Xunta con representantes de Miranda del Douro

El presidente de la Cámara Municipal de Miranda del Douro, Artur Nunes, xunto col vicepresidente de l’Associaçon de la Lhéngua i Cultura Mirandesa, Mario Correia, tuvieron esti miércoles 23 d’avientu una xunta de trabayu cola direición de l’Academia de la Llingua Asturiana nel llar de la institución.

Nesta xunta tratáronse importantes aspeutos venceyaos a la collaboración ente les dos instituciones, darréu del pautu robláu’l pasáu 20 de xunu en Miranda del Douro. L’axenda d’actividaes comunes pal exerciciu 2016 daráse a conocer en próximes feches.

Robla conveniu Miranda del Douro

El pasáu sábadu, 20 de xunu, tuvo llugar en Miranda del Douro (Portugal) la robla d’un pautu de collaboración ente l’Academia de la Llingua Asturiana, la Cámara Municipal de Miranda y l’Associaçon de la Lhéngua i Cultura Mirandesa.

Darréu de la xunta previa caltenida n’Uviéu’l pasáu 29 d’abril ente les tres instituciones, una delegación de l’ALLA (formada pola presidenta, Ana Mª Cano González, el vicepresidente, Xosé Antón González Riaño y l’académicu Pablo Xuan Manzano Rodríguez) desplazóse a Miranda del Douro pa la robla del conveniu xunto colos presidentes de la Cámara Municipal de Miranda, Artur Nunes, y de l’Associaçion de la Lhéngua i Cultura Mirandesa, Carlos Ferreira.

Esti conveniu pon les bases pal desendolcu de xeres conxuntes qu’afiten l’estudiu y espardimientu de la llingua nel dominio ástur. Nun hai qu’escaecer que’l mirándés (variante de la llingua común falada n’Asturies y Miranda) ye idioma oficial en Portugal dende 1999.

Xunta con representantes de Miranda de l Douro

Esti miércoles, 29 d’abril, tuvo llugar nel llar de l’Academia de la Llingua Asturiana una xunta de trabayu ente esta institución y una delegación de Miranda de l Douro encabezada pol presidente de la Cámara Municipal de Miranda de l Douro, Artur Nunes, xunto col presidente de l’Associaçon de la Lhéngua i Cultura Mirandesa, Carlos Ferreira, y los vicepresidentes d’esta asociación Alfredo Cameirão y Mario Correia.
Nesta xunta tratáronse dellos aspeutos venceyaos a la collaboración ente les instituciones y apautóse la robla d’un Conveniu de collaboración el próximu 20 de xunu de 2015 en Miranda de l Douro.

Pautu de collaboración SIBI y ALLA

El pasáu martes 2 d’avientu de 2014, nel llar que la Sociedá Internacional de Bioética (SIBI) tien en Xixón, roblóse un pautu de collaboración ente estes dos instituciones.

Nel actu tuvieron presentes D. Marcelo Palacios Alonso, patronu fundador de la SIBI y presidente del Comité Científicu, Dª Ana María Cano González, presidenta de l’ALLA y D. Carlos Lastra López, ayalgueru de l’ALLA.