Secretaría Llingüística del Navia-Eo


En 1995, por alcuerdu del Conseyu de Gobiernu del Principáu d’Asturies, apruébase la reforma de los Estatutos de l’Academia de la Llingua Asturiana, nuna versión que recoyía «a tolos efeutos, l’Academia de la Llingua Asturiana ha promover y velar pola variante llingüística gallego-asturiana o astur-galaica» (art. 1.k de los Estatutos de l’ALLA de 1995).

Pa cumplir el mandáu estatutariu, l’Academia de la Llingua Asturiana acordó crear en 1996 la Secretaría Llingüística del Navia-Eo, qu’asume como modelu d’escritura la Proposta de normas ortográficas y morfolóxicas del gal(l)ego-asturiano, fecha por un grupu de profesores y llingüistes de los conceyos del Navia-Eo y espublizada pola Conseyería d’Educación, Cultura, Deportes y Mocedá en 1993. Nel añu 2007, l’ALLA fixo una segunda edición de la obra, yá col títulu Normas ortográficas y morfolóxicas del gallego-asturiano.


En 2021, con una nueva igua de los Estatutos de l’Academia, la Secretaría Llingüística del Navia-Eo y el llabor que vien faciendo garren continuidá d’esti xeitu: «A tolos efeutos l’Academia promoverá y mirará pol exerciciu de los derechos de les persones qu’empleguen el gallego-asturianu. Al traviés de la Secretaría Llingüística del Navia-Eo, la institución contribuyirá a la estandarización y normalización d’esta llingua» (art. 2.2k de los Estatutos de l’ALLA de 2021).


Funciones y llabores

  • Con un pesu bien importante na Secretaría, el trabayu editorial respuende a una de les necesidaes más urxentes del eonaviegu: que los falantes puedan disponer de publicaciones diverses, de calidá y con adautación a la norma que la propia comunidá llingüística, docente y lliteraria escoyó. Aparte de la revista «Entrambasauguas» (1996) —que recueye, con artículos de caráuter divulgativu, munchos aspeutos sociales, históricos, culturales y lliterarios referíos a los conceyos eonaviegos— y de les coleiciones «Os llibros d’Entrambasauguas» (1998) —que nació col oxetivu de cubrir otros ámbitos, atendiendo principalmente al investigador, al lliterariu y a los dos testos y materiales para la escolarización— y «Bidureira» (2022) —cola que s’entama un nuevu Camín d’especifidá pa la lliteratura eonaviega—, hai otres obres d’interés especializáu del Navia-Eo dientro de la xera editorial de l’Academia en coleiciones como «Preseos», «Estaya Sociollingüística» o «Llibrería Llingüística» o nes revistes «Cultures», «Lletres Asturianes» y «Lliteratura».  



  • Igual d’importante ye la xera formativa, con dos focos d’interés principales. Per un llau, l’Academia de la Llingua Asturiana, por mandáu de la Conseyería d’Educación del Principáu d’Asturies, al traviés d’esta Secretaría, vienen organizando dende 2001 un «Curso de Capacitación en Eonaviego ou Gallego-Asturiano» pal profesoráu d’Educación Primaria y Secundaria. Iguáu en tres fases y con profesores especialistes del Navia-Eo, celébrase dientro de los cursos de la Universidá Asturiana de Branu (UABRA). Per otru llau, la formación d’adultos tamién ye un esmolecimientu de la Secretaría, habilitando, yá en 2005, un sistema de cursos d’alfabetización n’eonaviegu, al que pueden acoyese instituciones y asociaciones culturales de la zona, pa organizar, xunto cola Secretaría, programes formativos básicos onde trabayar la normalización escrita, pero tamién los aspectos culturales, lliterarios y sociollingüísticos del Navia-Eo.


  • Complementariamente, el trabayu de promoción de la investigación articúlase, amás de cola celebración de les «Sesióis d’Estudio» (1998, 2005 y 2012) —onde especialistes de delles materies vienen esponiendo les sos conclusiones sobre los temes más diversos en rellación col Navia-Eo—, cola participación d’investigadores eonaviegos n’otres actividaes científiques como les «Xornaes Internacionales d’Estudiu» o los concursos de l’Academia de la Llingua Asturiana. Dende 2019 tán en marcha los trabayos lexicográficos pa la ellaboración del diccionariu normativu d’eonaviegu y nel añu 2021 desendolcóse y espublizóse la III Encuesta Sociollingüística del Navia-Eo.


  • Esta Secretaría, dientro de les sos posibilidaes, ta abierta a otres collaboraciones interinstitucionales a favor de la normalización social de la llingua, como pueden ser l’asesoramientu llingüísticu o la participación en campañes de promoción, concursos escolares y lliterarios o n’otros actos dirixíos a la conocencia y la dignificación del eonaviegu.


Allugamientu

Cai l’Águila, 10

33003, Uviéu

Asturies

Teléfonu

+34 985 21 18 37

Alministración: estensión 1

Edición y biblioteca: estensión 2

Unvios postales

Apartáu de correos 574

33080, Uviéu 

Asturies

Nós

L’Academia de la Llingua Asturiana ye la institución creada en 1980 pol Gobiernu d’Asturies pal estudiu, la promoción y la defensa del asturianu y l’eonaviegu.