sociales.

L’ALLA camienta que’l grau de converxencia social sobre esti tema ye de tantu altor qu’a lo cabero algamaremos, de xuru, un Estatutu que puea ser consensáu por toles fuerces polítiques y onde tolos asturianos y asturianes mos sintamos representaos y abellugaos. Y ello porque:

  1. La mayoría de la población asturiana, como afiten los estudios fechos al respeutive, ta a favor d’esa declaración de cooficialidá y ye consciente de que la nuesa ye una sociedá billingüe y asina quier que siga siendo; pero, al empar, quier un billingüismu equilibráu onde l’emplegu d’una o otra llingua nun tenga más llende que la que-y ponga la llibre eleición del ciudadanu.
  2. L’emplegu de la llingua propia, en tolos ámbitos (públicos y privaos), en tolos rexistros (orales y escritos) y a tolos niveles y efeutos ye un derechu fundamental del individuu. Y nes sociedaes democrátiques los gobiernos y les lleis tán obligaos a reconocer esi derechu y a dar seguranza del exerciciu llibre del mesmu.
  3. El Principáu d’Asturies ye una Comunidá Autónoma del Estáu Español. Y nesti contestu -el del Estáu Español- nun hai otra solución xurídica válida que la que se dio nes otres comunidaes billingües: la declaración de co-oficialidá nel Estatutu d’Autonomía, acordies col mandáu de la Constitución Española. Ello pue combinase con situaciones polítiques estremaes que nun tien por qué averase a les que se tán viviendo nesti momentu n’otres comunidaes del Estáu.
  4. Ye verdá que la realidá sociollingüística d’Asturies tien les sos propies carauterístiques y a ello tendrá qu’axustase la Llei de Normalización de la Llingua Asturiana, qu’ha desendolcar los aspeutos básicos de la puesta en práutica de la oficialidá.
  5. Cada vegada resulta más chocante y difícil de pescanciar que les mesmes fuerces polítiques que n’Asturies nieguen esi derechu fundamental, defendan nel Congresu de los Diputaos en Madrid proposiciones non de llei instando al Gobiernu a “afalar, en collaboración coles Comunidaes Autónomes, iniciatives empobinaes a garantizar el respetu y proteición de les llingües españoles, como elementu esencial del nuesu patrimoniu común; a curiar que se dea seguranza a los ciudadanos del derechu y la llibertá d’escoyer y emplegar cualesquier de les dos llingües de la comunidá; a potenciar y afitar un diálogu granible ente toes elles, sobre manera nel tarrén de la cultura y la educación”.
  6. Y finalmente, porque la propuesta de l’ALLA ye realista y moderada dafechu. Nella pídese a los partíos políticos con representación parllamentaria que seyan ellos los qu’escueyan el modelu de redaición del artículu que recueya la oficialidá del idioma que más s’axuste a les condiciones sociolóxiques d’Asturies; que seyan ellos los que digan hasta ónde quieren llegar coles midíes normalizadores, a qué ritmu y con qué fases; y arriendes d’ello, que pongan techu a la dotación presupuestaria pa facer efeutiva la normalización. Y que too ello lo faigan velando siempre pa que se llogre l’aceutación social y política de les midíes normalizadores.

Llingua Asturiana y Televisión

El 12 de payares de 2003 l’Academia de la Llingua Asturiana comparecía na Xunta Xeneral del Principáu d’Asturies p’amosar la so posición en rellación cola presencia qu’habría tener la Llingua Asturiana nel futuru Ente Públicu de Comunicación del Principáu d’Asturies. Pasaos más de dos años d’aquella comparecencia ensin que se tomare determín políticu sobre esti asuntu magar que yá se ficieron les pruebes pa la seleición de los profesionales y que, al empar, yá se tán emitiendo dalgunos programes, l’ALLA xulga afayadizo, nesti momentu, afitar otra vuelta’l so posicionamientu en rellación con esti asuntu, posicionamientu que tresmitió reiteradamente a los responsables del Ente Públicu de Comunicación y del so Conseyu d’Alministración nes xuntes calteníes al respeutive netos meses d’atrás y que se resume no que vien darréu:

  1. L’Academia de la Llingua Asturiana camienta que la TV Asturiana ha tar diseñada de mou que contribuya a vertebrar territorial, social y culturalmente Asturies y que valga d’instrumentu eficaz pa la recuperación, espardimientu, dignificación y normalización social de la llingua asturiana.
  2. El tratamientu de les llingües asturiana y castellana na TV habrá ser equiparable a tolos efeutos. Ello lleva apareyao necesariamente lo siguiente:
    1. Que l’espaciu dedicáu a la emisión en llingua asturiana seya un 50% del total de la programación.
    2. Que nun se dea nengún tipu de discriminación nel repartu de les bandes horaries d’audiencia.
    3. Que nun se dea nengún tratu desigual na axudicación de los diferentes tipos de programes. Esto ye, qu’en llingua asturiana se faga la mesma mena de programes (informativos, de debate, culturales, etc.) y na mesma proporción qu’en llingua castellana.
  3. La proporción d’emplegu de la llingua asturiana habrá aumentar hasta facese mayoritaria nos otros dos medios del Ente Públicu de Comunicación: radio y prensa dixital. Ello derívase, per un llau, del fechu de la necesidá (y facilidá) d’averar l’asturianu a les nueves teunoloxíes (fundamentalmente, internet) y, per otru, a la favoratible acoyida y el refrendu social que vienen teniendo ente la población les esperiencies d’emplegu radiofónicu de la llingua asturiana (Cadena Ser, Cope, Onda Cero, Radio Sele, etc.).

Nota de Prensa: Llei del Principáu d’Asturies de Medios de Comunicación Social

En víspores d’aprobase na Xunta Xeneral la “Llei del Principáu d’Asturies de Medios de Comunicación Social”, l’Academia de la Llingua Asturiana quier manifestar lo que sigue darréu:

Na sociedá actual, tolos medios de comunicación, y especialmente la TV, son axentes importantes de socialización y de difusión de la cultura. Unos medios onde la llingua asturiana tuviere un llugar secundariu significaría perder una grandísima posibilidá pa la continuidá y normalización del asturianu y afondaría’l procesu de castellanización y de sustitución llingüística.

Persabiendo que, en bona midida, el futuru de la llingua asturiana xuégase nos medios de comunicación, n’Asturies, igual que n’otres Comunidaes billingües, ye preciso que los medios de comunicación y los servicios de radiodifusión y televisión del Ente Públicu de Comunicación del Principáu d’Asturies, sirvan, necesariamente, pa difundir la llingua y pa esparder el so usu en toles estayes de la vida social.

Darréu d’ello, y faciendo un llamamientu al exerciciu de les sos responsabilidaes, l’Academia de la Llingua Asturiana pide a los políticos asturianos que se garantice nesi Ente Públicu una presencia positiva y granible de la nuesa llingua.

Uviéu, 13 de marzu, 2003
Academia de la Llingua Asturiana