10 años de RTPA, sí, pero ensin una presencia digna de la llingua asturiana

LLAR_ALLA

NOTA OFICIAL: 10 AÑOS DE RTPA, SÍ, PERO ENSIN UNA PRESENCIA DIGNA DE LA LLINGUA ASTURIANA

 

La RTPA lleve meses apregonando –y lluciendo en toles sos emisiones– un anagrama especial conmemorativu de los 10 años de la so esistencia.

El qu’un ente públicu de radiotelevisión asturiana algame los 10 años ye un fechu ensin dulda relevante pa la vertebración d’una comunidá autónoma que, como Asturies, ta somorguiada nuna fonda crisis económica, social y cultural.

Apocayá, va unos años, la RTPA sofrió una fuerte crisis estructural que tuvo a piques de facela desapaecer. Nesi momentu, tanto los sos trabayadores como la direición del ente quixeron treslladar a la opinión pública asturiana la importancia del so llabor social y cultural, mesmamente polo que cinca al usu y caltenimientu de la llingua asturiana como patrimoniu común de tolos asturianos.

Pero, a lo que paez, la crisis pasó y el compromisu de la RTPA cola dignificación del asturianu siguió como siempres; ye dicir, ensin sobrepasar el 5% de la emisión selmanal y con una programación temática que da una visión del asturianu ente etnográfica y costumista. El propiu Conseyeru d’Educación y Cultura del Gobiernu del Principáu d’Asturies criticaba díes atrás les insuficiencies d’esti modelu.

Convién saber, en tou casu, qu’una presencia digna del asturianu na RTPA nun ye namái una cuestión de sensibilidá cultural de dellos sectores asturianos, sinón que deriva direutamente del marcu llegal que la enconta (Llei d’Usu del Asturianu de 1998 y Llei de Segunda Reestructuración del Sector Públicu Autómicu de 2014). Pues bien, los mandaos calteníos nes anteriores lleis son dafechu desatendíos pola direición de la RTPA, magar tolos indicadores d’audiencia afiten l’aceutación popular de la presencia del asturianu na radio y televisión publiques d’Asturies.

L’Academia de la Llingua Asturiana (ALLA) camienta nesti sen qu’una presencia granible del asturianu na RTPA esixe d’un compromisu claru d’esta pa col procesu de recuperación llingüística n’Asturies y pide, darréu d’ello, que se dean pasos urxentes nel emplegu del asturianu con un enclín nidiamente comunicativu. Esto ye y como una propuesta de mínimos, un espaciu informativu na tv. (el del meudía o la nueche) dafechu n’asturianu, xunto con otros programes que dignifiquen l’usu social de la llingua (magacines, restrasmisiones deportives, documentales de temática actual, etc.); espacios informativos con un usu cotidianu del asturianu na radio y, dende llueu, un periódicu dixital dafechu n’asturianu (o con una opción doble de llectura n’asturianu y en castellán).

Los tiempos cuerren a la escontra d’una llingua minoritaria y minorizada que, como l’asturianu, cunta con un marcu de proteición enforma feble y curtiu. L’ALLA entiende, acordies colo anterior, que yá nun ye posible esperar por más tiempu: necesítase agora iguar una situación inxustificable, social y cultural, pa col asturianu na RTPA.

L’Academia de la Llingua Asturiana da anuncia, a lo cabero, que pa treslladar estos encamientos al ente públicu, acaba de solicitar una entrevista urxente con D. Antonio Virgili Rodríguez, Direutor Xeneral de la RTPA.

Uviéu, 5’ochobre de 2016.

ACADEMIA DE LA LLINGUA ASTURIANA

L’ALLA refuga la postura de la Delegación de Gobiernu d’España

LLAR_ALLA

NOTA OFICIAL: L’ALLA REFUGA LA POSTURA DE LA DELEGACIÓN DE GOBIERNU D’ESPAÑA N’ASTURIES PA COLES ORDENANCES DEL ASTURIANU NEL CONCEYU DE NOREÑA

 

L’Academia de la Llingua Asturiana, énte’l requerimientu de la Delegación de Gobiernu d’España nel Principáu d’Asturies pidiendo l’anulación de la ordenanza municipal pal usu del asturianu nel Conceyu de Noreña, quier treslladar a la opinión pública la so posición énte lo qu’entiende como un nuevu allugamientu anti-asturianu del Delegáu de Gobiernu, Sr. Gabino de Lorenzo.

Esta nueva decisión de la Delegación de Gobiernu fraya dafechu los principios llegales calteníos na Llei d’Usu del Asturianu del añu 1998, no que cinca al exerciciu de los derechos llingüísticos de los asturianos y, de mou concretu, l’Artículu 4 onde se conseña la validez del emplegu d’esta llingua nes comunicaciones orales o escrites de los ciudadanos nel Principáu d’Asturies y l’Artículu 8 onde s’afita l’usu del asturianu nos Ayuntamientos.

Son munchos los Conceyos qu’a lo llargo d’estos años aprobaron ordenances que vienen regulando l’usu del asturianu nel so ámbitu municipal ensin nengún conflictu y nun s’entiende por qué agora se tomen esti tipu de midíes que torguen los curtios derechos llingüísticos de los asturianos, que nun puen exercer con llibertá y ensin imposiciones l’usu de la so llingua.

La igua d’estes situaciones namái pasa pol reconocimientu de la oficialidá de la llingua histórica del pueblu asturianu. Poro, l’Academia pide a tolos Grupos Parllamentarios que, llegáu’l momentu, sofiten esti procesu de reconocimientu xurídicu del asturianu y qu’actúen (mentanto esa figura llegal nun seya plenamente efeutiva) afalando calces de dignificación y de planificación llingüística que, acordies col marcu normativu vixente, enconten l’usu del asturianu en tolos ámbitos.

Uviéu, 22 de xunetu de 2016.

ACADEMIA DE LA LLINGUA ASTURIANA

L’ALLA refuga la postura del PP

LLAR_ALLA

NOTA OFICIAL: L’ALLA REFUGA LA POSTURA DEL PARTÍU POPULAR PA COL ASTURIANU NA XUNTA XENERAL

 

L’Academia de la Llingua Asturiana, enterada de la prohibición del usu de la llingua asturiana na Comisión d’Estudiu sobre Réxime, Proteición y Promoción del Asturianu, quier treslladar a la opinión pública asturiana la so más fonda esmolición énte la falta de respetu hacia la nuesa llingua de los parllamentarios qu’afalaron tal prohibición na Xunta Xeneral.

N’efeutu, refugar l’usu del asturianu xunto col castellanu nes actividaes parllamentaries da cuenta perfeutamente del allugamientu, oxetivamente anti-asturianu, de dalgunos de los nuesos representantes políticos y, sobre manera, de Mercedes Fernández, cabezalera del Partíu Popular y entamadora d’esta vergoñosa iniciativa. L’Academia, nesti sen, nun pue sinón escandalizase al lleer el “tweet” col que la Presidenta del Partíu Popular facía alarde del so “llogru” anti-asturianu: hemos logrado que el castellano sea la única lengua del parlamento en Asturias”.

La verdá ye que ye difícil alcontrase con una manifestación tan inequívoca de despreciu a Asturies, d’autoodiu y de falta de sensibilidá pa cola cultura de los asturianos. Y dende llueu, ye ablucante qu’una dirixente política asturiana s’atreva a espresase nesos términos.

L’Academia de la Llingua Asturiana ye sabedora de que la igua de situaciones como les qu’acabamos de describir namái pasa pol reconocimientu –dende llueu, irrenunciable– de la oficialidá de la llingua histórica del pueblu asturianu. Poro, l’Academia pide a tolos Grupos Parllamentarios que, llegáu’l momentu, sofiten esti procesu de reconocimientu xurídicu del asturianu y qu’actúen (mentanto esa figura llegal nun seya plenamente efeutiva) afalando calces de dignificación y de planificación llingüística que, acordies col marcu normativu vixente, enconten l’usu del asturianu en toles instituciones del País y, n’especial, na Xunta Xeneral, muérganu máximu de representación de los ciudadanos y ciudadanes d’Asturies.

Uviéu, 16 de febreru de 2016.

ACADEMIA DE LA LLINGUA ASTURIANA

Al rodiu de la especialidá docente

LLAR_ALLA

NOTA OFICIAL: AL RODIU DE LA ESPECIALIDÁ DOCENTE DE LLINGUA ASTURIANA

 

L’Academia de la Llingua Asturiana vien siguiendo con munchu interés y fonda preocupación les noticies apaecíes apocayá nos medios de prensa escrita, radio y tv., no que cinca a la tramitación de la demanda de la especialidá docente de Llingua Asturiana pal profesoráu d’Educación Primaria y Secundaria.

La síntesis d’estes noticies plantega, per un llau, que’l Ministeriu d’Educación del Gobiernu d’España diz nun tener competencies pa facer posible tal especialidá y, per otru, que, darréu d’ello, la Conseyería d’Educación del Principáu va facer vidable la especialidá al traviés d’un decretu autonómicu (trámite nel que va participar una comisión inter-institucional con representantes cualificaos del Ministeriu y de la Conseyería d’Educación).

Énte estes anuncies, l’Academia de la Llingua Asturiana quier dexar claro lo siguiente:

  1. Resulta inaudito que’l Ministeriu d’Educación tresmita la idea de que’l tema de les especialidaes docentes nun forma parte de los sos atribuciones esclusives, darréu que ye xustamente esti Ministeriu’l que les establez, tanto pal cuerpu de Maestros d’Educación Infantil y Primaria (Real Decretu 1594/2011, de 4 de noviembre), como pal profesoráu d’Educación Secundaria (Real Decretu 1834/2008, de 8 de noviembre, desarrolláu llueu col Real Decretu 665/2015, de 17 de xunetu). Asina, a títulu d’exemplu, les especialidaes docentes n’Educación Infantil y Primaria son: Educación Infantil, Educación Primaria, Llingua Estranxera (Inglés), Llingua Estranxera (Francés), Llingua Estranxera (Alemán), Educación Física, Música, Pedagoxía Terapéutica y Audición y Llinguaxe.
  2. El Ministeriu dispón, del mesmu mou, que tamién son especialidaes docentes na Educación Primaria y Secundaria les correspondientes a les llingües propies cooficiales de les respectives comunidaes autónomes (art. 2.2 del Real Decretu de primaria y art. 2.3 del Real Decretu de secundaria).
  3. Ello quier dicir que cualquier concursu oposición y de tresllaos en cualquier comunidá autónoma española ha facese, necesaria y obligatoriamente, acordies coles especialidaes docentes fixaes pol Ministeriu d’Educación, Cultura y Deporte.
  4. Nun se contempla, nin nel ordenamientu xeneral del estáu nin nel de les autonomíes, nenguna posibilidá de crear especialidaes docentes de calter “autonómicu”. Ye dicir, nun hai funcionarios docentes en primaria y secundaria con una especialidá que nun tea fixada pol Ministeriu.
  5. La propuesta del Conseyu Escolar del Estáu (muérganu institucional que desarrolla un llabor consultivu, d’asesoramientu y propuestes al Gobiernu del estáu en rellación con los distintos aspeutos del sistema educativu español) no que cinca a la posibidá de reconocimientu de la especialidá docente de Llingua Asturiana ye que los reales decretos amiesten un apartáu que diga: Naquelles Comunidaes Autónomes nes qu’haya llingües non oficiales que tengan proteición llegal y formen parte del currículu, podrá dase tamién, a petición de la Comunidá Autónoma y según necesidades educatives, la especialidá propia de la llingua respectiva. Esta ye, xustamente, la posición que defende l’Academia de la Llingua Asturiana.

 

Darréu de lo anterior, esta institución académica pide a la Conseyería d’Educación y Cultura del Gobiernu del Principáu d’Asturies que nun contribuya, magar seya de mou involuntariu, a semar más confusión ente la comunidá educativa d’Asturies. A la escontra d’ello, l’Academia encamienta a la Conseyería que la so bona voluntá pa encalzar esta demanda hestórica empobine a una negociación seria y rigurosa coles próximes autoridades educatives del Estáu que lleve a un cambéu, nel sentiu propuestu, de los decretos d’especialidaes. Sedría llamentable dexar pasar una oportunidá que vien sofitada, ente otres instituciones y coleutivos, polos sindicatos mayoritarios de la educación pública n’Asturies, poles asociaciones de padres y madres con más implantación na nuesa comunidá, pola Xunta Xeneral del Principáu d’Asturies, pola Xunta de Personal Docente non universitariu, pol Conseyu Escolar del Principáu y, como viemos enantes, pol propiu Conseyu Escolar del Estáu.

Y una consideración cabera más: toos estos y otros problemes que torguen el normal allugamientu normativu de la llingua asturiana y la so dignificación nun desapaecerán dafechu mentantu l’idioma de los asturianos nun algame l’estatus, xurídicu y constitucional, d’oficialidá.

Uviéu, a 19 díes andaos del mes de xineru de 2016.

ACADEMIA DE LA LLINGUA ASTURIANA

Especialidá docente Llingua Asturiana

LLAR_ALLA

La especialidá docente de Llingua Asturiana y  l’actuación del Gobiernu del Principáu d’Asturies

Ayeri, miércoles 14, el Ministeriu d’Educación convocó en Madrid a la Conferencia Sectorial d’Educación pa conocer, ente otres cuestiones, la opinión de les Comunidaes Autónomes al rodiu del Proyeutu de Decretu de les Especialidaes Docentes d’Educación Secundaria.

Asturies, a la escontra d’otres comunidaes, nun tuvo representada pola Conseyera d’Educación, sinón pola recién nomada Direutora Xeneral de Desarrollu Curricular ya Innovación Educativa, Dª Victorina Fernández. Ye xustamente esta la que tresmite, como resultáu de la so xestión, la negativa del ministru Wert a reconocer la especialidá docente de Llingua Asturiana pal profesoráu d’asturianu d’Educación Secundaria.

Darréu de lo anterior, l’Academia de la Llingua Asturiana, cumpliendo’l so deber institucional de tutela de los derechos llingüísticos de los asturianos, quier manifestar lo siguiente:

  1. Ye inconcebible dafechu que’l profesoráu de Llingua Asturiana de toles estayes educatives tenga una formación universitaria oficial y homologable a la del restu de profesionales docentes y nun tenga, ensin embargu, reconocida la especialidá pa poder participar en concursos d’oposición o tresllaos n’igualdá de condiciones que les de los otros coleutivos docentes.
  2. Ye llamentable que la defensa de la petición asturiana nun se fixere al nivel de la importancia que correspuende a esta demanda histórica del sistema educativu n’Asturies. L’Academia alvirtió a la Sra. Conseyera, reiteradamente y en tiempu, nel sen de qu’un tema tan delicáu como esti esixía una xestión personal y decidida de la propia titular de la Conseyería.
  3. Ye una gran inxenuidá –o otra cosa– camentar que’l Ministeriu va dicir que sí, de mano, ensin una negociación fecha con convicción per parte del Gobiernu d’Asturies, na que s’argumente con datos educativos (alumnáu, centros, profesores, etc. a los qu’afecta esta decisión) la necesidá de la demanda.
  4. Ye inconcebible que’l Gobiernu del Principáu d’Asturies se conforme con un «non» –con que «Wert dixo non»–. Esta primer negativa nun tien por qué ser definitiva, sinón qu’hai que siguir negociando y argumentando pa que’l Ministeriu entre en razón y rectifique.

L’Academia, llueu de lo anterior, entiende que de nengún mou se pue dar por zarrada esta cuestión, sinón que’l Gobiernu d’Asturies, al máximu nivel, ye dicir la Sra. Conseyera d’Educación o, inclusive, el Sr. Presidente del Principáu, D. Javier Fernández, tien que retomar la iniciativa y solicitar, con calter d’urxencia, un alcuentru específicu y billateral col Ministeriu pa solucionar definitivamente esta cuestión. Esto ye una responsabilidá del Gobiernu d’Asturies y nun pue haber equí dexación de funciones.

L’Academia de la Llingua Asturiana, nel so casu, ufiértase pa participar nesti alcuentru (Ministeriu-Principáu) pa encontar téunicamente la discusión y ver de llograr una redaición afayadiza del Decretu d’Especialidaes que respete los intereses profesionales del profesoráu de Llingua Asturiana.

 

Uviéu, 15 de xineru de 2015

Academia de la Llingua Asturiana