Los testos infantiles y xuveniles protagonicen el númberu 36 de Lliteratura

L’Academia de la Llingua Asturiana vien d’asoleyar el númberu 36 de la revista Lliteratura. Revista lliteraria asturiana correspondiente al añu 2020. Nesti númberu, de 173 páxines, baxo la direición de la escritora y académica Marta Mori, atopamos dos estayes de la revista claramente definíes y que bien podríen iguar dos númberos perfeutamente dixebraos: una primer estaya especial dedicada a la Lliteratura Infantil y Xuvenil (LLIX) y una segunda estaya que coincide colos conteníos habituales de la revista. A lo llargo de les sos páxines combínase la creación lliteraria, l’ensayu y la crítica; y les voces nueves apaecen xunto a voces yá consagraes. Esti exemplar pue valir al empar d’amuesa del llabor lliterariu de güei y como material pal aula no que cinca a la Lliteratura Infantil y Xuvenil.

Asina, les 100 páxines dedicaes a la Lliteratura Infantil y Xuvenil (LLIX) abren colos poemes d’Aurelio González Ovies, Esther García López, Marisa López Diz y Sidoro Villa Costales. Darréu d’ello, atopamos los rellatos de Carlos González Espina, Dolfo Camilo Díaz, Enrique Carballeira, Helena Trexu Fombella, Iris Díaz Trancho, Mari Luz Pontón, Miguel Solís Santos, Montserrat Garnacho Escayo, Nel Morán, Xurde Fernández y Marian García. Una tercer faza d’esta seición ye la del teatru, con pieces pequeñes de Laura Iglesia San Martín, Maite González Iglesias y Pablo Rodríguez Medina. Hai sitiu tamién pal ensayu, colos trabayos de Vicente García Oliva y Severino Antuña, onde esti últimu fai un repás al canon de la LLIX. Zarren esta primer estaya de la revista les reseñes de Mar Martín Martín, Blanca Fernández, Ramón Cueva y Ruth González sobre dalgunes de les obres de LLIX asoleyaes nesti últimu añu.

La segunda parte de la revista, que correspuende a les collaboraciones y la distribución avezaes, abre cola estaya de poesía: Alejandra Sirvent, Armando Vega, Belén Rico Prieto y Laura Marcos. Darréu d’ella, inxértase la parte dedicada a la narrativa, colos testos de Pablo X Suárez, Gonzalo Llamedo Pandiella, María Fernández Abril y Paquita Suárez Coalla. A continuación, atópase la entrevista de Fernando Cid Lucas al direutor y actor asturianu Etelvino Vázquez. Nes fueyes vinientes, Vicente García Oliva, con motivu del XXV cabudañu de la muerte de María Teresa González ofreznos una visión de los modelos de muyer na poesía de l’autora.

La penúltima seición d’esta revista ye la dedicada a la traducción, na qu’Inaciu Galán vierte un testu de Quim Monzó y Miguel Sánchez Canella torna dos poemes tamién dende’l catalán. Piesllen esti númberu les reseñes de Marta López Fernández –con un repás xeneral al panorama lliterariu de 2019–,Marcos Martínez Fernández, Diego Solís, José Angel Gayol, Marta Mori y Alba Sánchez Batalla, que repasen dellos títulos asoleyaos nos últimos años.


Campaña #UnMinutínpaLliteratura2020

Como resultáu del trabayu nes aules o de les llectures doméstiques, propónse-y a la reciella escoyer y lleer un cachín (d’un minutu o menos) del númberu 36 de la revista Lliteratura. La idea ye que, al traviés de dalgún formatu audiovisual, les families y les comunidaes educatives compartan estes llectures en Twitter y/o Facebook (anque n’orixe vengan d’otres plataformes como Tiktok o Instagram).

El vienres pasáu, cola llectura de Marta Mori, direutora de la revista, dióse’l barrenazu d’empiezu d’esta campaña. Tres d’ella, al llamáu de #UnMinutínpaLliteratura2020, espérense les llectures de tola xente menudo que s’avere a la revista, seyan alumnáu de llingua asturiana o llectores en xeneral. Esta aición quier da-y tol protagonismu a la xente n’edá d’escolarización obligatoria, pero tamién almite dalguna collaboración de persones adultes, profesoráu y escritores.