Númberu 4 de Ciencies, Cartafueyos Asturianos de Ciencia y Teunoloxía

Ciencies_4

Sal el númeru 4 de la la revista Ciencies Cartafueyos Asturianos de Ciencia y Teunoloxía.

Esta revista tien como oxetivu cimeru esparder na sociedá asturiana los avances ya investigaciones científiques y teunolóxiques, emplegando pa ello la llingua de nueso y con una perspectiva divulgadora que favoreza la comprensión de los temes por parte de los llectores interesaos nestos ámbitos.

Ciencies_4

Nesti númberu:

  • Evolución de los protocolos web nel so 25 aniversariu
  • MENGUA EN DELLOS METROS DE LOS SISTEMES DUNARES N’ASTURIES ¿Nótase yá’l cambéu climáticu?
  • LA BIODIVERSIDÁ QUE LLEVAMOS CON NÓS. Microbiota autóctono, probióticos y prebióticos
  • ACEROS AVANZAOS D’ALTA RESISTENCIA
  • LA NUECHE OSCURA DEL SER. Llocura y sociedá n’Asturies

LLIBRERÍA LLINGÜÍSTICA: Propuestes etimolóxiques

LLIBRERÍA LLINGÜÍSTICA

Xosé Lluis García Arias, Propuestes etimolóxiques (5). Uviéu, ALLA & Universidá d’Uviéu, 2014. «Llibrería Llingüística» nu 24

Tres la edición de los cuatro primeros volúmenes de Propuestes etimolóxiues (Uviéu, ALLA, 2000, 2007, 2008 & 2009) y el d’Arabismos nel Dominiu Llingüísticu Ástur (Uviéu, ALLA, 2006), ufre agora l’autor esta nueva entrega de datos pal so Diccionariu Etimolóxicu de la Llingua Asturiana (DELLA).

Nesta coedición cola universidá d’Uviéu recuéyese un «Estudiu etimolóxicu» de más de mil pallabres de la nuesa llingua, una fonda bibliografía y un índiz de les pallabres estudiaes.

Cultures. Revista Asturiana de Cultura

Cultures. Revista Asturiana de Cultura. nu 18 (2014) Uviéu, ALLA.
Tres el monográficu de la pesca, la revista Cultures saca un nuevu númberu con un garrapiellu de trabayos d’estremáu calter y que son: «Paisaxe y cultura n’Asturies (I). Bañeres y praos. Un análisis antropolóxicu», de Roberto González-Quevedo; «El paisax ¿natural? d’Asturies», de Margarita Fernández Mier; «Del.las consideraciones xeopolíticas en cuantas al asitiamientu de los val.les de L.laciana ya Babia na Baxa Edá Media: ¿n’Asturias o en L.león?» de Pablo García Cañón; «Cuentos asturianos d’animales» d’Alberto Álvarez Peña y «El mundu les castañes y el castañéu en Villaviciosa» de Carme Pedrayes Toyos. El númberu zárralu les «Reseñes» «Memoria encesa» y «Averándose a l’Antropoloxía» de Roberto González-Quevedo.

MÁZCARA: El facedor de gomeros

MAZCARA

Noel Canto Toimil, El facedor de gomeros, Uviéu, ALLA, 2013.

La coleición Mázcara algama un nuevu númberu, nesti casu la obra ganadora del Premiu de Teatru de l’Academia de la Llingua Asturiana na so edición del añu 2011. Esta obra fala de la realidá actual asturiana y ta enraigonada nel teatru costumista más tradicional. Muestra, al traviés del humor, de la ironía y de fechos y situaciones, delles vegaes surrealistes, una sociedá que yá camudó, un paisaxe distintu de la mítica Asturies industrial, minera y rural que suel servir davezu d’ambiente pa esti xéneru teatral.

ESCOLÍN: Eladio, el dinosaurio que ñació ayeri

Alberto Menéndez García, Eladio, el dinosaurio que ñació ayeri. Uviéu, ALLA, 2013. «Escolín» nu 68.

Nesta nueva entrega de la coleición «Escolín», l’autor ufre una historia enllena d’aventures, con dibuxos de Sonia Fernández, na que’l so protagonista, Eladio, un dinosauriu que ñació en Muniel.los, percorre toa Asturies colos sos collacios, un llagartu y una curuxa, a la gueta de dinosaurios.

Esti llibru ganó’l Premiu «Llectures pa Rapazos» de l’Academia de la Llingua Asturiana na so edición del añu 2011.