Lletres Asturianes

Entamu

Cuandu les coses provecen y podrecen

  N\'abril de 1993 una perllarga mayoría de los miembros de la Xunta de Facultá de Filoloxía apautábase pa que, siguiendo los trámites, la Universidá d\'Uviéu creare la especialidá de «Filoloxía Asturiana», de manera asemeyada a les otres especialidaes esistentes. Darréu, el decanu empobinó al Rectoráu, en mayu, un escritu con petición tala, axuntándo-y y el «Plan d\'Estudios» pautáu na xunta d\'abril.

  Pero, curiosamente, cuatru meses más tarde, recibe\'l decanu un escritu de la Sra. Aragón, vicerrectora, onde se dexa afitao que la petición pasa al vicerrector d\'estudiantes y estensión universitaria, Sr. Julio Rodríguez.

  Güei, cincu meses desque la Sra. Aragón empobinare\'l so escritu y nueve de magar saliere la petición del Decanatu de la Facultá de Filoloxía, entá nun se conoz resolución dalguna per parte del Rectoráu con rellación a la especialidá de «Filoloxía Asturiana».

  Esta conducta de la Universidá resulta difícilmente xustificable y ye nuevamente ofensiva pa la sociedá asturiana. Talmente paez que se busquen nueves sides p\'atrasar toles posibilidaes de que la llingua d\'Asturies entre na Universidá dempués de llograr cumplir perdafechu tolos trámites burocráticos y desfacer toles trabes puestes a lo llargo de la discusión del plan d\'estudios.

  Dende l\'Academia y dende Lletres Asturianes yá diemos muestres de comprensión pa con un rector al que reconocimos esfuerzos. De toes maneres too tien el so tiempu. Si\'l rector nun ye a cumplir los compromisos llograos na Facultá de Filoloxía tendrá que xustificalo y tomar les midíes que nesos casos se tomen. Si-y surden problemes insuperables con quien dende cerca podría entrabalu...nun tien más salida que dexar el camín llibre pa quien collabore más bonablemente.

  Ye claro que nesti sen nun basten nicios de bona voluntá. Hai que responder a los compromisos que la Universidá tien con Asturies y cumplir lo pautao ensin cayer na tentación d\'aguar los acuerdos de la Xunta. Camentar que la llamada «Extensión Universitaria» podría sustituir a los cursos d\'especialidá daos na Facultá de Filoloxía sedría non sólo Ilamentable sinón furtar la voluntá de los que votaron otra cosa. Allargar más tiempu una respuesta satisfactoria sedría, otra vuelta, ofender y convidar al aplagoriu llanzando la piedra de la intrasixencia ydel antiasturianismu. La responsabilidá ye agora de quien dende cargos universitarios fai que les coses non sólo nun entaínen sinón que provezan y podrezan.

 

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
www.academiadelallingua.com
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana