Lletres Asturianes

Entamu

ENCUESTA

  Delles de les conclusiones de la encuesta fecha per SADEI y asoleyaes apocayá convién espardeles, darréu que dexen perafitao que\'l camin qu\'empobina a la recuperación de la llingua tien la reconocencia d\'una bona riestra asturianos.

  N\'efeutu, la llingua ye símbolu d\'asturiunidá pa munchos. Permunchos nagüen perque tea nos medios de comunicación, prensa, radiu, Tv. La mayoría ta pela so entrada na enseñanza.

  Esos son los aspeutos positivos onde hui que se sofitar pa facer los  posibles pa la so caltenencia comu llingua del país.

  Y esos son tamién los fechas sinificativos que deberíen acorrompinar un comentariu xustu; magar les torgues de tou tipu con que s\'alcuentra la vindicación de la llingua, afataes pelos muizchos años que\'l so desprestixu social llevó darréu perdayures, la nuesa xente tien concencia clara de lo que ye niciu d\'asturianismu y d\'aquello a lo que nun quixere arrenunciar.

  Pero a lo meyor daquién saca -sacó- la conclusión de que los asturianos -lliberales que son- nun se zurren a que della xente faiga coses nesa llingua, con esa llingua, per esa llingua... pero que nun quieren dir más lloñe.

  Bien. A lo meyor esa ye una conclusión esbillafa per unos bien poco lliberales analistes, enfotaos (porque asina mos lo muestren col so facer o col so non facer) en trancar les posibilidaes a un futuru cultural dixebráu.

  Esi lliberalismu -laissez faire, laissez passer- pa cola llingua quiciabes tuviera xacíu nun momentu ú les posibilidaes pa les llingües y cultures en llucha se vieren equilibraes. Mas confesase lliberales nesta tema agora, cuandu lo nueso, la llingua d\'Asturies, tien toles circustancies contraries merez otru nome estremáu. Dicise agora lliberal dende\'l poder -nun importa onde s\'exerza poder- pa que gane\'l meyor, afita que se quier dar la ventaxa a una de les partes.



TOPONIMIA

  Y la ventaxa na oficialización de los nomes de llugar asturianos ya se sabe a quién se quier dar con esi ensayu de lliberalidá.

  Porque nuna sociedá comn la nuesa, con un autodesprestixu continuáu dende munchayá, proponer unos cambios de nome -por más xustificaos que tean- ensin una negociación dafechu y ensin campañes previes en tolos medios, ye apuntase a un resultáu negativu.

  Facer, como se fexo\'n dellos conceyos, que fora\'l pueblu, en xunta, el que s\'apautare nuna cuestión toponímica, ensin más información que los propios prexuicios culturales, supón tamién o que tamos delantre de díes d\'una democracia direuta (lo que nun paez a xulgar pela prática que se fai n\'otres cuestiones) o, bien a la escontra, que se xuega demagóxicamente con daqué onde de mano ta tomáu\'l determín de nun dir alantre.

  Ver, en suma, que nos conceyos onde determinada ideoloxía política ye mayoritaria nun s\'acetaren les propuestes de la comisión de toponimia, faimos pescanciar que los consensos y pautos búsquense namái naquelles coses qu\'interesen; y más: que tán perlloñe les realidaes asturianes de merecer l\'atención consensuada.

  Si esti ye\'l facer del futuru, ruin futuru cultural mos aguarda, ruines lleis, disposiciones, órdenes allumarán pa iguar la llaceriosa situación cultural, llingüística o toponímica d\'Asturies.



ESCUELES

  Y nel fondu de too ello, l\'aspeutu más preocupante d\'esi lliberalisrnu eizsirz comparanza n\'otres comunidaes con llingua diferente a la estatal. Y ye qu\'equí fainse declaraciones ensin gorgutar y cola meyor de les tranquilidaes. De mano toos nagüen pel meyor finxu pero otres son les fosques realidaes.

  A estes altures nin hai conocencia nin seguranza de lo que va facese\'l cursu que vien na enseñanza. «Nun hui que s\'esmolecer», dirán. «Entá ye ceu», comentarán.

  Y mentantu les peores anuncies empicipien a esgayar el meyor de los enfotos. El Sr. Conseyeru de Cultura del Gobiernu asturianu, con falta xusteza hestórica, echaba la culpa de too a la falta competencies:

        «Aspiramos sinceramente a recuperar el bable.
     En el tema de la enseñanza no tenemos competencias y hacemos lo que podemos» (LNE, 10-1-85).

  Al otru díu, el 11 de xineru, nel mesmu periódicu, el vicepresidente del Gobiernu español dexaba ver bien a les clares el camín que reserven a Asturies.

        «Ahora no es el momento de solicitar competencias».

  Nun ye pa esmolecese, dirán. Los asturianos almitímoslo too, de xuru. Porque somos mui lliberales, claro.

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
www.academiadelallingua.com
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana