CULTURES 21

Cultures. Revista Asturiana de Cultura, nu 21 (2017).

Volume cuasi monograficu dedicau a los xuegos y deportes tradicionales n’Asturies y que cunto, baxo la direición davezu de Roberto González-Quevedo, cola collaboración del especialista Carlos Suari Rodrigue na coordinación y escoyeta de testos. El númberu entama les sos páxines col artículu «Un averamientu al estudiu del xuegu tradicional n’Asturies», que nos asitia na temática y los conteníos de volume. Darréu d’ello, recuéyense los trabayos siguientes nun primer bloque: «Los xuegos tradicionales y los sos destinos culturales», «Contribución del xuegu tradicional a la construcción social de l’afeutividá», «Joko y jolas: modelos de comportamientu lludicu de la cultura vasca», «Alredor de la institucionalización de los xuegos tradicionales: de la necesidá de conservalos al peligru de deformalos» y «Delles conclusiones antropolóxiques en cuantes a los xuegos populares». Sigue darréu, nun segundu bloque, la «Faza etnográfica» colos trabayos «Dellos xuegos infantiles en Xixón»,«Xuegos tradicionales en Caldones», «Los xuegos en Morcín», «Los xuegos populares en Palacios del Sil»,  «Xuegos en Quirós dempués d’una guerra», «Los bolos y dellos xuegos infantiles en La Pola (Siero)», «De la historia ya l’actualidá de los bolos en Cangas del Narcea», «Apuntes da supervivencia del bolo rodao en Lloza (Cuaña)», «El xogo de bolos nel valle del Navia», «Del cuatrín d’Agones: pasáu, presente y futuru d’una singularidá bolística en Pravia», «Cartografía bolística del conceyu Grau», «El xuegu de la llave» y zarra esti apartáu Julio Muñiz Silva con «La recuperación del valtu dende les sos posibilidaes deportives y educatives». Una tercer seición d’esti ampliu volume, la «Faza etnográfica», presenta los trabayos: «Los bolos na mitoloxia asturiana», «El compromisu didáuticu y emocional del Museo de los Bolos de Asturias (Panes)», «Xuegos infantiles p’anguano na normalización llingüística», «Identidá na pantalla: una reseña del documental Nun queisa», «La prensa y otres fontes documentales pa la carauterización del xuegu de «la pina» en Canaries nos sieglos XIX y XX» y «Una repasada a les fontes documentales del xuegu deportivu tradicional n’Asturies». Pa cabu, piesllen esti volume les páxines dedicaes a la «Faza d’histories de vida» cola collaboracion «Carlos Vallina Redondo, testigu d’otru tiempu».

LLIBRERÍA XUVENIL: Tyan

Nel Morán, Tyan. Uviéu, Academia de la Llingua Asturiana, 2017. «Llibrería Xuvenil» nu 13. [Premiu del Concursu de «Llectures pa Rapazos» 2014. Con dibuxos d’Alberto Álvarez Peña].

Nesta cabera entrega de la coleición «Lliteratura Xuvenil», el so autor preséntanos, a lo llargo de les más de doscientes páxines del llibru, una hestoria onde los protagonistes, dos rapacinos, Selina y Lluis, vivirán un refileru d’aventures a caballu ente’l mundu real y otru mundu fantásticu, Tyan, al que llegarán al traviés d’unes puertes que coneuten estos dos mundos. En Tyan, correrán munches aventures y ayudarán a la xente qu’elli vive. Cuando too acaba, y n’agradecimientu pola so ayuda, los habitantes de Tyan concederán-yos el privilexu de disponer de delles puertes abiertes pa que Lluis y Selina puean volver cuando quieran.

LLIBRERÍA FACSIMILAR: Obra manuscrita

«Pachín de Melás», Obra manuscrita. Edición, prólogu y notes de Ramiro González Delgado y Clara González Delgado. Uviéu, ALLA, 2017. «Llibrería facsimilar» nu 68.

Ufiértensenos nesti volume obres manuscrites del mui celebrau Emilio Robles Muñiz, conservaes pola so fía, Pilar Robles, que les punxo dafechu a disposición de los dos editores y que vienen a completar l’entamu planificáu de mano como Obra completa pero del que namái s’asoleyó un primer volume (Uviéu, Trabe, 2001), iguáu por Ramiro Gonzalez Delgado. Precedíos por un curiáu «Entamu» descriptivu sobre los conteníos, qu’ocupa les páxines 9-29, y una mui amanosa bibliografía de calter xeneral sobre l’autor y la so obra (pxs. 31-47) estayada en tres seiciones –«Ediciones d’obres de Pachín de Melás feches en vida del autor», «Ediciones modernes d’obres de Pachín de Melás» y «Bibliografía sobre Pachín de Melás»–, los materiales lliterarios recoyíos nesti volume (pxs. 49-339) xébrense en tres grandes seiciones acordies colos sos conteníos temáticos: «Teatru», la seición más llarga, con monólogos, diálogos, cuadros de costumes, melodrames y zarzueles; «Poesía» y «Narrativa». La edición asoléyase en collaboración col Conceyu de Xixón.

TOPONIMIA: Conceyu de Llangréu. Parroquies de Lada y La Venta

Xabiel Fernandez Garcia, Conceyu de Langreu. Parroquies de Lada y de La Venta. Uvieu, ALLA, 2017. «Toponimia» nu 143.

Sesta entrega de material toponímico del Conceyu de Llangréuu, que recueye los llistaos de toponimos mayores y menores de les dos parroquies asitiaes na fastera meridional del territoriu llangreanu, Lada y La Venta.

La parroquia de Lada, amas del denomáu «distritu urbanu» de Lada, inxer los pueblos de Les Bories, El Caliyu, El Campurru, La Casa Nueva, Caufel, Conforcos, La Cortina, Los Cuarteles de Penarrubia, La Cuesta Naval, Cuturrasu, Les Fayes, Fontoria, Lo Frayoso, La Granda, La Llana’l Pandu, El Llindión, La Manigua, Merinan, La Nisal, El Pandu, Pedrazos, Pedrea, Pelabraga, La Pertiga, El Ponton, El Rebollín, Samiguel, Santianes, La Teyera, Les Teyeres, La Vallina, Veneros y La Xusta. Lada foi llugar d’espardimientu de la burguesía asturiana gracies al balneariu y a la fonte d’agues sulfuroso-arsenicales conocida col nome de La Fuente los Güevos Podres, enta mui nombrada güei. Nel territoriu de la parroquia asitiaríense dempués de la guerra civil delles industries, influenciaes por La Fábrica de La Felguera: química PROQUISA (Fábrica de Productos 279 Químicos Sintéticos S.A), onde güei BAYER fabrica’l 100% del ácidu acetilsalicílico mundial; DERCO (Derivados del Cock); y delles industries cerámiques y metalúrxiques, cuasi desapaecíes cola reconversion industrial. Asina mesmo, en 1947, la «Compañía Eléctrica de Langreo» construyó una central térmica, hoi d’Iberdrola.

Pela so parte, la parroquia de La Venta, formada alministrativamente en 1887 con pueblos de Lada y de Riañu, asítiase nel estremu suroeste del conceyu y fórmenla los pueblos de L’Acebosa, L’Agüeria, El Caburniu, Los Camperones, La Cantera, El Carme, La Casa’l Medio, La Espina, Espineo, El Folguerón, El Forcón, L’Hedráu, La Llana, Llandoso, Llaneces, Llantamartín, La Raposa, Ribero, El Ruciu, Ruíu, San Tiso, Sarreyana, Sorribero, Trapa, Troncos, La Vega, La Venta y La Viesca. La Venta, xunto cola parroquia de Tiuya, tampoco nun ye parte integrante de «La Ciudá de Llangréu» y caltién carauter rural na so totalidá, coles llimitaciones derivaes d’asitiase nun valle mineru ya industrial.

XXXVI Xornaes Internacionales d’Estudiu

Entamen les XXXVI Xornaes Internacionales d’Estudiu na Facultá de Filosofía y Lletres de la Universidá d’Uviéu. Les Xornaes desendólquense del 7 al 9 de payares de 2017 del Salón d’Actos de la Facultá con esti programa.

A les persones matriculaes y qu’asistan a les Xornaes daráse-yos un certificáu acreitativu. Más información y matrícula n’Academia de la Llingua Asturiana.