L’Academia de la Llingua Asturiana pide a les fuerces polítiques xenerosidá y convicción constitucional pa negociar la oficialidá na reforma del Estatutu

L’Academia, institución llingüística del Principáu que, ente otres funciones, tien la tutela de los derechos llingüísticos de los asturianos, ta siguiendo con fondu interés, y dacuando con preocupación, el procesu abiertu n’Asturies pa reconocer la oficialidá del asturianu y del eonaviegu nel Estatutu d’Autonomía. Ye esta una reclamación democrática con cuatro décades de percorríu que diba significar el cumplimientu de la previsión constitucional recoyida nel artículu 3.2 de la norma básica del Estáu.

La llingua asturiana ye quiciabes la llingua autonómica que cuerre más seriu peligru de desapaición. Asina se reflexa nel Atles de la UNESCO (Atlas of the World’s Languages in Danger, 2010) y nos informes periódicos que, sobre’l cumplimientu de la Carta Europea de les Llingües Rexonales y Minoritaries, vien emitiendo’l Conseyu d’Europa.

La decisión d’oficialización de les llingües d’Asturies nun se sofita namás en cuestiones de calter xurídico-políticu, sinón que constitúi la única midida con capacidá pa llograr que la llingua y la cultura de los asturianos tengan posibilidaes de sobrevivencia ente les xeneraciones futures. Nesi sen, hai que facer alcordanza de que’l cumplimientu de la previsión constitucional pa reconocer la oficialidá del asturianu foi solemnemente apoyáu, nuna decisión ensin precendentes, pol plenu del Congresu de los Diputaos d’España’l en marzu de 2021.

Les nueses llingües son construcciones históriques del pueblu asturianu y, darréu d’ello, nun constitúin espresiones ideolóxiques que pertenezan a opciones polítiques esclusivamente d’esquierdes o de dereches, sinón que tienen un calter tresversal, amosáu, inequívocamente dende posiciones tanto conservadores como progresistes, de lo que la obra al respeuto de Gaspar Melchor de Xovellanos (ss. XVIII-XIX) ye la máxima espresión.

Acordies colo anterior, nesti momentu tán negociando la reforma del Estatutu d’Autonomía la FSA-PSOE, Podemos, Izquierda Xunida y Foro. El pidimientu de nueso diríxese direutamente a estos partíos políticos. Dende l’Academia pidímos-yos que planteguen la negociación y el consensu priorizando’l futuru cultural d’Asturies sobre otres llexítimes aspiraciones partidaries en rellación col desarrollu social, económicu y políticu de la nuesa comunidá. Protexer y da-y futuru a les llingües d’Asturies ye, en tou casu, un elementu de cohesión, dinamización y autoestima coleutiva qu’incide en toles dimensiones de desarrollu futuru p’Asturies.

La FSA-PSOE, Podemos, Izquierda Xunida y Foro tienen la responsabilidá y la oportunidá histórica d’algamar, nesti añu 2022, un alcuerdu estatutariu que darréu tendría que se poner en práutica al traviés d’una Llei d’Usu, de calter autonómicu, qu’habría llograr inda más consensos políticos, incluyendo, dende llueu, y esi ye’l nuesu enfotu, a una fuerza tan importante como’l Partíu Popular.

Pero si la responsabilidá ye compartida polos cuatro partíos políticos mentaos, tien inda más significáu polo que respeuta a la FSA-PSOE, fuerza mayoritaria na Xunta Xeneral y fuerza de gobiernu n’Asturies. Nesti sen, ye dafechu necesaria la implicación personal del Presidente Barbón y el so lideralgu pa llograr que’l procesu fine con éxitu.

Ye trescendental tener en cuenta que tamos énte una de les caberes oportunidaes pa solucionar democráticamente’l que ye’l gran tema políticu pendiente dende la Transición n’Asturies: la cuestión llingüística. De nun llograse agora, xeneraríase, ensin dulda, una gran frustración n’amplios sectores de la sociedá asturiana nos que s’instalaría’l desánimu y una fonda sensación d’inxusticia en cuantes a la non reconocencia de los sos derechos culturales en comparanza colos que sí puen esfrutar les ciudadaníes gallega, vasca, navarra, aranesa, catalana, valenciana y balear. Otramiente, dende’l puntu de vista sociolóxicu, proyeutaríase una imaxe escura onde la estratexa y les consignes del arcu políticu señaldosu de la dictadura trunfa sobre una mayoría social abierta, democrática, moderna ya inclusiva.

L’ALLA ―que, como ye la so obligación, siguirá analizando esti procesu de negociación col procuru requeríu― quier treslladar, a lo cabero, a les fuerces polítiques, como siempres, la so disposición p’ayudar, nel so casu, al llogru efeutivu de la oficialidá y agradez el sofitu qu’estremaos axentes sociales y personalidaes individuales vienen amosando nesti sen (sindicatos, coleutivos de defensa del asturianu, escritores, periodistes, estudiosos ya investigadores de la llingua, etc.). Ente toos sedremos a llogralo.