X.A. González Riaño, nuevu Presidente

Ayeri, xueves 22 de xunu de 2017, llueu de fináu’l mandatu de 4 años de los cargos direutivos de la institución, féxose’l procesu eleutoral y darréu d’ello salió escoyida la direición siguiente:

-Presidente: Xosé Antón González Riaño.
-Vicepresidenta: Marta Mori d’Arriba.
-Secretariu: Xosé Ramón Iglesias Cueva.
-Vicesecretaria: Carme Muñiz Cachón.
-Ayalgueru: Carlos Lastra López.

L’anterior Presidenta, Dra. Ana María Cano González (Caderalga de Filoloxía Románica de la Universidá d’Uviéu) diere anuncia a l’ALLA va unes selmanes del so determín de nun volver presentase a la reeleición, llueu de 4 mandatos nel cargu.

L’Academia de la Llingua Asturiana quier sorrayar y agradecer fondamente l’escomanáu llabor desendolcáu pola direición anterior nos ámbitos sociales y de normativización del idioma, al empar que da anuncia del so enfotu por siguir nuna xera qu’ha empobinar, ensin dulda, hacia’l llogru de la oficialidá de la llingua hestórica de tolos asturianos y asturianes.

ACADEMIA DE LA LLINGUA ASTURIANA

Eleiciones a la Vicepresidencia de l’Academia de la Llingua Asturiana

Na xunta estraordinaria de l’Academia de la Llingua Asturiana celebrada n’Uviéu’l 21 de payares de 2014, el plenu de la mesma elixó como Vicepresidente de la Institución al Académicu Don Xosé Antón González Riaño, profesor titular de la Universidá d’Uviéu, responsable de formación de la Institución y direutor de la Universidá Asturiana de Branu (UABRA).

Esti puestu quedare vacante tres la muerte, n’agostu de 2013, del profesor Don Miguel Ramos Corrada, que viniere desempeñando esti cargu nos últimos mandatos.

Énte l’usu de la llingua asturiana nes Eleiciones Xenerales del 20-N

L’Academia de la Llingua Asturiana, enterada de los problemes xurdíos col emplegu del asturianu per parte d’aquellos ciudadanos asturianos que quieran exercer el so derechu al votu emplegando esta llingua, problemes que vienen siendo denunciaos pol grupu políticu «Andecha Astur», quier treslladar a la opinión pública asturiana y española’l so más fondu rechazu énte les actitúes discriminatories que de contino vien sufriendo l’idioma de los asturianos en cada ocasión en qu’ésti quier ser usáu en situaciones d’especial relevancia política y alministrativa.

L’Academia de la Llingua Asturiana, darréu de la situación anterior y acordies col so mandáu estatutariu de mirar polos derechos llingüísticos de la asturianos, vese na necesidá de encamentar cola mayor enerxía a la Xunta Electoral Provincial que faiga los mandaos afayadizos pa qu’esa situación d’anormalidá pa col asturianu se corrixa urxentemente.

L’Academia de la Llingua Asturiana fai alcordanza, a lo cabero, de que situaciones como éstes sedríen impensables nuna situación de oficialidá de la llingua de los asturianos. Poro, píde-y a la Xunta Xeneral del Principáu y a les fuerces polítiques que nella s’alluguen que, d’una vegada, s’apauten p’algamar un estatus definitivu d’oficialización del nuesu vieyu idioma

Uviéu, 16 de payares de 2011

Academia de la Llingua Asturiana