Lletres Asturianes

El tema de la infancia na poesía d’Asturies

Aurelio González Ovies

Resume

Pocos, bien pocos son los poetes qu’escapen del tema que vamos tratar nesti estudiu: la vuelta a la infancia, l’intentu de rescatar y reflexar, al traviés de la lliteratura, y más en concreto de la poesía, esi paraísu perdíu, l’Arcadia infantil, la señardá por esos
escenarios rellacionaos cola naturaleza, cola harmonía íntima col ambiente y cola inocencia; unos paraxes onde’l tiempu apenes esistía, nin el dolor nin la congoxa, protexíos siempres poles figures familiares principales, los güelos, los pas, los hermanos. Poques, bien poques son les pieces que nun s’alleguen a los oríxenes y nun recuerden aquella convivencia col mundu rural y too cuanto d’él remanez: eternidá, lluz, branu, suañu, llibertá, vexetación, desdexamientu.

Vamos facer, poro, una repasada polos clásicos llatinos y polos nomes más representativos de la nuesa lliteratura, la d’Asturies, recoyíos en Palabres clares. Un cuartu de sieglu de poesía asturiana (1980-2005), de José Luis García Martín, en Toma de tierra. Poetas en lengua asturiana. Antología (1975-2010), de José Luis Argüelles y tamién nos poetes y poemes rexistraos en Poesia asturiana’s Weblog (una esbilla de poesía asturiana d’anguaño), asina como nos cinco volúmenes de Lletres Lliterariu (2009-2013), col propósitu d’analizar les bien distintes y riques imáxenes coles que nos averen los poetes a esi entós y esi cuando nos que se sentíen habitantes felices d’esos territorios, protagonistes plenos d’un mundu qu’axigantamos a midida que crecemos, que más
presente tenemos cuanto más atrás lu dexamos. Un llugar común, yá dende los clásicos llatinos, que se convierte n’ocasiones nuna forma de denuncia pol abandonu de los pueblos y la destrucción de la vida tradicional y cenciella, frente a la frialdá de les ciudaes,
esto ye, que-yos val a los autores pa introducir otros tópicos como’l beatus ille, locus amoenus, la entrañable casa paterna, etc.

La infancia, una etapa que, cuasi na totalidá de los qu’escriben equival a un tiempu d’aventura y de maxa, d’infinitú de posibilidaes y suaños, a años de felicidá nun espaciu tan privilexáu como idealizáu.

Pallabres clave

Poesía, retornu, infancia, paraísu perdíu

Artículu en pdf Descargar en PDFCompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
www.academiadelallingua.com
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana