Lletres Asturianes

Entamu

Xestión acordies coles demandes

  Que lo meyor pue dir a la escontra de la bono ye un dichu que, de xuru, arecueye una llarga esperiencia y pon torga a les postures masimalistes de toa mena. La prudencia tendría que s\'afitar dayures, darréu que la impacencia ye persiempre mala canseyera.

  Asina, cuandu se mos dixo que faía falta dir adulces ne! procesu escolarizador de la llingua entendímoslo, pescanciando comu pescanciábamos los problemes del nuesu texíu social. Más, nós mesmos propunximos pasos enfonna más curtios de les galmiaes peles qu\'allampiábamos. Yera claro que nun tábamos por xustificar que llueu, de salir les coses al bies, se mos dieren sides de que nun se yera a andar. Nun taba bien que, por entainar, los resultaos foren escontra forga, esto ye nel sen contrariu al oliváu.

  De toes maneres los prexuicios y rnedranes de nueso nun s\'axustaben al asitiamientu del pueblu asturianu. Les encuestes feches nel añu 77, asoleyaes llueu \', foron el primer datu que faía ver que la xente diba muncho más aIantre de lo que los «prudentes» mos deprendíen y nós atalantábamos. Por si nun fora abondo, los resultaos d\'otres nueves encuestes, agora del añu 82, empobinaes pel sociólogu Llera Ramo \', perafitaríen que los asturianos yeren enforma más favoratibles a la so llingua y cultura que lo que les informaciones d\'usu diariu mos servíen. Y entá más pa los que nun s\'enfotaren nos qu\'afonden na opinión de les coletividaes: nesti mesmu trimestre fexo falta que dellos de los pas de los nuesos rapazos firmaren que queríen la enseñanza de la so llingua, y otra vegada un resultáu favoratible dafechu.

  Les prudencies, ye nidio, toes son poques. De toes maneres, llueu d\'un tíempu de prudencies, bien taría dar contestaciones afayaíces llega1 y prácticamente. Llegalmente fai falta un decretu regulador del billingüismu\'l país. Práticamente perfáila qu\'una xestión atopaíza  lleve darrdu soluciones rápides, acordies coles demandes. Pero eso, magar la más bona de les nueses voluntaes, entá nun se ye a collumbrar desanimando los fechos, les atuaciones, los llogros y les palabres.



                                           ACADEMIA DE LA LLINGUA ASTURIANA


                                                                                              Ecmu. Sr. Delegáu del
                                                                                              Gobiernu Español
                                                                                              Uviéu
Ecmu. Sr.:

  L\'Academia de la Llingua Asturiana, muérganu del Principáu d\'Asturies según decretu 33/1980 del entós Conseyu Rexonal, de 15 d\'avientu, quier poner na so conocencia la fonda esmolición que tien pela so reiterada negativa a llegalizar organizaciones de sen cultural, afitándose nel fechu de que los sos estatutos tán iguaos en llingua asturiana.

  Esti facer de la so parte, na nuesa opinión, va a la escontra de pautos internaconales nos que s\'inxirió l\'Estáu Español y que respuenden a un fondu drechu de la Humanida: el drechu a la espresión, dafechu, na so llingua.

  Ye xeva d\'esta Academia de la Llingua, según los sos estatutos, curiar de los drechos llingüísticos de los asturianos y, asina, encamiénta-y a V. E., asturianu de nacencia, nun s\'afitar nuna política contravia al nuesu pueblu y, n\'otru sen, facer los posibles pa nun enfrentar los drechos asturianos a los enfotos del Gobiernu del Estáu al que tu representando.

  Uviéu, 7 d\'ochobre de 1984.

                                                                                                                               El Presidente

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
www.academiadelallingua.com
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana