Xunta con representantes de Miranda del Douro

El presidente de la Cámara Municipal de Miranda del Douro, Artur Nunes, xunto col vicepresidente de l’Associaçon de la Lhéngua i Cultura Mirandesa, Mario Correia, tuvieron esti miércoles 23 d’avientu una xunta de trabayu cola direición de l’Academia de la Llingua Asturiana nel llar de la institución.

Nesta xunta tratáronse importantes aspeutos venceyaos a la collaboración ente les dos instituciones, darréu del pautu robláu’l pasáu 20 de xunu en Miranda del Douro. L’axenda d’actividaes comunes pal exerciciu 2016 daráse a conocer en próximes feches.

Allugamientu de l’Academia de la Llingua Asturiana énte la propuesta presupuestaria del Gobiernu d’Asturies en rellación cola llingua asturiana, o la imposibilidá de facer política llingüística ensin presupuestu económicu que la sofite

L’Academia de la Llingua Asturiana, llueu de conocer pelos medios de comunicación la propuesta presupuestaria destinada al asturianu que’l Gobiernu d’Asturies acaba d’unviar a la Xunta Xeneral del Principáu, quier treslladar a la opinión pública la so más fonda deceición pol conteníu de la mesma.

N’efeutu, les espeutatives yeren otres darréu del pautu d’investidura algamáu ente la FSA-PSOE ya IX, tamién tres la proposición non de llei aprobada (a mediaos d’ochobre pasáu) mayoritariamente nel parllamentu asturianu colos votos favoratibles d’IX, PSOE, Foro y Podemos, asina como dempués del alcuerdu presupuestariu pal exerciciu viniente ente’l Gobiernu d’Asturies y el grupu parllamentariu d’IX.

Plantegar que se pue facer política llingüística con un presupuestu de 1.500.000 d’euros (esto ye, 1,5 euros por asturianu) ye daqué ofensible pa toles persones con una mínima sensibilidá llingüística y cultural asturiana. Da que pensar, nesti sen, el fechu de qu’otres comunidaes con llingua propia, ente elles les que menos dediquen a política llingüística, s’estremen tanto de la propuesta asturiana. Asina -y al marxe de partíes económiques concretes destinaes a educación, vida parllamentaria, xestión de diputaciones y universidaes, etc.- Galicia y Valencia tripliquen por persona’l presupuestu asturianu; Baleares cuadriplícalu; y Navarra, pa cuasi la mitá de población qu’Asturies y con una proporción d’usuarios de la llingua autóctona que nun sobrepasa’l 10% de la población, dedica a política llingüística 4.000.000 d’euros. Too ello por nun falar del presupuestu destináu a la proteición del aranés que, cenciellamente, multiplica por 10 euros el presupuestu por persona n’Asturies.

Na nuesa comunidá, llueu de lo anterior, faise dafechu imposible falar de recuperación llingüística -y mesmamente de política llingüística favoratible- cuando se cunta con unos recursos tan escandalosamente insuficientes. Ye verdá qu’hai midíes que dependen esclusivamente de la voluntá política de los xestores institucionales y que puen facese a coste cero (por exemplu, les rotulaciones de nueves instancies y servicios públicos cuesten tanto n’asturianu como en castellanu, espublizar un anunciu institucional nos medios de comunicación cuesta lo mesmo n’asturianu qu’en castellanu, etc.), pero ye verdá qu’hai otres munches midíes que nun se puen llevar alantre, nin n’Asturies nin en dengún otru sitiu, si nun van acompañaes del encontu económicu que les faiga creyibles.

Esta ye la llaceriosa situación cola que nos atopamos agora na tramitación parllamentaria de los presupuestos. ¿Qué facer, entós? Pues, en primer llugar, llamar l’atención sobre estos fechos pa de nengún mou se puea repitir situación asemeyada n’años venideros y, sobre too, actuar agora mesmo, nel intre, faciendo ver a los partíos políticos que llevaron nos sos programes midíes concretes de política llingüística la necesidá de plantegar enmiendes parciales a los presupuestos del 2015 que meyoren les partíes económiques destinaes a la llingua y cultura d’Asturies.

Ye obligación de l’Academia de la Llingua Asturiana denunciar una situación oxetivamente inxusta y fondamente discriminatoria, una vegada más, pa la llingua asturiana y pidir a los partíos políticos con representación na Xunta Xeneral del Principáu d’Asturies qu’igüen una situación que nos avergoña como asturianos.

Uviéu, a 30 díes andaos del mes de payares de 2015.

ACADEMIA DE LA LLINGUA ASTURIANA

Xunta con representantes de Miranda de l Douro

Esti miércoles, 29 d’abril, tuvo llugar nel llar de l’Academia de la Llingua Asturiana una xunta de trabayu ente esta institución y una delegación de Miranda de l Douro encabezada pol presidente de la Cámara Municipal de Miranda de l Douro, Artur Nunes, xunto col presidente de l’Associaçon de la Lhéngua i Cultura Mirandesa, Carlos Ferreira, y los vicepresidentes d’esta asociación Alfredo Cameirão y Mario Correia.
Nesta xunta tratáronse dellos aspeutos venceyaos a la collaboración ente les instituciones y apautóse la robla d’un Conveniu de collaboración el próximu 20 de xunu de 2015 en Miranda de l Douro.

XXXVI Día de les Lletres Asturianes

El próximu vienres, día 8 de mayu, va celebrase’l XXXVI Día de les Lletres Asturianes a les 20,30 hores nel Teatru Campoamor d’Uviéu.
Nesti actu l’Academia de la Llingua Asturiana quier facer reconocencia pública del llabor de la XUNTA POLA DEFENSA DE LA LLINGUA ASTURIANA por 30 años de llucha pola Oficialidá de la nuesa llingua.
Esta Xunta Estraordinaria de l’Academia de la Llingua Asturiana finará col discursu institucional de la presidenta, Dª Ana María Cano González.
L’actu, como ye davezu, tará presentáu por Sonia Avellaneda y Próspero Morán, y cuntará con un entamu musical a cargu de la gaitera ANDREA JOGLAR. Como pieslle tendrá llugar l’actuación del grupu AL SON D’AMIEVA.