Allugamientu de l’Academia de la Llingua Asturiana énte la propuesta presupuestaria del Gobiernu d’Asturies en rellación cola llingua asturiana, o la imposibilidá de facer política llingüística ensin presupuestu económicu que la sofite

L’Academia de la Llingua Asturiana, llueu de conocer pelos medios de comunicación la propuesta presupuestaria destinada al asturianu que’l Gobiernu d’Asturies acaba d’unviar a la Xunta Xeneral del Principáu, quier treslladar a la opinión pública la so más fonda deceición pol conteníu de la mesma.

N’efeutu, les espeutatives yeren otres darréu del pautu d’investidura algamáu ente la FSA-PSOE ya IX, tamién tres la proposición non de llei aprobada (a mediaos d’ochobre pasáu) mayoritariamente nel parllamentu asturianu colos votos favoratibles d’IX, PSOE, Foro y Podemos, asina como dempués del alcuerdu presupuestariu pal exerciciu viniente ente’l Gobiernu d’Asturies y el grupu parllamentariu d’IX.

Plantegar que se pue facer política llingüística con un presupuestu de 1.500.000 d’euros (esto ye, 1,5 euros por asturianu) ye daqué ofensible pa toles persones con una mínima sensibilidá llingüística y cultural asturiana. Da que pensar, nesti sen, el fechu de qu’otres comunidaes con llingua propia, ente elles les que menos dediquen a política llingüística, s’estremen tanto de la propuesta asturiana. Asina -y al marxe de partíes económiques concretes destinaes a educación, vida parllamentaria, xestión de diputaciones y universidaes, etc.- Galicia y Valencia tripliquen por persona’l presupuestu asturianu; Baleares cuadriplícalu; y Navarra, pa cuasi la mitá de población qu’Asturies y con una proporción d’usuarios de la llingua autóctona que nun sobrepasa’l 10% de la población, dedica a política llingüística 4.000.000 d’euros. Too ello por nun falar del presupuestu destináu a la proteición del aranés que, cenciellamente, multiplica por 10 euros el presupuestu por persona n’Asturies.

Na nuesa comunidá, llueu de lo anterior, faise dafechu imposible falar de recuperación llingüística -y mesmamente de política llingüística favoratible- cuando se cunta con unos recursos tan escandalosamente insuficientes. Ye verdá qu’hai midíes que dependen esclusivamente de la voluntá política de los xestores institucionales y que puen facese a coste cero (por exemplu, les rotulaciones de nueves instancies y servicios públicos cuesten tanto n’asturianu como en castellanu, espublizar un anunciu institucional nos medios de comunicación cuesta lo mesmo n’asturianu qu’en castellanu, etc.), pero ye verdá qu’hai otres munches midíes que nun se puen llevar alantre, nin n’Asturies nin en dengún otru sitiu, si nun van acompañaes del encontu económicu que les faiga creyibles.

Esta ye la llaceriosa situación cola que nos atopamos agora na tramitación parllamentaria de los presupuestos. ¿Qué facer, entós? Pues, en primer llugar, llamar l’atención sobre estos fechos pa de nengún mou se puea repitir situación asemeyada n’años venideros y, sobre too, actuar agora mesmo, nel intre, faciendo ver a los partíos políticos que llevaron nos sos programes midíes concretes de política llingüística la necesidá de plantegar enmiendes parciales a los presupuestos del 2015 que meyoren les partíes económiques destinaes a la llingua y cultura d’Asturies.

Ye obligación de l’Academia de la Llingua Asturiana denunciar una situación oxetivamente inxusta y fondamente discriminatoria, una vegada más, pa la llingua asturiana y pidir a los partíos políticos con representación na Xunta Xeneral del Principáu d’Asturies qu’igüen una situación que nos avergoña como asturianos.

Uviéu, a 30 díes andaos del mes de payares de 2015.

ACADEMIA DE LA LLINGUA ASTURIANA

Posición de l’Academia de la Llingua Asturiana énte l’alcuerdu PSOE-IX pa la investidura del Presidente del Principáu

Conocíu’l conteníu del alcuerdu PSOE-IX pa la investidura del próximu Presidente del Principáu d’Asturies, l’Academia de la Llingua Asturiana quier treslladar a la sociedá asturiana lo que vien darréu en rellación col apartáu referíu a la “Institucionalidá, identidá y cultura d’Asturies”:
1) L’ALLA llamenta dafechamente’l conteníu del citáu pautu no que fai a la llingua y a la cultura d’Asturies y cuida que ye otra vuelta una oportunidá perdida pa iguar d’una vez el futuru de la llingua asturiana y garantizar los derechos llingüísticos de tolos asturianos y asturianes.
2) De ninguna de les maneres el curtiu y ruin conteníu del pautu respuende a les necesidaes y espeutatives de la sociedá asturiana.
3) De ninguna de les maneres se xustifica que llueu de más de 30 años de reivindicación llingüística –con una llingua perfechamente normativizada y reconocida internacionalmente, y con una sociedá preparada pa la so normalización social a tolos efeutos–, el compromisu seya la creación d’una comisión d’estudiu sobre’l réxime de proteición del asturianu y la meyora de la Llei d’Usu y Proteición. Y ello, porque a) cuando lo que se quier ye –como nesti casu– nun solucionar el problema, lo que se fai ye nomar una comisión y solicitar informes. ¿Cuántos van solicitaos y fechos, por exemplu, sobre la reconocencia de la Especialidá Docente del profesoráu de Llingua Asturiana? Y b) porque la Llei d’Usu y Promoción, que como persabemos nin se respeta nin se cumple en nengún de los sos apartaos, nun almite más meyora que la reforma del Estatutu d’Autonomía p’Asturies y la declaración de cooficialidá de la llingua asturiana.
4) Una vegada más trátase de vaguedaes y de pallabres vaques que nun empobinen a nengún llau y que nun faen otro qu’aplazar y dexar pa más tarde la solución a ún de los problems más serios que carez la democracia d’esti país de magar la transición.
5) L’ALLA da anuncia de que, acordies col discursu institucional del caberu Día de les Lletres, treslladará nel próximu mes de setiembre a toles fuercies polítiques representaes na Xunta Xeneral y al Gobiernu asturianu una propuesta concreta de cooficialidá axustada a les necesidaes y carauterístiques de la sociedá asturiana. La cooficialidá de la llingua asturiana ye pa nós irrenunciable y enxamás dexaremos de trabayar y lluchar por ella.

Uviéu, 15 díes andaos del mes de xunetu de 2015

ACADEMIA DE LA LLINGUA ASTURIANA

Enseñanza del asturianu: especialidá docente, currículu escolar y oficialidá

L’Academia vien siguiendo con perxustificada alarma les noticies qu’estos caberos meses y díes arrodien la enseñanza de la Llingua Asturiana nes estremaes estayes educatives. Ente otres:

  1. La negativa del Ministeriu d’Educación a inxerir nel Decretu d’Especialidaes Docentes la posibilidá de que la materia «Llingua Asturiana» pudiere ser una de les especialidaes pal profesoráu d’Educación Primaria y Secundaria. Y ello magar cuente con una enmienda del propiu Conseyu Escolar del Estáu que reclama tal posibilidá. Esta negativa ye, lóxicamente, responsabilidá del Ministeriu, pero tamién de la Conseyería d’Educación y Cultura d’Asturies que nun fexo por negociar al máximu nivel les condiciones de la petición.
  1. La inxustificable y allegal propuesta de la Conseyería d’Educación del Gobiernu d’Asturies p’allugar l’asignatura «Llingua Asturiana» dientro de la Educación Secundaria nunes condiciones d’optatividá –y competencia desigual– con 4 materies: Segunda Llingua Estranxera, Cultura Clásica, Aniciu a l’Actividá Entamadora y Empresarial y Materia Propuesta pol centru docente. Persabe’l Gobiernu d’Asturies qu’esto incumple dafechu l’artículu 10 de la Llei d’Usu del Asturianu, xustamente’l dedicáu al currículu, que diz:

3. La escoyeta del estudiu o del emplegu del bable/asturianu como asignatura del currículu en nengún casu podrá servir de motivu de discriminación de los alumnos.

Pa los que lo escueyan, el so aprendimientu o usu nun podrá torgar que reciban la mesma formación y conocimientos n’igualdá de condiciones que’l restu del alumnáu.

  1. La risible ya insultante decisión, tamién de l’alministración educativa n’Asturies, de camentar que l’asturianu pue deprendese nel Bachilleratu rebaxando de 4 a 1 hora selmanal la so docencia nunes condiciones d’axuste, amás, práuticamente imposibles pal alumnáu.

L’Academia entiende que nel tresfondu de toa esta llamentable situación ta la testona realidá de que l’asturianu ye la única llingua del estáu español non oficial. Esto nun almite duldes. De fechu, cuando’l Ministeriu refuga la especialidá pon como xida que l’asturianu nun ye oficial; y asina mesmo cuando la Conseyería nun ye a alcontrar el llugar qu’a la Llingua Asturiana-y correspondería nun currículu normal pa una comunidá billingüe, el problema, na práutica, vien a ser exautamente’l mesmu.

Y ye qu’equí, n’Asturies, intenta facese daqué imposible, xurídica y socialmente: caltener una llingua y una cultura al marxe del marcu constitucional de referencia que ye la oficialización. Esti ye’l camín lóxicu que siguieron los gallegos, los vascos, los navarros, los catalanes, los baleares y los araneses.

Tamos diciendo, en fin, que la hestoria de más de 3 décades amuesa que cualquier pasu llegal que represente un encontu oxetivu pal caltenimientu del asturianu como llingua de cultura n’Asturies esfrónase de contino escontra’l fechu de que l’idioma de los asturianos nun ye oficial. Y esto han sabelo los partíos políticos asitiaos n’Asturies, de mou qu’agora que tamos en plenu periodu pre-ellectoral tienen que ser conscientes de que si nun planteguen y negocien la co-oficialidá de la llingua asturiana tán condenándola conscientemente a la so desapaición. Yá nun valen más vueltes nin más ambigüedaes: o se ta cola llingua y la cultura d’Asturies o se ta por facela desapaecer.

En tou casu, la sociedá asturiana ha saber que l’Academia de la Llingua Asturiana siempres tará alliniada con aquelles persones ya instituciones que defenden el derechu a usar l’asturianu n’igualdá de condiciones que’l restu de les llingües oficiales del Estáu.

Uviéu, 24 de marzu de 2015

 

                                                         Academia de la Llingua Asturiana

 

 

Especialidá docente Llingua Asturiana

LLAR_ALLA

La especialidá docente de Llingua Asturiana y  l’actuación del Gobiernu del Principáu d’Asturies

Ayeri, miércoles 14, el Ministeriu d’Educación convocó en Madrid a la Conferencia Sectorial d’Educación pa conocer, ente otres cuestiones, la opinión de les Comunidaes Autónomes al rodiu del Proyeutu de Decretu de les Especialidaes Docentes d’Educación Secundaria.

Asturies, a la escontra d’otres comunidaes, nun tuvo representada pola Conseyera d’Educación, sinón pola recién nomada Direutora Xeneral de Desarrollu Curricular ya Innovación Educativa, Dª Victorina Fernández. Ye xustamente esta la que tresmite, como resultáu de la so xestión, la negativa del ministru Wert a reconocer la especialidá docente de Llingua Asturiana pal profesoráu d’asturianu d’Educación Secundaria.

Darréu de lo anterior, l’Academia de la Llingua Asturiana, cumpliendo’l so deber institucional de tutela de los derechos llingüísticos de los asturianos, quier manifestar lo siguiente:

  1. Ye inconcebible dafechu que’l profesoráu de Llingua Asturiana de toles estayes educatives tenga una formación universitaria oficial y homologable a la del restu de profesionales docentes y nun tenga, ensin embargu, reconocida la especialidá pa poder participar en concursos d’oposición o tresllaos n’igualdá de condiciones que les de los otros coleutivos docentes.
  2. Ye llamentable que la defensa de la petición asturiana nun se fixere al nivel de la importancia que correspuende a esta demanda histórica del sistema educativu n’Asturies. L’Academia alvirtió a la Sra. Conseyera, reiteradamente y en tiempu, nel sen de qu’un tema tan delicáu como esti esixía una xestión personal y decidida de la propia titular de la Conseyería.
  3. Ye una gran inxenuidá –o otra cosa– camentar que’l Ministeriu va dicir que sí, de mano, ensin una negociación fecha con convicción per parte del Gobiernu d’Asturies, na que s’argumente con datos educativos (alumnáu, centros, profesores, etc. a los qu’afecta esta decisión) la necesidá de la demanda.
  4. Ye inconcebible que’l Gobiernu del Principáu d’Asturies se conforme con un «non» –con que «Wert dixo non»–. Esta primer negativa nun tien por qué ser definitiva, sinón qu’hai que siguir negociando y argumentando pa que’l Ministeriu entre en razón y rectifique.

L’Academia, llueu de lo anterior, entiende que de nengún mou se pue dar por zarrada esta cuestión, sinón que’l Gobiernu d’Asturies, al máximu nivel, ye dicir la Sra. Conseyera d’Educación o, inclusive, el Sr. Presidente del Principáu, D. Javier Fernández, tien que retomar la iniciativa y solicitar, con calter d’urxencia, un alcuentru específicu y billateral col Ministeriu pa solucionar definitivamente esta cuestión. Esto ye una responsabilidá del Gobiernu d’Asturies y nun pue haber equí dexación de funciones.

L’Academia de la Llingua Asturiana, nel so casu, ufiértase pa participar nesti alcuentru (Ministeriu-Principáu) pa encontar téunicamente la discusión y ver de llograr una redaición afayadiza del Decretu d’Especialidaes que respete los intereses profesionales del profesoráu de Llingua Asturiana.

 

Uviéu, 15 de xineru de 2015

Academia de la Llingua Asturiana

Actu d’homenax Ramos Corrada

Ayeri 17 d’avientu, l’Academia de la Llingua Asturiana celebró l’actu d’homenax  na alcordanza del profesor D. Miguel Ramos Corrada, vicepresidente de l’ALLA, a les 7:00 de la tarde, na sala de conferencies del Antiguu Institutu Xovellanos de Xixón.

Nel actu intervinieron:

  • D. Carlos Rubiera Tuya, Conceyal d’Educación, Cultura, Mocedá y Fiestes del Conceyu de Xixón.
  • D. Mario Menéndez Fernández, Coordinador del Centru d’Orientación, Información y Empléu de la UNED n’Asturies.
  • Dña. Ana María Fueyo Llaneza, Direutora Xeneral de Política Llingüística del Gobiernu del Principáu d’Asturies.
  • D. Vicente Gotor Santamaría, Rector de la Universidá d’Uviéu.
  • Dña. Ana Mª Cano González, Presidenta de l’Academia de la Llingua Asturiana.

Nesta xornada institucional presentóse’l llibru Estudios lliterarios y otros trabayos, obra que recueye’l so llabor como máximu especialista que foi de la Lliteratura Asturiana.