Historia de la Lliteratura Asturiana

Historia_Lliteratura

Ensin cayer nos plantegamientos románticos, esta Historia de la Lliteratura Asturiana pretende ser una seña propia y una muestra del patrimoniu cultural del nuesu pueblu. Tien de sirvir, ente otres coses, pa dexar bien claro que la llingua asturiana foi quien a crear una tradición lliteraria propia y autóctona, interrellacionada con otres del entornu, tradición que vien perviviendo dende’l sieglu xvii con unes formes, unos modelos y discursos que ye conveniente conocer y gociar porque son una manifestación del llabor artísticu del nuesu pueblu.

Gracies a coleiciones como «Cartafueyos de lliteratura escaecida» o «Llibrería facsimilar», el material que s’afaya a la nuesa disposición ye talo que l’Academia de la Llingua Asturiana atalanta qu’esti ye’l momentu oportunu pa ponese manes a la obra y sacar alantre una historia de la lliteratura asturiana, de lo escrito en llingua asturiana, completa, magar qu’entovía nun puea ser exhaustiva, ensin enfotos eruditos, pero que seya quien a esplicar los fenómenos dominantes y carauterísticos de la nuesa serie lliteraria, asina como les causes de los mesmos, y too ello rellacionándolo col marcu nel que se producen y col restu de les series lliteraries peninsulares. Queda, ensin embargu, una delda pendiente cola lliteratura mirandesa y la que se fai n’otros llugares, allende’l cordal, del dominiu astur; esperamos qu’esa delda puea dir saldándose con trabayos ya investigaciones posteriores.

Anexos:

 

  • Historia de la Lliteratura Asturiana, Índiz y Entamu [ABRIR]