Xunta del Presidente de l’ALLA y el Direutor de la RTPA

LLAR_ALLA

Xunta del Presidente de l’Academia de la Llingua Asturiana y el Direutor de la RTPA

L’Academia propón a la Direición de la RTPA qu’ún de los sos espacios informativos diarios seya n’asturianu

El Presidente de l’Academia de la Llingua Asturiana, Xosé Antón González Riaño tuvo güei, 17 de xunetu, una xunta col Direutor de la RTPA, Antonio Virgili, na que, amás d’otres cuestiones, presentó al Ente de comunicación autonómicu una propuesta pa entamar un espaciu informativu diariu n’asturianu. Esti entamu afítase nos datos ufiertaos nel III Estudiu Sociollingüísticu d’Asturies, fechos públicos nel «Avance de datos» presentáu’l pasáu mes de xunu.

La propuesta de l’ALLA conseñóse nestos términos:

L’Academia de la Llingua Asturiana propón a la Direición de la RTPA qu’ún de los sos espacios informativos diarios (mediu día o tarde-nueche) seya n’asturianu.
L’oxetivu ye que la radiotelevisión pública asturiana contribuya a la dignificación y normalización de la llingua y cultura d’Asturies.
La propuesta afáyase dafechu a les demandes sociales (III Estudiu Sociollingüísticu):
• El 43% de los asturianos y asturianes sigue la programación n’asturianu qu’emite la RTPA.
• A esti 43% paez-y interesante (86%), de calidá (86%) y mui comprensible llingüísticamente (91%)
• Cuasi un 60% de la población asturiana reclama esta clas de programes informativos.
L’espaciu informativu n’asturianu incluiría portada y presentación, llocución de noticies, creitos, la información deportiva y la del tiempu.
Les emisiones entamaríen nel mes de mayu de 2018 (coincidiendo col Día de les Lletres Asturianes).
L’Academia de la Llingua Asturiana comprométese a diseñar un Plan de Formación Específicu y urxente pal personal de la RTPA y a llevalu alantre nes propies instalaciones de la RTPA. El citáu plan nun implicaría coste económicu pa la RTPA.

Nel aconceyamientu, al máximu nivel, participaron, amás de los máximos responsables de l’ALLA y de la RTPA, Marta Mori d’Arriba (Vicepresidenta de l’Academia), Francisco G. Orejas (Direutor de Producción de la RTPA), Bárbara Alonso (Direutora d’Informativos de la RTPA) y Lucía Herrera (Direutora d’Antena de la RTPA).
Per parte de la RTPA propúnxose, col preste de l’ALLA, estudiar con procuru les implicaciones de la propuesta y volver vese en setiembre p’algamar, si ye posible, un alcuerdu definitivu.

Uviéu, 17 de xunetu de 2017

ACADEMIA DE LA LLINGUA ASTURIANA

Prueba conocencia (xineru 2018)

CONVOCATORIA DE XINERU*

L’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu, fadrá dos convocatories añales onde van poder evaluase diches conocencies. Nesi sen, da anuncia de les sos iniciatives pa conocimientu xeneral:

  1. Nos meses de xineru y mayu celébrense les pruebes, abiertes a toles persones interesaes.
  2. Unos quince díes enantes de les pruebes va abrise un plazu de matrícula.
  3. A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución.
  4. Les persones que nun superen les pruebes del nivel 1 podrán presentase a nueves convocatories toles vegaes que-yos pruya.
  5. Pal bon resultáu d’estes pruebes habrá tenese un dominiu básicu de les estayes que vienen darréu:
    1. ESTAYA LLINGÜÍSTICA
      1. Teoría gramatical: conocencia y dominiu del funcionamientu gramatical del asturianu y de la normativa académica.
      2. Práutica escrita: emplegu amañosu de la llingua, puestu en práutica gracies a exercicios gramaticales y de composición escrita.
      3. Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador.
    2. ESTAYA DE LLINGUA Y SOCIEDÁ
      Conocencia del allugamientu de la llingua dientro de la sociedá asturiana asina como del procesu de normalización en que ta inxerta.
  6. La prueba va tener dos partes, una escrita (dictáu, torna, exercicios gramaticales, redaición) y otra falada (conversación).

Nota. Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2012, 7ª ed. revisada; Gramática de la Llingua Asturiana, ALLA, Uviéu, 2008, 3ª ed. reimpresión).

Asina mesmo, aconséyase la llectura de testos fechos acordies cola normativa, como los asoleyaos por esta Academia.

* En resultes d’esto, el 27 de xineru de 2018 va facese la prueba semestral. El plazu de matrícula ye del 15 al 25 de xineru. Horariu de matrícula: llunes a xueves de 9:00 h. a 15:00 h. y de 16:00 h. a 19:00 h. Vienres de 9:00 h. a 14:00 h. Preciu: 12,00 €.

X.A. González Riaño, nuevu Presidente

Ayeri, xueves 22 de xunu de 2017, llueu de fináu’l mandatu de 4 años de los cargos direutivos de la institución, féxose’l procesu eleutoral y darréu d’ello salió escoyida la direición siguiente:

-Presidente: Xosé Antón González Riaño.
-Vicepresidenta: Marta Mori d’Arriba.
-Secretariu: Xosé Ramón Iglesias Cueva.
-Vicesecretaria: Carme Muñiz Cachón.
-Ayalgueru: Carlos Lastra López.

L’anterior Presidenta, Dra. Ana María Cano González (Caderalga de Filoloxía Románica de la Universidá d’Uviéu) diere anuncia a l’ALLA va unes selmanes del so determín de nun volver presentase a la reeleición, llueu de 4 mandatos nel cargu.

L’Academia de la Llingua Asturiana quier sorrayar y agradecer fondamente l’escomanáu llabor desendolcáu pola direición anterior nos ámbitos sociales y de normativización del idioma, al empar que da anuncia del so enfotu por siguir nuna xera qu’ha empobinar, ensin dulda, hacia’l llogru de la oficialidá de la llingua hestórica de tolos asturianos y asturianes.

ACADEMIA DE LA LLINGUA ASTURIANA

Lliteratura. Revista lliteraria asturiana

Lliteratura. Revista lliteraria asturiana. nu 33 (2017) Uviéu, ALLA.
Nuevu númberu d’esta revista lliteraria editada pa celebrar el XXXVIII Día de les Lletres Asturianes y dedicada a les escritores asturianes. Participen nesti númberu Pilar Arnaldo, Iris Díaz Trancho, Elisabet Felgueroso, Esther García López, Aurora García Rivas, Carmen Gómez Ojea, María Xesús Llope, Marisa López Diz, Laura Marcos, Berta Piñán, Paquita Suárez Coalla y Consuelo Vega en «Narrativa». En «Poesía» alcontramos testos de Lourdes Álvarez, Ángeles Carbajal, Raquel F. Menéndez, Sabela Fernández, Yolanda Fidalgo, María José Fraga, Esther García López, Irma González-Quevedo Pedrayes, Vanessa Gutiérrez, Marisa López Diz, Marta Mori, Susana Sela y Ana Vega.  La estaya «Traducción» ufre un trabayu de Claudia Elena Menéndez Fernández. Zarra’l númberu un «Varia» d’Esther Prieto.

Presentación del actu y materiales del XXXVIII Día de les Lletres Asturianes

El miércoles, 3 de mayu, a les 12:30 hores, nel llar de l’Academia de la Llingua Asturiana, presentóse la estructura del XXXVIII Día de les Lletres Asturianes que se celebra esti vienres 5 de mayu, a les 20:30 hores, nel Teatru Campoamor d’Uviéu.

Coincidiendo col Día del les Lletres Asturianes fairáse entrega del PREMIU NACIONAL DE LLITERATURA ASTURIANA al escritor D. Xuan Bello. Tamién esi mesmu día va facese un homenax al papel xugáu pola muyer nel caltenimientu de la llingua asturiana a lo llargo de la historia.

Nesta rueda de prensa presentóse’l Medayón distintivu del Premiu (obra diseñada pol artista asturianu Adolfo Manzano) y tamién se va dar a la conocencia de la prensa la edición de la Esbilla lliteraria del autor galardonáu, ye dicir, el llibru nel que se recueye una amuesa antolóxica de la so obra.
Asina mesmo, como n’otres ediciones, presentóse’l númberu 33 de la revista Lliteratura. Revista lliteraria asturiana, qu’esti añu ta dedicáu dafechu a la lliteratura fecha por muyeres.
Intervinieron Ana María Cano González, Presidenta de l’Academia de la Llingua Asturiana, Xosé Antón Gonález Riaño, Vicepresidente de la institución, Adolfo Manzano, diseñador del medayón distintivu y Monchi Pedreira, encargáu de la edición de la esbilla lliteraria.