Lletres Asturianes

Normes pa la presentación de collaboraciones a Lletres Asturianes


1. Los trabayos, como norma xeneral, tendrán un llargor máximu de 25 fueyes (incluyendo tables ya ilustraciones).

2. La llingua principal ye l’asturianu, pero podrán asoleyase trabayos escritos n’otres llingües.

3. Enantes de la espublización, el Conseyu de Redaición unviará de forma anónima les propuestes d’artículos a dos revisores ayenos al citáu Conseyu, qu’informarán del valir científicu de los mesmos a Lletres Asturianes. Esta revisión ye condición necesaria pa la so aceutación definitiva y fadráse acordies col procesu denomáu «doble ciegu».

4. Lletres Asturianes encargaráse de les correiciones ortográfiques, de puntuación o d’estilu de los trabayos que s’asoleyen. Los autores comprométense a correxir una prueba de testu.

5. Cada artículu habrá inxertar, obligatoriamente, el títulu y el nome del autor, qu’axuntará con esti envís una tarxeta onde se comuniquen señes, teléfonu y/o corréu electrónicu. Inxertaráse igualmente un «Resume» d’unes 300 pallabres que reflexe les llinies xenerales de conteníu del trabayu, asina como un apartáu de «Pallabres-clave» con un máximu d’hasta cinco pallabres. El «Resume» y les «Pallabresclave» apaecerán en tolos casos n’asturianu y n’inglés. El títulu conseñaráse tamién n’inglés.

6. La presentación gráfica del trabayu siguirá les normes xenerales d’estilu que se conseñen darréu:

- El títulu marcaráse con lletra negrina, cuerpu 14; con mayúscula namái al entamu la frase.

- El corpus principal del testu dirá en lletra redonda, blanca, cuerpu 12, interlliniáu cenciellu.

- Los subtítulos o encabezamientos marcaránse con lletra versalina negrina, cursiva negrina y cursiva blanca, etc. según proceda; con mayúscula namái al entamu.

- Dientro’l testu les pallabres que quieran destacase marcaránse en lletra cursiva ensin emplegar nunca lletres mayúscules. Les cites testuales conseñaránse, si son curties, dientro’l testu «ente comines»; y ensin comines, en parágrafu aparte, sangraes y en lletra de cuerpu 11 si son llargues.

- Los étimos marcaránse con lletra versalina. Les trescripciones fonétiques y fonolóxiques conseñaránse preferiblemente acordies col sistema del AFI (IPA).

- Los mapes, esquemes o cuadros, en formatu editable o con una resolución mínima de 300 ppp si tán en formatu imaxe, afayaránse no posible al estilu xeneral encamentáu pal testu principal. Habrán dir inxertaos nel llugar que-yos correspuenda dientro’l testu o señalaráse amañosamente ónde han dir asitiaos.

- Pa les notes a pie de páxina siguiránse estes mesmes indicaciones. - Les cites dientro’l testu y les referencies bibliográfiques fadránse acordies coles normes afitaes pola APA na so 7ª edición.

- El llistáu de referencies bibliográfiques que s’asitiará a lo cabero’l trabayu dirá en lletra de cuerpu 9, con sangría francesa de 0,6 cm.

7. Habrá unviase copia electrónica del orixinal presentáu en formatu compatible colos procesadores de testos más al usu. Los trabayos empobinaránse a:

Lletres Asturianes
ACADEMIA DE LA LLINGUA ASTURIANA
C/ L’Águila 10 – 33003 Uviéu
Apartáu 574 – 33080 Uviéu
publicaciones@academiadelallingua.com

Normes de presentación en pdf Descargar en PDFCompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
www.academiadelallingua.com
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana