Allugamientu de l’Academia de la Llingua Asturiana énte la propuesta presupuestaria del Gobiernu d’Asturies en rellación cola llingua asturiana, o la imposibilidá de facer política llingüística ensin presupuestu económicu que la sofite

L’Academia de la Llingua Asturiana, llueu de conocer pelos medios de comunicación la propuesta presupuestaria destinada al asturianu que’l Gobiernu d’Asturies acaba d’unviar a la Xunta Xeneral del Principáu, quier treslladar a la opinión pública la so más fonda deceición pol conteníu de la mesma.

N’efeutu, les espeutatives yeren otres darréu del pautu d’investidura algamáu ente la FSA-PSOE ya IX, tamién tres la proposición non de llei aprobada (a mediaos d’ochobre pasáu) mayoritariamente nel parllamentu asturianu colos votos favoratibles d’IX, PSOE, Foro y Podemos, asina como dempués del alcuerdu presupuestariu pal exerciciu viniente ente’l Gobiernu d’Asturies y el grupu parllamentariu d’IX.

Plantegar que se pue facer política llingüística con un presupuestu de 1.500.000 d’euros (esto ye, 1,5 euros por asturianu) ye daqué ofensible pa toles persones con una mínima sensibilidá llingüística y cultural asturiana. Da que pensar, nesti sen, el fechu de qu’otres comunidaes con llingua propia, ente elles les que menos dediquen a política llingüística, s’estremen tanto de la propuesta asturiana. Asina -y al marxe de partíes económiques concretes destinaes a educación, vida parllamentaria, xestión de diputaciones y universidaes, etc.- Galicia y Valencia tripliquen por persona’l presupuestu asturianu; Baleares cuadriplícalu; y Navarra, pa cuasi la mitá de población qu’Asturies y con una proporción d’usuarios de la llingua autóctona que nun sobrepasa’l 10% de la población, dedica a política llingüística 4.000.000 d’euros. Too ello por nun falar del presupuestu destináu a la proteición del aranés que, cenciellamente, multiplica por 10 euros el presupuestu por persona n’Asturies.

Na nuesa comunidá, llueu de lo anterior, faise dafechu imposible falar de recuperación llingüística -y mesmamente de política llingüística favoratible- cuando se cunta con unos recursos tan escandalosamente insuficientes. Ye verdá qu’hai midíes que dependen esclusivamente de la voluntá política de los xestores institucionales y que puen facese a coste cero (por exemplu, les rotulaciones de nueves instancies y servicios públicos cuesten tanto n’asturianu como en castellanu, espublizar un anunciu institucional nos medios de comunicación cuesta lo mesmo n’asturianu qu’en castellanu, etc.), pero ye verdá qu’hai otres munches midíes que nun se puen llevar alantre, nin n’Asturies nin en dengún otru sitiu, si nun van acompañaes del encontu económicu que les faiga creyibles.

Esta ye la llaceriosa situación cola que nos atopamos agora na tramitación parllamentaria de los presupuestos. ¿Qué facer, entós? Pues, en primer llugar, llamar l’atención sobre estos fechos pa de nengún mou se puea repitir situación asemeyada n’años venideros y, sobre too, actuar agora mesmo, nel intre, faciendo ver a los partíos políticos que llevaron nos sos programes midíes concretes de política llingüística la necesidá de plantegar enmiendes parciales a los presupuestos del 2015 que meyoren les partíes económiques destinaes a la llingua y cultura d’Asturies.

Ye obligación de l’Academia de la Llingua Asturiana denunciar una situación oxetivamente inxusta y fondamente discriminatoria, una vegada más, pa la llingua asturiana y pidir a los partíos políticos con representación na Xunta Xeneral del Principáu d’Asturies qu’igüen una situación que nos avergoña como asturianos.

Uviéu, a 30 díes andaos del mes de payares de 2015.

ACADEMIA DE LA LLINGUA ASTURIANA

Enseñanza del asturianu: especialidá docente, currículu escolar y oficialidá

L’Academia vien siguiendo con perxustificada alarma les noticies qu’estos caberos meses y díes arrodien la enseñanza de la Llingua Asturiana nes estremaes estayes educatives. Ente otres:

  1. La negativa del Ministeriu d’Educación a inxerir nel Decretu d’Especialidaes Docentes la posibilidá de que la materia «Llingua Asturiana» pudiere ser una de les especialidaes pal profesoráu d’Educación Primaria y Secundaria. Y ello magar cuente con una enmienda del propiu Conseyu Escolar del Estáu que reclama tal posibilidá. Esta negativa ye, lóxicamente, responsabilidá del Ministeriu, pero tamién de la Conseyería d’Educación y Cultura d’Asturies que nun fexo por negociar al máximu nivel les condiciones de la petición.
  1. La inxustificable y allegal propuesta de la Conseyería d’Educación del Gobiernu d’Asturies p’allugar l’asignatura «Llingua Asturiana» dientro de la Educación Secundaria nunes condiciones d’optatividá –y competencia desigual– con 4 materies: Segunda Llingua Estranxera, Cultura Clásica, Aniciu a l’Actividá Entamadora y Empresarial y Materia Propuesta pol centru docente. Persabe’l Gobiernu d’Asturies qu’esto incumple dafechu l’artículu 10 de la Llei d’Usu del Asturianu, xustamente’l dedicáu al currículu, que diz:

3. La escoyeta del estudiu o del emplegu del bable/asturianu como asignatura del currículu en nengún casu podrá servir de motivu de discriminación de los alumnos.

Pa los que lo escueyan, el so aprendimientu o usu nun podrá torgar que reciban la mesma formación y conocimientos n’igualdá de condiciones que’l restu del alumnáu.

  1. La risible ya insultante decisión, tamién de l’alministración educativa n’Asturies, de camentar que l’asturianu pue deprendese nel Bachilleratu rebaxando de 4 a 1 hora selmanal la so docencia nunes condiciones d’axuste, amás, práuticamente imposibles pal alumnáu.

L’Academia entiende que nel tresfondu de toa esta llamentable situación ta la testona realidá de que l’asturianu ye la única llingua del estáu español non oficial. Esto nun almite duldes. De fechu, cuando’l Ministeriu refuga la especialidá pon como xida que l’asturianu nun ye oficial; y asina mesmo cuando la Conseyería nun ye a alcontrar el llugar qu’a la Llingua Asturiana-y correspondería nun currículu normal pa una comunidá billingüe, el problema, na práutica, vien a ser exautamente’l mesmu.

Y ye qu’equí, n’Asturies, intenta facese daqué imposible, xurídica y socialmente: caltener una llingua y una cultura al marxe del marcu constitucional de referencia que ye la oficialización. Esti ye’l camín lóxicu que siguieron los gallegos, los vascos, los navarros, los catalanes, los baleares y los araneses.

Tamos diciendo, en fin, que la hestoria de más de 3 décades amuesa que cualquier pasu llegal que represente un encontu oxetivu pal caltenimientu del asturianu como llingua de cultura n’Asturies esfrónase de contino escontra’l fechu de que l’idioma de los asturianos nun ye oficial. Y esto han sabelo los partíos políticos asitiaos n’Asturies, de mou qu’agora que tamos en plenu periodu pre-ellectoral tienen que ser conscientes de que si nun planteguen y negocien la co-oficialidá de la llingua asturiana tán condenándola conscientemente a la so desapaición. Yá nun valen más vueltes nin más ambigüedaes: o se ta cola llingua y la cultura d’Asturies o se ta por facela desapaecer.

En tou casu, la sociedá asturiana ha saber que l’Academia de la Llingua Asturiana siempres tará alliniada con aquelles persones ya instituciones que defenden el derechu a usar l’asturianu n’igualdá de condiciones que’l restu de les llingües oficiales del Estáu.

Uviéu, 24 de marzu de 2015

 

                                                         Academia de la Llingua Asturiana

 

 

La LOMCE, el currículu d’Asturies y la enseñanza de la Llingua Asturiana

Llueu de l’aprobación de la LOMCE (Llei Orgánica de Meyora de la Calidá Educativa), con fecha 9 d’avientu de 2013, correspuende a les Comunidaes Autónomes afayar, dientro de les sos llendes competenciales, los conteníos de la mesma.

Al marxe d’otres consideraciones sobre’l valir y el nivel de consensu de la mentada llei, hai que reconocer que la disposición adicional trixésimo octava afitaba per primer vegada les posibilidaes educatives de les llingües propies non oficiales de les Comunidaes del Estáu español:

«Aquelles Comunidaes Autónomes nes qu’haya llingües non oficiales con proteición llegal ufiertaránles, nel so casu, nel bloque d’asignatures de llibre configuración autonómica nos términos que determine la so normativa reguladora.»

La situación actual, a pocos meses d’entrada en vixencia de la llei (cursos 1u, 3u y 5u d’Educación Primaria del próximu cursu académicu 2014-2015), ufría una perbona oportunidá pa meyorar los calces d’escolarización de la Llingua Asturiana n’aspeutos como A) númberu d’hores d’impartición selmanal (1,5 hores anguaño, situación dafechu insuficiente pal deprendizax de les competencies qu’esta enseñanza lleva inxertes); B) posibilidá d’usar l’asturianu con calter parcialmente vehicular pa trabayar conteníos d’asignatures como Ciencies Sociales o Naturales; C) allugamientu con calter verdaderamente voluntariu de la Llingua Asturiana nel currículu, acordies col marcu llegal; etc.

Constatamos, ensin embargu, que tamos énte una nueva oportunidá perdida darréu que A) la llingua sigue calteniendo una dedicación horaria difícilmente defendible dende’l puntu de vista pedagóxicu (1,5 hores a la selmana); B) nun hai previsión del so emplegu pa trabayar conteníos rellacionaos con aspeutos hestóricos, culturales, medioambientales, xeográficos, artísticos… de la Comunidá Autónoma; o C) pierde, en fin, el so calter de voluntariedá pa tresformase nuna materia optativa que compite cola Cultura Asturiana, bloque de conocimientos que poles sos carauterístiques habría ser tresversal en tol currículu asturianu.

Con ser lo anterior grave pal futuru educativu del asturianu, alcontrámonos agora con posicionamientos, ensin dulda minoritarios, non yá anti-pedagóxicos, sinón claramente de resistencia a l’aceutación del marcu llegal de referencia: LOMCE y Llei d’Usu. A lo que paez, determinaos sectores, a lo meyor desinformaos o a lo meyor conscientes del so facer, pretenden acabar cola escolarización de la Llingua Asturiana queriendo facela competir con otres materies como, por exemplu, la segunda llingua estranxera. La LOMCE dexaba la posibilidá d’encaxar la enseñanza d’una segunda llingua estranxera ensin competencia coles llingües propies de les comunidaes, fueren o non oficiales. Poro, plantegar nesti momentu un falsu discutiniu Llingua Asturiana/Llingua Estranxera ye namái una xida oportunista, malintencionada y tendenciosa pa desaniciar les curties posibilidaes que tien la escolarización de la Llingua Asturiana.

L’Academia de la Llingua Asturiana; los sindicatos de la enseñanza SUATEA, CCOO y FETE-UXT; les organizaciones de pas y mas d’alumnos como FAPA «Miguel Virgós» y FAPAS Xixón; la Xunta Estudiantil Asturiana; el Sindicatu d’Estudiantes; les asociaciones cíviques Xunta pola Defensa de la Llingua Asturiana, Iniciativa pol Asturianu y «Reciella (Families pol Asturianu)» faen responsable al Gobiernu del Principáu d’Asturies y a la Conseyería d’Educación de la regulación y el determín que se tome con respeuto al asitiamientu curricular de l’asignatura de Llingua Asturiana y entienden que l’alternativa ufiertada Llingua Asturiana/Cultura Asturiana constitúi yá una rebaxa de la situación anterior y un escenariu de mínimos minimísimos. Darréu d’ello, toa decisión que vaya escontra esti escenariu ye inaceutable dafechu, tanto dende’l puntu de vista llegal como dende’l puntu de vista social y cultural.

Les instituciones y organizaciones que sofitamos esti documentu proclamamos la nuesa belixerancia escontra cualesquier intentu de facer competir al asturianu con una segunda llingua estranxera o con cualquier otra materia que nun seya la de Cultura Asturiana y damos anuncia, tanto al Gobiernu como a la sociedá asturiana, de qu’actuaremos en consecuencia con toes aquelles iniciatives sociales y ciudadanes que tean al nuesu algame pa parar un desatín como’l que dende dalgunes instancies se pretende.

Uviéu, a 20 díes andaos del mes de xunu de 2014.

Posición de l’ALLA ente’l procesu de tramitación del Decretu d’Especialidaes de Maestros del Ministeriu d’Educación

Como sabe la opinión pública asturiana y les fuerces polítiques parllamentaries de la Xunta Xeneral del Principáu d’Asturies, l’Academia de la Llingua Asturiana vien calteniendo cuantayá la necesidá de que’l profesoráu de Llingua Asturiana exerciente en centros públicos d’Educación Primaria y Secundaria cunte cola Especialidá docente de Llingua Asturiana. Tal especialidá ye la única garantía de qu’esti profesoráu pueda acceder, n’igualdá de condiciones que’l restu, a una estabilidá profesional pente medies de los pertinentes concursos d’oposición y treslláu. Ello significaría, al empar, un importante reblagu nel asitiamientu alministrativu del área de Llingua Asturiana dende’l puntu de vista organizativu y, mesmamente, dende la perspeutiva de la rentabilidá y axuste económicu nun momentu de crisis fonda como l’actual. Nun hai qu’escaecer, amás, que’l nivel de formación universitaria esixíu a esti profesoráu ye, agora y darréu de la puesta en práutica na Universidá de les directrices del Espaciu Européu d’Educación Superior (EEES), plenamente homologable al del restu de los coleutivos docentes. Pues bien, el Ministeriu d’Educación ta a puntu d’espublizar un nuevu Decretu d’Especialidaes pa Maestros nel que s’afita que “tendrán la consideranza d’especialidaes del cuerpu de Maestros les propies de la llingua co-oficial naquelles comunidaes autónomes qu’asina lo tuvieron reglao”. Magar esti enunciáu nun torga les posibidaes llegales de la llingua asturiana (nada se diz a la escontra de les llingües non oficiales), el sindicatu de profesores STES (representáu en Madrid por Vicent Esteve) plantegó apocayá al ME na mesa sectorial d’Educación una enmienda al articuláu pa que les llingües non oficiales, pero con especial proteición y presencia curricular oficial, pudieren ser, tamién, reconocíes como “especialidá docente”.

A lo que paez, la respuesta del Miguel Soler García (Direutor Xeneral de Formación Profesional del Ministeriu d’Educación) foi qu’ello nun yera necesario porque, puestos en contautu col Principáu d’Asturies, les autoridaes autonómiques asturianes refugaben esa especialidá.

De ser ello cierto, sedría un fechu gravísimu, non solo porque’l Gobiernu del Principáu d’Asturies taría faciendo una dexación ensin precedentes de les posibilidaes llegales de la enseñanza del asturianu, sinón tamién dende’l puntu de vista de les implicaciones que cinquen a la credibilidá del executivu asturianu, darréu que son xustamente los responsables educativos d’Asturies los qu’apregonen que tal especialidá nun pue facese porque “Madrid nun dexa”.

L’Academia, nesti sen y como muérganu tutelar de los derechos llingüísticos de los asturianos, da anuncia de que solicitará un aconceyamientu urxente cola Conseyería d’Educación del Gobiernu del Principáu y treslladará la so posición a toles fuerces polítiques parllamentaries, entamando pola FSA-PSOE, encamentando a toes elles qu’estes cuestiones seyan teníes en cuenta a la hora d’ellaborar los respeutivos programes eleutorales col envís de qu’esta llamentable situación alcuentre definitiva solución con marcu llegal y alministrativu estable y non discriminatoriu.

Uviéu, 21 de febreru de 2011

Valoración de l’ALLA de la propuesta de Decretu del Currículu d’Educación Secundaria

(Pautu de la Xunta de l’Academia del día 9 de marzu de 2007)

L’Academia de la Llingua Asturiana nun pue dexar de valorar mui negativamente’l conteníu de la propuesta de Decretu del Currículu d’Educación Secundaria obligatoria, fecha pola Conseyería d’Educación y Ciencia, no que cinca al tratamientu de la llingua asturiana. Y ello poles razones que vienen darréu:

  1. El calter d’optativa que se da a l’asignatura de Llingua asturiana y lliteratura esfrónase dafechu colo afitao na Llei d’Usu y Promoción del Asturianu que, como ye bien sabío, diz nel so artículu 10.3.:
    La escoyeta del estudiu o del emplegu del asturianu como asignatura del currículu en nengún casu podrá sirvir de motivu de discriminación de los alumnos.
    Pa los que lo escueyan, el so deprendimientu o usu nun podrá torgar que reciban la mesma formación y conocimientos n’igualdá de condiciones que’l restu del alumnáu.
    A la escontra d’esto, los alumnos y alumnes que cursen l’asignatura de llingua asturiana tendrán d’escoyer obligatoriamente ente les asignatures de “Llingua asturiana y lliteratura” y “Llingua estranxera” (art. 5.3.) nos dos primeros cursos de la ESO; en terceru, la escoyeta fairáse ente “Llingua asturiana y lliteratura”, “Segunda Llingua estranxera” y “Cultura clásica” (art. 6.4.); y en cuartu cursu los centros podrán ufrir, como alternativa a la llingua asturiana, “una materia de Iniciación profesional o, en su caso, de Empresa joven europea y una materia optativa de proyectos relacionados con los ámbitos científico-tecnológico, sociolingüístico y artístico” (art. 7.5.).
  2. Les 2 hores asignaes a l’asignatura de “Llingua asturiana y lliteratura” son insuficientes dafechu pa que se puean llevar alantre, con un mínimu de seriedá, los conteníos del currículu de Llingua asturiana y lliteratura pa la Educación Secundaria obligatoria de la propia Conseyería d’Educación y Ciencia del Principáu d’Asturies.
  3. Arriendes d’ello, l’Academia de la Llingua Asturiana, acordies asinamesmo colo afitao na Llei d’Usu, cuida que la llingua asturiana tien de ser llingua vehicular dientro de la Educación Secundaria Obligatoria, nun porcentax mínimu que dea seguranza de la so capacidá de conceptualización pa otra clas de deprendizaxes. Esto esixe tomar determín sobro les condiciones y les estayes de deprendizax más afayadices pa facer vidable la enseñanza n’asturianu al marxe de la so lóxica conceición como materia a deprender pol alumnáu.
    Poro, énte la grave discriminación que sufren los alumnos y alumnes de llingua asturiana, l’ALLA encamienta a los responsables de la Conseyería d’Educación y Ciencia que tomen les midíes precises pa que s’igüe esta situación y pa que l’inxerimientu de la llingua asturiana nel sistema educativu s’axuste a la llei.
  4. Camienta l’ALLA, a lo cabero, que los plantegamientos del área de Llingua castellana y lliteratura son arrémente ambiguos no que cinca a la consideración del asturianu como llingua. Difícilmente los alumnos sedrán a tener una perceición de que l’asturianu ye la llingua propia d’Asturies si namái algamen los conteníos y oxetivos que se planteguen dende l’área de llingua castellana. Nesti sen, ye esixible que’l currículu d’esta área esclarie nidiamente qu’Asturies ye una comunidá billingüe onde coesisten en desigualdá de condiciones xurídiques y sociales dos sistemes llingüísticos, el del asturianu, como llingua propia, y el del castellanu, llingua oficial de tol estáu.

Les dificultaes pa encadarmar amañosamente la llingua asturiana dientro del sistema educativu, tanto na Educación Primaria como na Secundaria, amuesen una vegada más la so precariedá llegal y que namái la oficialidá será a allugar correchamente l’asignatura nel ámbitu educativu y a garantizar el derechu de los alumnos y alumnes al so estudiu, conocimientu y usu.