CULTURES. Revista Asturiana de Cultura

Cultures. Revista Asturiana de Cultura. nu 19 (2015) Uviéu, ALLA.
Nuevu númberu de la Revista de Cultures de l’Academia de la Llingua. Nella úfrense artículos d’estremáu calter de Roberto González-Quevedo («Paisax y cultura n’Asturies (II). Los oratorios como oxetivación d’idees y valores»), Manuel Francisco Matarín Guil («Las ermitas de ánimas de la comarca de los ríos Andarax y Nacimiento (Almería)»), Xuan Pedrayes Obaya («Catálogu de los oratorios en Conceyu Villaviciosa»), Ramsés Ilesies Fernández & Xosé Antón Fernández «Ambás» («Aguilandeiros de San Xuan en Villapañada (Grau)»), Carme Pedrayes Toyos («Vezos y creyencies en conceyu Villaviciosa»), Roberto González-Quevedo («Categorización de cultura ya naturaleza nos cuentos populares d’animales»). La revista sigue cola «Faza d’histories de vida» colos trabayos de Milio’l del Nido («Mio tíu Milio») y Pepe Monteserín («Pa vaques, le mio hermanu» y «L’octavu pasaxeru»). El númberu zárralu la estaya «Reseñes» de Juan Alfonso Fernández García («En Ca’l Gaiteiru o l’entamu de la reconstrucción historicista de la gaita n’Asturies»).

LLITERATURA. Revista Lliteraria Asturiana

Lliteratura. Revista lliteraria asturiana. nu 31 (2015) Uviéu, ALLA.
Nueva entraga d’esta revista lliteraria pa celebrar el XXXVI Día de les Lletres Asturianes na que participen en «Narrativa» Mª Esther García López, Miguel Rojo, Inaciu Galán y González, Vicente García Oliva y Xurde Álvarez. En «Poesía» alcontramos testos de Xosé Bolado, Xurde Fernández, Marta Mori, Ricardo Saavedra Fernández-Combarro, Miguel Rodríguez Monteavaro, Sofía Castañón y Naomi Suárez González. Esti númberu tamién recueye un especial dedicáu a María Teresa González a cargu de Xuan Xosé Sánchez Vicente.La seición de «Ensayu» presenta testos de Néstor Villazón y Ramón Cueva. La estaya «Traducción» ufre los trabayos de Inaciu Galán y González y Víctor Suárez Piñero. Zarra’l númberu un «Varia» de Roberto González Quevedo.

LLETRES ASTURIANES 112

Lletres Asturianes. nu 112 (marzu 2015) Uviéu, ALLA.
Nueva entrega de la revista Lletres Asturianes qu’inclúi los artículos «El neutro de materia en la morfología nominal del asturiano del concejo de L.lena» de Rosabel San Segundo Cachero; «A formação de palavras em mirandês e a obsolescência lingüística» d’Alberto Gómez Bautista; «La lengua asturiana en los textos lingüísticos francófonos» d’Anne-Marie Chabrolle-Cerretini; «L’arte la guerra. Sobre’l léxicu bélicu na nuesa llingua» de Pablo Suárez García; «Léxicu asturianu de la sidra con delles desplicaciones etimolóxiques y comentarios» d’Inaciu Hevia Llavona; «Estudiu de la toponimia de Santa Bárbola (Samartín del Rei Aurelio). La hidrotoponimia (II)» de Xulio Llaneza Fernández; «“Cuando examen les abeyes”: Primer testu lliterariu n’asturianu y la so importancia na historia de la lliteratura» de José Miguel Lamalfa Díaz; «Vides paraleles (que converxen nun puntu) de don Xuan Junquera Huergo y don Xosé Napoleón Acebal» de Vicente García Oliva; «Percepciones y conciencia del asturianu en dellos estudiantes d’español pa estranxeros de la Universidá d’Uviéu: implicaciones educatives» de Marta Mori d’Arriba & María Prieto Grande y «Delles aportaciones pa una hestoria de la publicidá n’asturianu» Inaciu Galán y González. Zarren la revista, como ye vezu, les seiciones Reseñes bibliográfiques, Notes y anuncies y Llibrería Asturiana.

TOPONIMIA: Conceyu de Xixón. Parroquia de Caldones

Llorián García-Flórez & Xosé García Sánchez, Conceyu de Xixón. Parroquia de Caldones. Uviéu, ALLA, 2014. «Toponimia» nu 140.

Con esti númberu faise la quinta entrega de llistaos toponímicos del Conceyu de Xixón. Nesti númberu 140 recuéyense los materiales encuestaos na parroquia de Caldones que ye una collación allugada nel sudoriente del Conceyu y que llinda con Villaviciosa al Este per Pión (Villaviciosa); coles collaciones de Deva y Santurio al Norte; con Vega, Llavandera y Fano al Oeste; y con Valdornón al Sur. El llistáu (con alredor de 1.400 topónimos) compétase con una “Amestadura” cabera onde los autores dan cuenta de delles mudes nes formes toponímiques rexistraes nos caberos años, al dir camudando pasu ente pasu la casería como forma de vida.

TOPONIMIA: Conceyu de Xixón. Parroquies de Fresno, Puao, Serín y Veriña

David González Díaz & Feliciano Suárez Fernández, Conceyu de Xixón. Parroquies de Fresno, Puao, Serín y Veriña. Uviéu, ALLA, 2014. «Toponimia» nu 139.

Esta cuarta entrega de llistaos toponímicos del Conceyu de Xixón recueye los materiales encuestaos nes cuatro parroquies citaes, nun proyeutu entamáu pol Conceyu y coordináu por Manuel Huerta Nuño. La mayor parte del territoriu de les parroquies estudiaes asítiase en zones onde s’allugó industria siderúrxica de magar la segunda metada del sieglu XX (les empreses UNINSA, ENSIDESA y ACERALIA, ARCELORMITTAL anguaño). La instalación d’esa industria supunxo’l desaniciu d’una parte importante del territoriu de les parroquies y de la so población, cola desapaición de caseríes, praos, molinos, terrenos… La construcción residencial moderna contribuyó igualmente a desaniciar el perfil llabrador y ganaderu qu’estes parroquies tuvieron hasta polo menos mediaos del sieglu XX. Estes actividaes y otru tipu d’aiciones derivaes d’elles (construcción de bloques de viviendes d’empresa y de nueves carreteres, de l’autopista A-66 y de la más reciente autovía AS-II, la creación de la ZALIA, de COGERSA…) faen que l’estudiu toponímicu ufierte necesariamente resultaos enforma curtios por cuenta la dificultá que supón topar informantes, al ser yá mui poco la xente nacío ellí que queda viviendo na zona y que guarda memoria d’esa información; y tamién por esa ocupación industrial del espaciu que supunxo la desapaición de munchos llugares y de los sos nomes.