Nomes de conceyos, parroquies, pueblos y llugares

L’Academia de la Llingua Asturiana (ALLA) ufierta esti llibru colos Nomes de conceyos, parroquies, pueblos y llugares del Principáu d’Asturies enfotada en facer llegar una llista llarga cola bona denomación de los llugares de más entidá xeográfica.

Pa qu’esti trabayu viere la lluz fixo falta un llabor d’años y la collaboración desinteresada de munches persones. N’efeutu, bebe nes fontes que, de magar los años setenta, entamaron les primeres correiciones; siguió llueu colos datos ufiertaos pola Xunta de Toponimia del Principáu d’Asturies; tamién colos recoyíos polos que fixeron la información pal Gran Atlas del Principado de Asturias y por dellos más que llevaren alantre otros proyeutos. L’ALLA pudo apurrir tamién la so collecha pela prestosa y, al empar, humilde coleición Toponimia. Les consultes puntuales, les conversaciones concretes y les demandes oficiales fixeron el restu pa qu’esta obra pudiere asoleyase col bon argumentu del trabayu contrastáu, anque suxetu a revisiones, a crítiques y a les observaciones de munches más persones a les que la llectura afalará pa que se faigan próximes ediciones más iguaes y bayuroses.

L’Academia, pente medies de la so xunta de normalización, nun quixo facer un modelu de trabayu xeográficu, nin un nomenclátor al usu de los que faen los institutos d’estadística: nin ye esa la so función nin ye esi’l so esmolimientu. L’ALLA polo que de veres naguaba yera por ufiertar un corpus toponímicu axustáu del mou más atopadizu a los usos llingüísticos asturianos teniendo na tradición oral el meyor sofitu informativu pa la normativización.

La información de los 78 conceyos, de la so cabecera alministrativa y del so allugamientu dientro del conxuntu asturianu, va siguida del detalle parroquial, siempre nel mesmu orde:

  1. Nome de parroquia (en negrina).
  2. Nome de los nuedos de población recoyíos nel Nomenclátor oficial.
  3. Nome de barrios de pueblos, caseríes y otros sitios poblaos (dafechu, estacionalmente o dacuando), asina como dellos más, enxamás toos, rellacionaos con cabañes, mayaes y brañes.
  4. Nome de corrientes d’agua, esto ye, de ríos, regueres o regatos de más calter, asina como arenales o playes.
  5. Nome d’otros accidentes orográficos o de dalgún otru aspeutu d’interés.

Nomes de conceyos, parroquies, pueblos y llugares del Principáu d’Asturies. Academia de la Llingua Asturiana, 2000. [9,02 €] [BAXAR]