Lletres Asturianes

La presencia de Illas en la obra de tres autores asturianos

Juan Ramón Fuentes Jiménez

Resume

L’artículu que se presenta darréu tien como oxetivu ufiertar a los llectores un aspeutu del Conceyu d’Illas qu’abarca un exe cronolóxicu qu’algama la segunda metá del s. XIX y el primer terciu del s. XX. Anque l’averamientu a esti conceyu asturianu pudiere facese dende munches otres disciplines como la xeografía, la historia, l’arte, l’antropoloxía, nun ye menos verdá que presentar a Illas dende la lliteratura implica adientrase en conocer daqué d’esti llugar d’Asturies dende’l preséu que supón la creación lliteraria. Esti conceyu, anque nun sía d’un mou especialmente bultable o llargu n’obres, ta presente en creaciones lliteraries mui concretes d’escritores asturianos mui concretos tamién. Dende esti garapiellu de trabayos pue apreciase la xeografía, dalgunos aspeutos históricos del conceyu, vezos tradicionales y otros detalles qu’amuesen el mou de vida de los sos habitantes en dómines determinaes. Darréu d’ello, puede ducise que’l trabayu tien un calter antropolóxicu, social y llingüísticu por cuantes que la lliteratura participa d’estes estayes al ser un autor que vive nuna sociedá y s’espresa nun llinguaxe concretu’l que dexa testimoniu d’esi llugar, siendo pal casu d’Illas tres escritores asturianos con obra sobre’l conceyu. L’oxetivu que mos empobina ye dar conocencia d’esti territoriu y aumentar un daqué’l conxuntu de conocimientos sobro él dende la lliteratura, amosando’l calter más propiu d’esti conceyu asturianu que s’esbrexa güei por siguir calteniéndolu. Al empar, sollíniase tamién la relev ancia, dientro del panorama lliterariu d’Asturies, de los tres autores que contribuyeron a la conocencia d’Illas coles sos obres, y que son Armando Palacio Valdés, David Arias y Benigno García González «Marcos del Torniello».

Pallabres clave

Illas, lliteratura, Palacio Valdés, David Arias, Marcos del Torniello

Artículu en pdf Descargar en PDFCompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
www.academiadelallingua.com
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana