Lletres Asturianes

Entamu

Un diálogu necesariu

  Con esti nueu cursu, en seis centros del Principáu fairáse realidá la escolarización de la llingua. Dase asina un reblagu más nesi llargu y llaráu camín d\'escayos que ya s\'entamare l\'otru añu con iniciatives aislaes de dellos de los meyores docentes espardíos per Asturies.

  Esi pasu dau pel Gobiernu Asturianu, curtiu ya según les posibilidaes de güei y retorcigañáu nel so procesu, sofita, de toes maneres, el perdifícil trabayu d\'inxerir nos vezos sociales la realidá llingüística asturiana.

  Nun se trata, agora, d\'andar a la tema y tacer hestoria. Nun naguamos per referver nin por echar na cara de naide ná. Namái alcordamos toos que munches vegaes les coses puen solucionase -sobre too dempués de ver el resultáu- con atender y entender les razones de los que comu munchos miembros d\'esta Academia lleven, cuantayá, afondando na problemática llingüística d\'Asturies.

  Nun paez d\'aconseyar que caún de los llogros nel tarrén asturianiegu tenga que s\'algamar cola polémica pública: nin tán sofitaes les istituciones autonómiques nin-yos convién ponese delantre de los que, contrarios dafechu al so facer pero perfuertes nos sos poderes, van nega-yos toles posibilidaes d\'esporpollar.

  Mas tampoco nun sería granible que daquién quixere pesllar les posibilidaes enxertaes nuna istitución comu l\'Academia xustamente pel so asitiamientu independiente. Nun convién a la credibilidá del sistema democráticu nin tan sobráu ta\'l Principáu de muérganos culturales onde la so curtia hestoria -y entós ensin vezos a la escontra de los tiempos nueos- s\'entretexa de bonos llogros.

  Poro, la nuesa política foi, ye y será la collaboración dafechu coles istituciones asturianes porque tamos afitaos na idea que namái na andecha seremos a facer d\'Asturies un país con puxu ente los pueblos. Y nesti momentu collaboración quier dicir abrir un fondu diálogu y tomar medíes que lleven darréu a la escolarización de la llingua y cultura de nueso. Nel primer trimestre d\'esti añu tendría que tar fechu\'l programa escolarizador del cursu que vien. En xineru la so negociación col Ministeriu d\'Educación español. Asina nun mos coyerá denguna improvisación nel munchu trabayu que mos aguarda.

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
www.academiadelallingua.com
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana