La LOMCE, el currículu d’Asturies y la enseñanza de la Llingua Asturiana

Llueu de l’aprobación de la LOMCE (Llei Orgánica de Meyora de la Calidá Educativa), con fecha 9 d’avientu de 2013, correspuende a les Comunidaes Autónomes afayar, dientro de les sos llendes competenciales, los conteníos de la mesma.

Al marxe d’otres consideraciones sobre’l valir y el nivel de consensu de la mentada llei, hai que reconocer que la disposición adicional trixésimo octava afitaba per primer vegada les posibilidaes educatives de les llingües propies non oficiales de les Comunidaes del Estáu español:

«Aquelles Comunidaes Autónomes nes qu’haya llingües non oficiales con proteición llegal ufiertaránles, nel so casu, nel bloque d’asignatures de llibre configuración autonómica nos términos que determine la so normativa reguladora.»

La situación actual, a pocos meses d’entrada en vixencia de la llei (cursos 1u, 3u y 5u d’Educación Primaria del próximu cursu académicu 2014-2015), ufría una perbona oportunidá pa meyorar los calces d’escolarización de la Llingua Asturiana n’aspeutos como A) númberu d’hores d’impartición selmanal (1,5 hores anguaño, situación dafechu insuficiente pal deprendizax de les competencies qu’esta enseñanza lleva inxertes); B) posibilidá d’usar l’asturianu con calter parcialmente vehicular pa trabayar conteníos d’asignatures como Ciencies Sociales o Naturales; C) allugamientu con calter verdaderamente voluntariu de la Llingua Asturiana nel currículu, acordies col marcu llegal; etc.

Constatamos, ensin embargu, que tamos énte una nueva oportunidá perdida darréu que A) la llingua sigue calteniendo una dedicación horaria difícilmente defendible dende’l puntu de vista pedagóxicu (1,5 hores a la selmana); B) nun hai previsión del so emplegu pa trabayar conteníos rellacionaos con aspeutos hestóricos, culturales, medioambientales, xeográficos, artísticos… de la Comunidá Autónoma; o C) pierde, en fin, el so calter de voluntariedá pa tresformase nuna materia optativa que compite cola Cultura Asturiana, bloque de conocimientos que poles sos carauterístiques habría ser tresversal en tol currículu asturianu.

Con ser lo anterior grave pal futuru educativu del asturianu, alcontrámonos agora con posicionamientos, ensin dulda minoritarios, non yá anti-pedagóxicos, sinón claramente de resistencia a l’aceutación del marcu llegal de referencia: LOMCE y Llei d’Usu. A lo que paez, determinaos sectores, a lo meyor desinformaos o a lo meyor conscientes del so facer, pretenden acabar cola escolarización de la Llingua Asturiana queriendo facela competir con otres materies como, por exemplu, la segunda llingua estranxera. La LOMCE dexaba la posibilidá d’encaxar la enseñanza d’una segunda llingua estranxera ensin competencia coles llingües propies de les comunidaes, fueren o non oficiales. Poro, plantegar nesti momentu un falsu discutiniu Llingua Asturiana/Llingua Estranxera ye namái una xida oportunista, malintencionada y tendenciosa pa desaniciar les curties posibilidaes que tien la escolarización de la Llingua Asturiana.

L’Academia de la Llingua Asturiana; los sindicatos de la enseñanza SUATEA, CCOO y FETE-UXT; les organizaciones de pas y mas d’alumnos como FAPA «Miguel Virgós» y FAPAS Xixón; la Xunta Estudiantil Asturiana; el Sindicatu d’Estudiantes; les asociaciones cíviques Xunta pola Defensa de la Llingua Asturiana, Iniciativa pol Asturianu y «Reciella (Families pol Asturianu)» faen responsable al Gobiernu del Principáu d’Asturies y a la Conseyería d’Educación de la regulación y el determín que se tome con respeuto al asitiamientu curricular de l’asignatura de Llingua Asturiana y entienden que l’alternativa ufiertada Llingua Asturiana/Cultura Asturiana constitúi yá una rebaxa de la situación anterior y un escenariu de mínimos minimísimos. Darréu d’ello, toa decisión que vaya escontra esti escenariu ye inaceutable dafechu, tanto dende’l puntu de vista llegal como dende’l puntu de vista social y cultural.

Les instituciones y organizaciones que sofitamos esti documentu proclamamos la nuesa belixerancia escontra cualesquier intentu de facer competir al asturianu con una segunda llingua estranxera o con cualquier otra materia que nun seya la de Cultura Asturiana y damos anuncia, tanto al Gobiernu como a la sociedá asturiana, de qu’actuaremos en consecuencia con toes aquelles iniciatives sociales y ciudadanes que tean al nuesu algame pa parar un desatín como’l que dende dalgunes instancies se pretende.

Uviéu, a 20 díes andaos del mes de xunu de 2014.

L’ACADEMIA DE LA LLINGUA ASTURIANA CONDENA LA CONSCIENTE Y REITERADA DESCONSIDERACIÓN HACIA L’USU DEL ASTURIANU PER PARTE DEL ALCALDE DE NOREÑA

L’Academia de la Llingua Asturiana vien siguiendo con esmolición los continuos casos de discriminación llingüística que tán sufriendo los ciudadanos del Conceyu de Noreña a lo llargo d’estos años pola actitú del so alcalde, D. César Movilla, pa col usu de la llingua asturiana na vida diaria del conceyu.

La cabera decisión del alcalde de Noreña de refugar la petición d’un coleutivu de “Paraos y Precarios de Siero y Noreña” por tar redactada n’asturianu, ye una vegada más una falta de respetu hacia la llingua y la cultura asturiana –ya inda más, hacia’l propiu derechu de los ciudadanos del conceyu a usar la llingua d’Asturies–. N’efeutu, refugar el mentáu escritu cola xida de tener que tar “redactada en castellano, lengua oficial de esta Comunidad Autónoma”, da cuenta perfeutamente del allugamientu, oxetivamente anti-asturianu, del Sr. Alcalde y del so desconocimientu del marcu xurídicu qu’ampara’l derechu de los ciudadanos al llibre usu de la llingua asturiana.

L’Academia de la Llingua Asturiana treslladó a la FSA-PSOE (partíu al que pertenez l’alcalde) la so más fonda preocupación y perplexidá énte esti nuevu atropellu a la llingua asturiana y encamentó-y poner igua a una actuación que, con toa xusticia, podría calificase de pre-constitucional y antiestatutaria.

Uviéu, 29 de xineru de 2014

Énte l’usu de la llingua asturiana nes Eleiciones Xenerales del 20-N

L’Academia de la Llingua Asturiana, enterada de los problemes xurdíos col emplegu del asturianu per parte d’aquellos ciudadanos asturianos que quieran exercer el so derechu al votu emplegando esta llingua, problemes que vienen siendo denunciaos pol grupu políticu «Andecha Astur», quier treslladar a la opinión pública asturiana y española’l so más fondu rechazu énte les actitúes discriminatories que de contino vien sufriendo l’idioma de los asturianos en cada ocasión en qu’ésti quier ser usáu en situaciones d’especial relevancia política y alministrativa.

L’Academia de la Llingua Asturiana, darréu de la situación anterior y acordies col so mandáu estatutariu de mirar polos derechos llingüísticos de la asturianos, vese na necesidá de encamentar cola mayor enerxía a la Xunta Electoral Provincial que faiga los mandaos afayadizos pa qu’esa situación d’anormalidá pa col asturianu se corrixa urxentemente.

L’Academia de la Llingua Asturiana fai alcordanza, a lo cabero, de que situaciones como éstes sedríen impensables nuna situación de oficialidá de la llingua de los asturianos. Poro, píde-y a la Xunta Xeneral del Principáu y a les fuerces polítiques que nella s’alluguen que, d’una vegada, s’apauten p’algamar un estatus definitivu d’oficialización del nuesu vieyu idioma

Uviéu, 16 de payares de 2011

Academia de la Llingua Asturiana

L’Academia de la Llingua Asturiana llamenta y condena la marxinación al asturianu del conceyu de Noreña.

L’Academia de la Llingua Asturiana, enterada de la decisión del alcalde de Noreña, D. César Movilla, de refugar y retirar del orde del día del Plenu de güei una moción del grupu políticu “Conceyu Abiertu”, sobro la ponte ferroviaria de Rebalde (patrimoniu industrial asturianu de mediaos del sieglu XIX) por “tar redactada n’asturianu”, quier treslladar a la opinión pública asturiana la so más fonda esmolición énte la falta de respetu qu’amuesa’l rexidor noreñense hacia la llingua y la cultura asturiana ya, inda más, hacia’l propiu derechu de los ciudadanos del conceyu a usar la llingua d’Asturies.

N’efeutu, refugar la mentada moción cola xida de problemes “reglamentarios” da cuenta perfeutamente del allugamientu, oxetivamente anti-asturianu, del Sr. Alcalde y tresllada a la sociedá asturiana, una vegada más, la necesidá de d’atayar situaciones como les descrites pente medies del reconocimientu del asturianu como llingua oficial n’igualdá de condiciones que’l restu de llingües del Estáu.

L’Academia de la Llingua Asturiana ye sabedora que l’afitamientu de la oficialidá requier del consensu mayoritariu na Xunta Xeneral del Principáu y, darréu d’ello, de la reforma del Estatutu d’Autonomía d’Asturies. Poro, píde-y al Gobiernu del Principáu que llidere esi procesu de reconocimientu xurídicu del asturianu y qu’actúe (mentantu esa figura llegal nun seya plenamente efeutiva) afalando calces de dignificación y de planificación llingüística que, acordies col marcu alministrativu vixente, enconten l’usu del asturianu en toles instituciones del País.

Uviéu, a 9 d’agostu de 2011.

Academia de la Llingua Asturiana.

Posición de l’ALLA ente’l procesu de tramitación del Decretu d’Especialidaes de Maestros del Ministeriu d’Educación

Como sabe la opinión pública asturiana y les fuerces polítiques parllamentaries de la Xunta Xeneral del Principáu d’Asturies, l’Academia de la Llingua Asturiana vien calteniendo cuantayá la necesidá de que’l profesoráu de Llingua Asturiana exerciente en centros públicos d’Educación Primaria y Secundaria cunte cola Especialidá docente de Llingua Asturiana. Tal especialidá ye la única garantía de qu’esti profesoráu pueda acceder, n’igualdá de condiciones que’l restu, a una estabilidá profesional pente medies de los pertinentes concursos d’oposición y treslláu. Ello significaría, al empar, un importante reblagu nel asitiamientu alministrativu del área de Llingua Asturiana dende’l puntu de vista organizativu y, mesmamente, dende la perspeutiva de la rentabilidá y axuste económicu nun momentu de crisis fonda como l’actual. Nun hai qu’escaecer, amás, que’l nivel de formación universitaria esixíu a esti profesoráu ye, agora y darréu de la puesta en práutica na Universidá de les directrices del Espaciu Européu d’Educación Superior (EEES), plenamente homologable al del restu de los coleutivos docentes. Pues bien, el Ministeriu d’Educación ta a puntu d’espublizar un nuevu Decretu d’Especialidaes pa Maestros nel que s’afita que “tendrán la consideranza d’especialidaes del cuerpu de Maestros les propies de la llingua co-oficial naquelles comunidaes autónomes qu’asina lo tuvieron reglao”. Magar esti enunciáu nun torga les posibidaes llegales de la llingua asturiana (nada se diz a la escontra de les llingües non oficiales), el sindicatu de profesores STES (representáu en Madrid por Vicent Esteve) plantegó apocayá al ME na mesa sectorial d’Educación una enmienda al articuláu pa que les llingües non oficiales, pero con especial proteición y presencia curricular oficial, pudieren ser, tamién, reconocíes como “especialidá docente”.

A lo que paez, la respuesta del Miguel Soler García (Direutor Xeneral de Formación Profesional del Ministeriu d’Educación) foi qu’ello nun yera necesario porque, puestos en contautu col Principáu d’Asturies, les autoridaes autonómiques asturianes refugaben esa especialidá.

De ser ello cierto, sedría un fechu gravísimu, non solo porque’l Gobiernu del Principáu d’Asturies taría faciendo una dexación ensin precedentes de les posibilidaes llegales de la enseñanza del asturianu, sinón tamién dende’l puntu de vista de les implicaciones que cinquen a la credibilidá del executivu asturianu, darréu que son xustamente los responsables educativos d’Asturies los qu’apregonen que tal especialidá nun pue facese porque “Madrid nun dexa”.

L’Academia, nesti sen y como muérganu tutelar de los derechos llingüísticos de los asturianos, da anuncia de que solicitará un aconceyamientu urxente cola Conseyería d’Educación del Gobiernu del Principáu y treslladará la so posición a toles fuerces polítiques parllamentaries, entamando pola FSA-PSOE, encamentando a toes elles qu’estes cuestiones seyan teníes en cuenta a la hora d’ellaborar los respeutivos programes eleutorales col envís de qu’esta llamentable situación alcuentre definitiva solución con marcu llegal y alministrativu estable y non discriminatoriu.

Uviéu, 21 de febreru de 2011