Güei, 15 d’avientu de 2020, cúmplense 40 años dende que se creare l’Academia de la Llingua Asturiana (ALLA) al traviés del Decretu 33/1980 de 15 d’avientu del Conseyu Rexonal d’Asturies –institución preautonómica asturiana–.
CULTURES. Revista Asturiana de Cultura anueva’l formatu de los artículos, inxer seición de reseñes y fai alcordanza del antropólogu José Luis García
Tres del monográficu de la música (qu’ocupare los númberos 22 y 23), CULTURES. Revista Asturiana de Cultura, editada pola Academia de la Llingua, vuelve a la cai con otru volume temáticu, nesta ocasión dedicáu al campu d’investigación de les lleendes y les ayalgues. Tres del entamu, iguáu pol direutor de la revista, Roberto González-Quevedo, nueve contribuciones más dan cuerpu a la parte principal de la edición, toes elles con un formatu anováu qu’agora inxerta resúmenes y pallabres clave n’inglés. Continuar leyendo «Cultures algama’l númberu 24 con un monográficu sobre lleendes y ayalgues»
L’Academia de la Llingua Asturiana vien d’asoleyar el númberu 36 de la revista Lliteratura. Revista lliteraria asturiana correspondiente al añu 2020. Nesti númberu, de 173 páxines, baxo la direición de la escritora y académica Marta Mori, atopamos dos estayes de la revista claramente definíes y que bien podríen iguar dos númberos perfeutamente dixebraos: una primer estaya especial dedicada a la Lliteratura Infantil y Xuvenil (LLIX) y una segunda estaya que coincide colos conteníos habituales de la revista. A lo llargo de les sos páxines combínase la creación lliteraria, l’ensayu y la crítica; y les voces nueves apaecen xunto a voces yá consagraes. Esti exemplar pue valir al empar d’amuesa del llabor lliterariu de güei y como material pal aula no que cinca a la Lliteratura Infantil y Xuvenil. Continuar leyendo «Los testos infantiles y xuveniles protagonicen el númberu 36 de Lliteratura»
A poeta d’El Franco volve ás llibreirías con un poemario editao polla Secretaría Llingüística del Navia-Eo da Academia de la Llingua Asturiana
Despós dos relatos de Cua lluz prendida (2005) y as obras llíricas Terra de Pataricos (2007) y Han a ser cinza (2010), Fraga Suárez recoye agora 55 poemas novos nos qu’asoman el dolor y a ironía, el desgarro y a sensibilidá, a compañía y a ausencia, a memoria y el presente. El llibro fai el número 22 da colección Os llibros d’Entrambasauguas, da Secretaría Llingüística del Navia-Eo.
A súa voz poética, úa das referentes na lliteratura actual en llingua eonaviega dibuxa, al ver de Ricardo Saavedra, autor del testo qu’introduce el obra, “a lluz y a solombra, el que se gana y el que se perde, os momentos y os paisaxes memorables”, un viaxe pral que “namás acarrexamos con nosoutros lo esencial, lo que tresforma el recorrido en vida”. A esperiencia nel oficio poético y a esperiencia vital xúntanse nel llibro, según Saavedra, núa “lluita entre el esistencialismo y el vitalismo” unde el “único vencedor nun é ún nin el outro, sinón a propia lluita: el afán d’inmortalidá y compañía que devece por qu’el viaxe s’allargue nel tempo y nel espacio”.
Equipaxe de mao chega ás llibreirías esta semana con un precio de venta al público de 10 euros. Autora y Secretaría Llingüística del Navia-Eo xa tan estudiando as posibilidades de presentación y promoción del poemario pra os próximos meses, dentro das condicióis especiales del contesto sanitario actual.
