Cultures algama’l númberu 24 con un monográficu sobre lleendes y ayalgues

CULTURES. Revista Asturiana de Cultura anueva’l formatu de los artículos,  inxer seición de reseñes y fai alcordanza del antropólogu José Luis García

Tres del monográficu de la música (qu’ocupare los númberos 22 y 23), CULTURES. Revista Asturiana de Cultura, editada pola Academia de la Llingua, vuelve a la cai con otru volume temáticu, nesta ocasión dedicáu al campu d’investigación de les lleendes y les ayalgues. Tres del entamu, iguáu pol direutor de la revista, Roberto González-Quevedo, nueve contribuciones más dan cuerpu a la parte principal de la edición, toes elles con un formatu anováu qu’agora inxerta resúmenes y pallabres clave n’inglés. Continuar leyendo «Cultures algama’l númberu 24 con un monográficu sobre lleendes y ayalgues»

Cultures 23, yá na cai

El númberu ventitrés de Cultures. Revista Asturiana de Cultura apuerta a les llibreríes, zarrando asina la pareya monográfica que forma col volume ventidós. Si aquel taba tituláu «La cultura de la música n’Asturies (I): De la tradición a les nueves formes», esti númberu sal a la cai enfaxáu como «La cultura de la música n’Asturies (II): La gaita y la voz». Continuar leyendo «Cultures 23, yá na cai»

CULTURES. Revista Asturiana de Cultura

Cultures. Revista Asturiana de Cultura. nu 19 (2015) Uviéu, ALLA.
Nuevu númberu de la Revista de Cultures de l’Academia de la Llingua. Nella úfrense artículos d’estremáu calter de Roberto González-Quevedo («Paisax y cultura n’Asturies (II). Los oratorios como oxetivación d’idees y valores»), Manuel Francisco Matarín Guil («Las ermitas de ánimas de la comarca de los ríos Andarax y Nacimiento (Almería)»), Xuan Pedrayes Obaya («Catálogu de los oratorios en Conceyu Villaviciosa»), Ramsés Ilesies Fernández & Xosé Antón Fernández «Ambás» («Aguilandeiros de San Xuan en Villapañada (Grau)»), Carme Pedrayes Toyos («Vezos y creyencies en conceyu Villaviciosa»), Roberto González-Quevedo («Categorización de cultura ya naturaleza nos cuentos populares d’animales»). La revista sigue cola «Faza d’histories de vida» colos trabayos de Milio’l del Nido («Mio tíu Milio») y Pepe Monteserín («Pa vaques, le mio hermanu» y «L’octavu pasaxeru»). El númberu zárralu la estaya «Reseñes» de Juan Alfonso Fernández García («En Ca’l Gaiteiru o l’entamu de la reconstrucción historicista de la gaita n’Asturies»).

Cultures. Revista Asturiana de Cultura

Cultures. Revista Asturiana de Cultura. nu 18 (2014) Uviéu, ALLA.
Tres el monográficu de la pesca, la revista Cultures saca un nuevu númberu con un garrapiellu de trabayos d’estremáu calter y que son: «Paisaxe y cultura n’Asturies (I). Bañeres y praos. Un análisis antropolóxicu», de Roberto González-Quevedo; «El paisax ¿natural? d’Asturies», de Margarita Fernández Mier; «Del.las consideraciones xeopolíticas en cuantas al asitiamientu de los val.les de L.laciana ya Babia na Baxa Edá Media: ¿n’Asturias o en L.león?» de Pablo García Cañón; «Cuentos asturianos d’animales» d’Alberto Álvarez Peña y «El mundu les castañes y el castañéu en Villaviciosa» de Carme Pedrayes Toyos. El númberu zárralu les «Reseñes» «Memoria encesa» y «Averándose a l’Antropoloxía» de Roberto González-Quevedo.