Prueba conocencia (mayu 2017)

CONVOCATORIA DE MAYU*

L’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu, fadrá dos convocatories añales onde van poder evaluase diches conocencies. Nesi sen, da anuncia de les sos iniciatives pa conocimientu xeneral:

  1. Nos meses de xineru y mayu celébrense les pruebes, abiertes a toles persones interesaes.
  2. Unos quince díes enantes de les pruebes va abrise un plazu de matrícula.
  3. A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución.
  4. Les persones que nun superen les pruebes del nivel 1 podrán presentase a nueves convocatories toles vegaes que-yos pruya.
  5. La prueba va tener dos partes:
    1. Escrita: dictáu, exercicios gramaticales comprensión de testu y redaición.
    2. Falada: conversación colos miembros del xuráu.
  6. Pal bon resultáu d’estes pruebes habrá tenese un dominiu básicu de les estayes que vienen darréu:

        ESTAYA LLINGÜÍSTICA

Teoría gramatical: conocencia y dominiu del funcionamientu gramatical del asturianu y de la normativa académica.

Práutica escrita: emplegu amañosu de la llingua, puestu en práutica gracies a exercicios gramaticales y de composición escrita.

Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador.

ESTAYA DE LLINGUA Y SOCIEDÁ
Conocencia del allugamientu de la llingua dientro de la sociedá asturiana asina como del procesu de normalización en queta inxerta.

 

Nota. Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2012, 7ª ed.; Gramática de la Llingua Asturiana, ALLA, Uviéu, 2008, 3ª ed. reimpresión).

Asina mesmo, aconséyase la llectura de testos fechos acordies cola normativa, como los asoleyaos por esta Academia.

* En resultes d’esto, el 27 de mayu de 2017 va facese la prueba semestral. El plazu de matrícula ye del 15 al 25 de mayu. Horariu de matrícula: llunes a xueves de 9:00 h. a 15:00 h. y de 16:00 h. a 19:00 h. Vienres de 9:00 h. a 14:00 h. Preciu: 12,00 €.

Xuan Bello gana’l Premiu Nacional de Lliteratura Asturiana

Aconceyáu’l xuráu del Premiu Nacional de Lliteratura Asturiana,  presidíu por Dña. Ana María Cano González, Presidenta de l’ALLA, y formáu polos miembros de númberu de la institución, D. Xosé Antón González Riaño, D. Xosé Ramón Iglesias Cueva y Dña. Carmen Muñiz Cachón; los profesores de la Universidá d’Uviéu D. José Luis García Martín y D. Leopoldo Sánchez Torre, y faciendo de secretariu D. Fernando Padilla Palicio, Direutor Xeneral de Planificación Llingüística y Normalización, en representación del Gobiernu del Principáu d’Asturies, diose llectura a  les candidatures presentaes nesta edición correspondientes a los  escritores  D. Xuan Bello, D. Antón García, D. Roberto González-Quevedo, Dña. Berta Piñán y D. Xuan Xosé Sánchez Vicente.

Dempués d’una esposición de los méritos de los candidatos, na que s’afitó que cualquiera d’ellos yera merecedor del premiu, tuvo llugar un alderique ente los miembros del xuráu, procediéndose darréu a una serie de votaciones. Tres d’elles, los miembros del xuráu apautáronse na resolución que vien darréu:

Conceder el Premiu Nacional de Lliteratura Asturiana na convocatoria de 2017 al escritor Xuan Bello pola estraordinaria calidá y relevancia de la so trayeutoria lliteraria (qu’amiesta poesía y narrativa), que vien xugando un papel fundamental na dignificación y visualización de la lliteratura asturiana y de la propia llingua, asina como pola mor de la proyeición estatal ya internacional qu’algama la so obra con numberoses traducciones a estremaes llingües.

IMG_5544

Conferencia Sol en los Pomares: una obra del so tiempu

Ayeri 20 d’avientu, l’académiu y profesor D. Xosé Ramón Iglesias Cueva presentó, a les 7:00 de la tarde, na sala de conferencies del Antiguu Institutu Xovellanos de Xixón, la conferencia “Sol en  los Pomares: una obra del so tiempu” entamada pola Oficina de Normalización Llingüística del Conceyu de Xixón y l’Academia de la Llingua Asturiana.

Presentación Sol en Los Pomares

Ayeri 3 de payares, la Conceyalía d’Educación y Cultura del Conceyu de Xixón y l’Academia de la Llingua Asturiana presentaron, a les 7:00 de la tarde, na sala de conferencies del Antiguu Institutu Xovellanos de Xixón, la edición facsimilar del llibru de Matías Conde, Sol en los Pomares, al cumplise los 120 años de la nacencia del autor en Xixón.

Nel actu intervinieron:

  • Dña. Ana Montserrat López Moro, Conceyala d’Educación y Cultura del Conceyu de Xixón.
  • Dña. Ana Mª Cano González, Presidenta de l’Academia de la Llingua Asturiana.
  • D. Xosé Lluis García Arias, Miembru de Númberu de l’Academia de la Llingua Asturiana.