Nota oficial sobre la Ría del Eo

L’anuncia asoleyada pela prensa nel sen de que la llamada “Comisión Geográfica Nacional” del Conseyu Superior Xeográficu de Madrid propón como nome oficial pa la ría más occidental d’Asturies “Ría de Ribadeo”, a la escontra de les posiciones asturianes que caltienen qu’ha ser oficial el de “Ría del Eo/Ría do Eo” como niciu de respetu a les dos comunidaes ribereñes, supón un agraviu a les posiciones asturianes.

Ta visto que les razones hestóriques y llingüístiques esgrimíes dende Asturies nun pesen un res cuando dende Madrid traten d’imponer una política que s’alluga, oxetivamente, al marxe de les bones razones y de la convivencia. En llugar de dir a la gueta del consensu, entá más necesariu a la hora de tratar cuestiones fronterices, xenérase’l conflictu favoreciendo inxustificadamente a una de les partes implicaes; en llugar d’atopar una solución de compromisu, favorécense les posiciones radicales.

La oxetividá y el bon xuiciu de la citada comisión, onde nun hai dengún representante asturianu, queda lloñe de ser modélica y recuerda tiempos de dómines pasaes, cuando pesaben más los intereses coyunturales y políticos que’l respetu a la tradición llingüística y cultural y al sentir de los mesmos ciudadanos.

Los asturianos asistimos una vegada más a otra intromisión d’una política llingüística con un inequívocu enclín espansionista que non sólo nun busca acuerdos sinón que fai de la imposición llingüística la so norma avezada ensin el mínimu respetu a la vecindá, a la tradición oral y a los fechos impuestos por una realidá xeográfica compartida.

L’Academia de la Llingua Asturiana fai un llamamientu al Gobiernu del Principáu pa qu’actúe directamente y s’oponga a una arbitrarierá tan clamorosa como la que denunciamos y fai alcordanza, una vegada más, de qu’esti y otros casos d’inxerencia inxustificada nun tendríen razón de ser si Asturies cuntara con una política llingüística real y con una llingua asturiana oficializada.