Al rodiu de la especialidá docente

LLAR_ALLA

NOTA OFICIAL: AL RODIU DE LA ESPECIALIDÁ DOCENTE DE LLINGUA ASTURIANA

 

L’Academia de la Llingua Asturiana vien siguiendo con munchu interés y fonda preocupación les noticies apaecíes apocayá nos medios de prensa escrita, radio y tv., no que cinca a la tramitación de la demanda de la especialidá docente de Llingua Asturiana pal profesoráu d’Educación Primaria y Secundaria.

La síntesis d’estes noticies plantega, per un llau, que’l Ministeriu d’Educación del Gobiernu d’España diz nun tener competencies pa facer posible tal especialidá y, per otru, que, darréu d’ello, la Conseyería d’Educación del Principáu va facer vidable la especialidá al traviés d’un decretu autonómicu (trámite nel que va participar una comisión inter-institucional con representantes cualificaos del Ministeriu y de la Conseyería d’Educación).

Énte estes anuncies, l’Academia de la Llingua Asturiana quier dexar claro lo siguiente:

  1. Resulta inaudito que’l Ministeriu d’Educación tresmita la idea de que’l tema de les especialidaes docentes nun forma parte de los sos atribuciones esclusives, darréu que ye xustamente esti Ministeriu’l que les establez, tanto pal cuerpu de Maestros d’Educación Infantil y Primaria (Real Decretu 1594/2011, de 4 de noviembre), como pal profesoráu d’Educación Secundaria (Real Decretu 1834/2008, de 8 de noviembre, desarrolláu llueu col Real Decretu 665/2015, de 17 de xunetu). Asina, a títulu d’exemplu, les especialidaes docentes n’Educación Infantil y Primaria son: Educación Infantil, Educación Primaria, Llingua Estranxera (Inglés), Llingua Estranxera (Francés), Llingua Estranxera (Alemán), Educación Física, Música, Pedagoxía Terapéutica y Audición y Llinguaxe.
  2. El Ministeriu dispón, del mesmu mou, que tamién son especialidaes docentes na Educación Primaria y Secundaria les correspondientes a les llingües propies cooficiales de les respectives comunidaes autónomes (art. 2.2 del Real Decretu de primaria y art. 2.3 del Real Decretu de secundaria).
  3. Ello quier dicir que cualquier concursu oposición y de tresllaos en cualquier comunidá autónoma española ha facese, necesaria y obligatoriamente, acordies coles especialidaes docentes fixaes pol Ministeriu d’Educación, Cultura y Deporte.
  4. Nun se contempla, nin nel ordenamientu xeneral del estáu nin nel de les autonomíes, nenguna posibilidá de crear especialidaes docentes de calter “autonómicu”. Ye dicir, nun hai funcionarios docentes en primaria y secundaria con una especialidá que nun tea fixada pol Ministeriu.
  5. La propuesta del Conseyu Escolar del Estáu (muérganu institucional que desarrolla un llabor consultivu, d’asesoramientu y propuestes al Gobiernu del estáu en rellación con los distintos aspeutos del sistema educativu español) no que cinca a la posibidá de reconocimientu de la especialidá docente de Llingua Asturiana ye que los reales decretos amiesten un apartáu que diga: Naquelles Comunidaes Autónomes nes qu’haya llingües non oficiales que tengan proteición llegal y formen parte del currículu, podrá dase tamién, a petición de la Comunidá Autónoma y según necesidades educatives, la especialidá propia de la llingua respectiva. Esta ye, xustamente, la posición que defende l’Academia de la Llingua Asturiana.

 

Darréu de lo anterior, esta institución académica pide a la Conseyería d’Educación y Cultura del Gobiernu del Principáu d’Asturies que nun contribuya, magar seya de mou involuntariu, a semar más confusión ente la comunidá educativa d’Asturies. A la escontra d’ello, l’Academia encamienta a la Conseyería que la so bona voluntá pa encalzar esta demanda hestórica empobine a una negociación seria y rigurosa coles próximes autoridades educatives del Estáu que lleve a un cambéu, nel sentiu propuestu, de los decretos d’especialidaes. Sedría llamentable dexar pasar una oportunidá que vien sofitada, ente otres instituciones y coleutivos, polos sindicatos mayoritarios de la educación pública n’Asturies, poles asociaciones de padres y madres con más implantación na nuesa comunidá, pola Xunta Xeneral del Principáu d’Asturies, pola Xunta de Personal Docente non universitariu, pol Conseyu Escolar del Principáu y, como viemos enantes, pol propiu Conseyu Escolar del Estáu.

Y una consideración cabera más: toos estos y otros problemes que torguen el normal allugamientu normativu de la llingua asturiana y la so dignificación nun desapaecerán dafechu mentantu l’idioma de los asturianos nun algame l’estatus, xurídicu y constitucional, d’oficialidá.

Uviéu, a 19 díes andaos del mes de xineru de 2016.

ACADEMIA DE LA LLINGUA ASTURIANA

Especialidá docente Llingua Asturiana

LLAR_ALLA

La especialidá docente de Llingua Asturiana y  l’actuación del Gobiernu del Principáu d’Asturies

Ayeri, miércoles 14, el Ministeriu d’Educación convocó en Madrid a la Conferencia Sectorial d’Educación pa conocer, ente otres cuestiones, la opinión de les Comunidaes Autónomes al rodiu del Proyeutu de Decretu de les Especialidaes Docentes d’Educación Secundaria.

Asturies, a la escontra d’otres comunidaes, nun tuvo representada pola Conseyera d’Educación, sinón pola recién nomada Direutora Xeneral de Desarrollu Curricular ya Innovación Educativa, Dª Victorina Fernández. Ye xustamente esta la que tresmite, como resultáu de la so xestión, la negativa del ministru Wert a reconocer la especialidá docente de Llingua Asturiana pal profesoráu d’asturianu d’Educación Secundaria.

Darréu de lo anterior, l’Academia de la Llingua Asturiana, cumpliendo’l so deber institucional de tutela de los derechos llingüísticos de los asturianos, quier manifestar lo siguiente:

  1. Ye inconcebible dafechu que’l profesoráu de Llingua Asturiana de toles estayes educatives tenga una formación universitaria oficial y homologable a la del restu de profesionales docentes y nun tenga, ensin embargu, reconocida la especialidá pa poder participar en concursos d’oposición o tresllaos n’igualdá de condiciones que les de los otros coleutivos docentes.
  2. Ye llamentable que la defensa de la petición asturiana nun se fixere al nivel de la importancia que correspuende a esta demanda histórica del sistema educativu n’Asturies. L’Academia alvirtió a la Sra. Conseyera, reiteradamente y en tiempu, nel sen de qu’un tema tan delicáu como esti esixía una xestión personal y decidida de la propia titular de la Conseyería.
  3. Ye una gran inxenuidá –o otra cosa– camentar que’l Ministeriu va dicir que sí, de mano, ensin una negociación fecha con convicción per parte del Gobiernu d’Asturies, na que s’argumente con datos educativos (alumnáu, centros, profesores, etc. a los qu’afecta esta decisión) la necesidá de la demanda.
  4. Ye inconcebible que’l Gobiernu del Principáu d’Asturies se conforme con un «non» –con que «Wert dixo non»–. Esta primer negativa nun tien por qué ser definitiva, sinón qu’hai que siguir negociando y argumentando pa que’l Ministeriu entre en razón y rectifique.

L’Academia, llueu de lo anterior, entiende que de nengún mou se pue dar por zarrada esta cuestión, sinón que’l Gobiernu d’Asturies, al máximu nivel, ye dicir la Sra. Conseyera d’Educación o, inclusive, el Sr. Presidente del Principáu, D. Javier Fernández, tien que retomar la iniciativa y solicitar, con calter d’urxencia, un alcuentru específicu y billateral col Ministeriu pa solucionar definitivamente esta cuestión. Esto ye una responsabilidá del Gobiernu d’Asturies y nun pue haber equí dexación de funciones.

L’Academia de la Llingua Asturiana, nel so casu, ufiértase pa participar nesti alcuentru (Ministeriu-Principáu) pa encontar téunicamente la discusión y ver de llograr una redaición afayadiza del Decretu d’Especialidaes que respete los intereses profesionales del profesoráu de Llingua Asturiana.

 

Uviéu, 15 de xineru de 2015

Academia de la Llingua Asturiana

La LOMCE, el currículu d’Asturies y la enseñanza de la Llingua Asturiana

Llueu de l’aprobación de la LOMCE (Llei Orgánica de Meyora de la Calidá Educativa), con fecha 9 d’avientu de 2013, correspuende a les Comunidaes Autónomes afayar, dientro de les sos llendes competenciales, los conteníos de la mesma.

Al marxe d’otres consideraciones sobre’l valir y el nivel de consensu de la mentada llei, hai que reconocer que la disposición adicional trixésimo octava afitaba per primer vegada les posibilidaes educatives de les llingües propies non oficiales de les Comunidaes del Estáu español:

«Aquelles Comunidaes Autónomes nes qu’haya llingües non oficiales con proteición llegal ufiertaránles, nel so casu, nel bloque d’asignatures de llibre configuración autonómica nos términos que determine la so normativa reguladora.»

La situación actual, a pocos meses d’entrada en vixencia de la llei (cursos 1u, 3u y 5u d’Educación Primaria del próximu cursu académicu 2014-2015), ufría una perbona oportunidá pa meyorar los calces d’escolarización de la Llingua Asturiana n’aspeutos como A) númberu d’hores d’impartición selmanal (1,5 hores anguaño, situación dafechu insuficiente pal deprendizax de les competencies qu’esta enseñanza lleva inxertes); B) posibilidá d’usar l’asturianu con calter parcialmente vehicular pa trabayar conteníos d’asignatures como Ciencies Sociales o Naturales; C) allugamientu con calter verdaderamente voluntariu de la Llingua Asturiana nel currículu, acordies col marcu llegal; etc.

Constatamos, ensin embargu, que tamos énte una nueva oportunidá perdida darréu que A) la llingua sigue calteniendo una dedicación horaria difícilmente defendible dende’l puntu de vista pedagóxicu (1,5 hores a la selmana); B) nun hai previsión del so emplegu pa trabayar conteníos rellacionaos con aspeutos hestóricos, culturales, medioambientales, xeográficos, artísticos… de la Comunidá Autónoma; o C) pierde, en fin, el so calter de voluntariedá pa tresformase nuna materia optativa que compite cola Cultura Asturiana, bloque de conocimientos que poles sos carauterístiques habría ser tresversal en tol currículu asturianu.

Con ser lo anterior grave pal futuru educativu del asturianu, alcontrámonos agora con posicionamientos, ensin dulda minoritarios, non yá anti-pedagóxicos, sinón claramente de resistencia a l’aceutación del marcu llegal de referencia: LOMCE y Llei d’Usu. A lo que paez, determinaos sectores, a lo meyor desinformaos o a lo meyor conscientes del so facer, pretenden acabar cola escolarización de la Llingua Asturiana queriendo facela competir con otres materies como, por exemplu, la segunda llingua estranxera. La LOMCE dexaba la posibilidá d’encaxar la enseñanza d’una segunda llingua estranxera ensin competencia coles llingües propies de les comunidaes, fueren o non oficiales. Poro, plantegar nesti momentu un falsu discutiniu Llingua Asturiana/Llingua Estranxera ye namái una xida oportunista, malintencionada y tendenciosa pa desaniciar les curties posibilidaes que tien la escolarización de la Llingua Asturiana.

L’Academia de la Llingua Asturiana; los sindicatos de la enseñanza SUATEA, CCOO y FETE-UXT; les organizaciones de pas y mas d’alumnos como FAPA «Miguel Virgós» y FAPAS Xixón; la Xunta Estudiantil Asturiana; el Sindicatu d’Estudiantes; les asociaciones cíviques Xunta pola Defensa de la Llingua Asturiana, Iniciativa pol Asturianu y «Reciella (Families pol Asturianu)» faen responsable al Gobiernu del Principáu d’Asturies y a la Conseyería d’Educación de la regulación y el determín que se tome con respeuto al asitiamientu curricular de l’asignatura de Llingua Asturiana y entienden que l’alternativa ufiertada Llingua Asturiana/Cultura Asturiana constitúi yá una rebaxa de la situación anterior y un escenariu de mínimos minimísimos. Darréu d’ello, toa decisión que vaya escontra esti escenariu ye inaceutable dafechu, tanto dende’l puntu de vista llegal como dende’l puntu de vista social y cultural.

Les instituciones y organizaciones que sofitamos esti documentu proclamamos la nuesa belixerancia escontra cualesquier intentu de facer competir al asturianu con una segunda llingua estranxera o con cualquier otra materia que nun seya la de Cultura Asturiana y damos anuncia, tanto al Gobiernu como a la sociedá asturiana, de qu’actuaremos en consecuencia con toes aquelles iniciatives sociales y ciudadanes que tean al nuesu algame pa parar un desatín como’l que dende dalgunes instancies se pretende.

Uviéu, a 20 díes andaos del mes de xunu de 2014.

El futuru de la Llingua Asturiana acordies cola «llei Wert» y les reclamaciones de la comunidá educativa asturiana

LLAR_ALLA

Con fecha 17 d’avientu de 2012 l’Academia de la Llingua Asturiana alvertía a la opinión pública del peligru que corría la enseñanza del asturianu si nun se contemplaba una correición amañosa del articuláu de la LOMCE (Llei Orgánica de Meyora de la Calidá Educativa), popularmente denomada «Llei Wert», que plantega’l Gobiernu del Partíu Popular (PP) en Madrid. L’Academia facía, amás, un llamáu al Gobiernu del Principáu d’Asturies pa que tomare nes sos manes la esixencia d’una solución definitiva a los problemes d’escolarización de la Llingua Asturiana.

De mou paralelu, otres instancies y organizaciones (como los Sindicatos d’Enseñanza SUATEA, CC.OO. y FETE-UXT), el Sindicatu d’Estudiantes y organizaciones de padres d’alumnos como FAPA Miguel Virgós y FAPAS-Xixón llevantaben la voz pa pidir col mayor enfotu que la futura Llei d’Educación nun fuere l’elementu que llevare a la desapaición de la nuesa llingua história, sinón que, a la escontra, ficiere vidable un futuru dignu pa la so escolarización, entamada va cuasi 30 años.

Pues bien, ye decisión de l’Academia, de los sindicatos y de les organizaciones de padres y alumnos collaborar axuntando esfuerzos pa treslladar el Partíu Popular, a los Gobiernos d’España y d’Asturies, a les fuerces polítiques de la Xunta Xeneral y a tol pueblu asturianu la so esmolición y esixencia d’una solución efeutiva pa la escolarización del asturianu.

Nós nun representamos a tola sociedá asturiana, pero somos una parte importante de la comunidá educativa asturiana y queremos que se nos sienta nunos momentos que puen ser decisivos pa la sobrevivencia de la llingua y cultura d’Asturies. Somos sabedores qu’estos y otros problemes (emplegu de la llingua na alministración, nos medios de comunicación públicos, na toponimia, etc) tienen el so orixe na falta de reconocimientu xurídicu del asturianu como llingua oficial; poro, reclamamos esi estatus xurídicu d’oficialidá, entendiendo qu’ésta ha afayase a la realidá social y económica d’Asturies y teniendo tamién en cuenta la nuesa tradición cultural y sociollingüística. Reclamamos, en definitiva, un consensu políticu ampliu que defina les carauterístiques qu’ha tener la oficialización de la llingua, les sos fases d’aplicación y los recursos que, acordies cola situación de crisis que nos llenda, puen destinase a esti fin.

Pero esiximos también, y col mayor puxu, que los redactores de la «Llei Wert» seyan conscientes de qu’Asturies tien una llingua propia que, magar nun ser llingua co-oficial, sí tien reconocimientu xurídicu como llingua, amás de plenu calter curricular y que vien siendo estudiada con procuru por miles d’alumnos asturianos a lo llargo de les 3 últimes décades. Los redactores de la llei tienen que saber esto y tienen qu’actuar en consecuencia, ye dicir, faciendo porque la escolarización de la llingua asturiana s’allugue con xeitu al llau del restu de les aries llingüístiques.

Ye inalmisible cualquier tratamientu llegal que rebaxe l’actual estatus escolar del asturianu. Ésti tendría, mesmamente, que meyorase n’aspeutos como’l númberu d’hores d’impartición, calter del aria (especialidá pal profesoráu de primaria y secundaria), xeneralización a tolos centros, etc.

Nós, como institución y organizaciones esmolecíes pol futuru d’Asturies –y tamién como persones asturianes– taremos sollertes pa facer un siguimientu de la situación y comprometémosnos a facer oyer la nuesa voz ellí onde seya necesario.

Posibilidaes d’enseñanza de la Llingua Asturiana acordies cola «Llei Wert»

Academia de la Llingua Asturiana

I.- Consideraciones previes:

1. L’Academia de la Llingua Asturiana actúa nesti casu, llueu de bayura de llamaes recibíes per parte de sindicatos y coleutivos d’enseñanza y darréu de lo afitao nos estatutos d’esta Academia sobre la tutela de los derechos llingüísticos de los asturianos.
2. L’ALLA estudia estrictamente y namái les posibilidaes d’enseñanza llingüística del asturianu. Nun fai xuicios de valor sobre’l conteníu xeneral de la Llei.
3. L’ALLA comprueba, una vegada más, que la falta de cooficialidá de la llingua asturiana ye davezu un obstáculu insalvable pa la proteicción de los derechos llingüísticos de los asturianos. La llexislación xeneral del Estáu nun tien en cuenta situaciones xurídiques, pretendidamente «intermedies», como la del asturianu.
4. L’actual redaición de la Llei nun contempla la enseñanza de llingües non oficiales y malpenes ufre calces pa una situación d’enseñanza del asturianu homologable a l’actual.

II.- VISIÓN DE SÍNTESIS DE LA LLEI EXEMPLIFICANDO COLA ETAPA D’EDUCACIÓN PRIMARIA (AMESTANDO UNA PROPUESTA D’ENMIENDA DE MÍNIMOS DE L’ACADEMIA).

Anteproyecto de ley orgánica para la mejora de la calidad educativa

«1. La etapa de Educación Primaria comprende seis cursos y se organiza en áreas, que tendrán un carácter global e integrador.

2. Todos los alumnos deben cursar las siguientes áreas del bloque de asignaturas troncales, en cada uno de los cursos:

a) Ciencias de la Naturaleza
b) Ciencias Sociales
c) Lengua Castellana y Literatura
d) Matemáticas
e) Primera Lengua Extranjera

El horario escolar mínimo correspondiente a las áreas del bloque de asignaturas troncales en cómputo global para la Educación Primaria no será inferior al 50% del total.

3. En el bloque de asignaturas específicas, todos los alumnos deben cursar las siguientes áreas en cada uno de los cursos:

a) Educación Física
b) Religión, o Valores Culturales y Sociales, a elección de los padres o tutores

Además, en función de la regulación y de la programación de la oferta educativa que establezca cada Administración educativa y de la oferta de los centros docentes, los alumnos cursarán al menos una de las siguientes áreas del bloque de asignaturas específicas:

a) Educación Artística
b) Segunda Lengua Extranjera

El horario escolar máximo correspondiente a las áreas del bloque de asignaturas específicas en cómputo global para la Educación Primaria no será superior al 50% del total.

4. En el bloque de asignaturas de especialidad, todos los alumnos deben cursar Lengua Cooficial y Literatura en aquellas Comunidades Autónomas que posean dicha lengua cooficial. En el caso de las Comunidades Autónomas con lengua propia no oficial, pero con reconocimiento jurídico e implantación curricular, los alumnos deberán cursar Lengua y Literatura de la Comunidad o Cultura de la Comunidad, a elección de los padres o tutores.

Además, los alumnos podrán cursar como máximo otra área más en el bloque de asignaturas de especialidad, en función de la regulación y de la programación de la oferta educativa que establezca cada Administración educativa y de la oferta de los centros docentes, que podrá ser el área del bloque de asignaturas específicas no cursada, o un área a determinar por la Administración educativa o por el centro docente».

III.- L’ALLA fai un llamáu al Gobiernu del Principáu, al Partíu Popular d’Asturies y a les otres fuerces polítiques asitiaes na Xunta Xeneral pa qu’actúen conxuntamente col envís d’iguar les posibilidaes de la enseñanza del asturianu en condiciones mínimamente aceptables, acordies col Estatutu d’Autonomía p’Asturies (1981) y la Llei d’Usu del Asturianu (1998).

IV.- L’Academia entiende que namái la cooficialidá de la llingua asturiana, n’ámbitos como l’educativu y l’alministrativu, puen asegurar un futuru de normalidá pa la llingua histórica d’Asturies. Los problemes actuales, y otros que xurden de contino a la hora de dignificar y usar el nuesu idioma, amuesen bien a les clares que l’actual marcu xurídicu del asturianu ye insuficiente dafechu.