Lletres Asturianes

Entamu

                     Dimisión del Presidente de l’Academia de la Llingua Asturiana


  Cola salida a la lluz del Diccionariu de la Llingua Asturiana zárrase la primera faza del procesu normativizador del idioma y, nesi sen, algámase ún de los finxos, quiciabes el más específicu, que xustifica la existencia de l’Academia de la Llingua. A min tocóme l’honor de presidila a lo llargo venti años y sentí l’afalagu de la collaboración perestimable y xenerosa d’académiques y académicos. Pero persé que yá ye’l tiempu afayadizu p’arrenunciar dafechu, como perfaigo agora, al mio cargu de presidente.

  Esti actu de mio naide nun ha entendelu como una fuxida, darréu que to siguir sofitando a quien s’asitie nel mio llugar y llevando alantre los llabores non representativos que m’encamienten. Tampoco nada nun va alcontrase xurgando en razones d’otra mena que nun sían les qu’equí s’ufierten dao que, asina me paez, l’Academia de la Llingua encóntase güei nun claru prestixu institucional, nuna economía ensin deudes, nun presupuestu afitáu y na promesa verbal d’un nueu llar acordies coles necesidaes nueves. Per otru llau fala cola Conseyería de Cultura y rellaciónase con partíos, sindicatos y con instituciones y sociedaes cíviques de tou calter lo que da nuncia del so bon inxerimientu ciudadanu y de que trabaya por perpasar percima de les rocees qu’enartaron el bon entendimientu a lo llargo d’esti tiempu.

  Si dimito agora, acabante llograse un idioma técnicamente iguáu pal futuru y llueu de dexar entamaes nueves iniciatives, ye porque anque venti años son percurtios nuna institución son abondo na vida d’un home. Ye por eso polo que m’abulta que, nun siendo naide imprescindible, bien ta que l’Academia s’anueve coles idees y proyeutos d’otres persones.

  Nesta xornada, murnia y lliberadora al empar, quixera que les mios foren pallabres d’agradecimientu non solo a los académicos enantes citaos sinón al personal alministrativu, collaboradores los más lleales y meyores. La mio reconocencia a tantes amigues y amigos que m’ufrieron la so pernecesaria solidaridá nos díes marguxos y enguedeyaos vivíos. Tamién, col corazón nes manes, a quien col afeutu más llimpiu me fixo saber esplícitamente lo que ye l’amistá.

Uviéu a 10 de xineru del añu 2001

                                                                                                                        X.Ll. García Arias
                                                                                                                            Presidente


                      Pautu de funcionamientu inmediatu de l’Academia de la Llingua


  a) Fasta les nueves eleiciones sigue l’equipu de direición que fasta güei funcionó: Vicepresidente, Secretariu, Ayalguera, Vicesecretariu. El Vicepresidente pasa a facer les funciones representatives encamentaes polos estatutos al Presidente.

  b) El Vicepresidente comprométese a llamar a eleiciones pa tolos cargos de l’Academia en cuantes sía aconseyable pero enxamás más lloñe de seis meses de magar la fecha de güei.

  c) L’Academia sigue cola so actividá normal según les previsiones no que se refier a Alcuentros, Conceyu Internacional, Cursos, Concursos, Xuntes, etc. Tamién fasta les eleiciones siguen como responsables les persones que s’encargaben de les destremaes estayes o coleiciones. Lletres Asturianes, del que foi responsable X. Ll. Arias como presidente de l’Academia na totalidá de los sos númberos, saldrá darréu a la lluz col so númberu 76, yá iguáu, tamién baxo la so direición, y nél inxertaráse’l documentu de dimisión y los puntos fonderos d’esti pautu de funcionamientu de l’Academia. El númberu lliterariu, el 77, llevarálu alantre’l Secretariu de l’ALLA. Dende’l númberu 78 queda, estatutariamente, baxo la responsabilidá de la presidencia.

  d) El Plenu de l’Academia autoriza al presidente dimisionariu a facer una rueda de prensa nel llar social de l’Academia na mañana del 11 de xineru.

  El porqué de nun proponer que se faigan darréu les eleiciones obedez a la conveniencia d’abrir un tiempu de reflexón y tranquilidá como prenda del meyor encontu a les persones que sigan alantre cola direición de l’Academia. Nesti momentu l’Academia pue permitise esa llibertá darréu que s’alcuentra nun momentu afayadizu y perbonu delantre la sociedá.

Uviéu 10 de xineru del añu 2001

                                                                                            Academia de la Llingua Asturiana

 CompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
F. +34 985 226 816
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana