Lletres Asturianes

L'enseñu virtual de la llingua asturiana (1996-2019): averamientu etnográficu, estudiu evaluativu y propuestes de futuru

Carlos Suari Rodrigue

Resume

A mediaos de los años 1990, cola xeneralización d’internet, dalgunes comunidaes falantes de llingües minoritaries vieron apaecer nueves y bones opciones pa caltener y enanchar los sos usos. Remanando les ferramientes corrientes de la rede o tresnando otres específicamente didáctiques, l’alfabetización per medios telemáticos convirtióse nuna de les grandes oportunidaes que-yos apurría a estos idiomes la entrada na era dixital. Nel casu del asturianu, aparte de dalgunes propuestes parciales, el dominiu de la formación en llinia ta y tuvo protagonizáu por cuatro programes d’enseñu virtual (PEVA). Col oxetivu de facer un retratu de conxuntu del qu’estrayer propuestes pal futuru, esta investigación enfotóse n’analizar la constitución y los procesos de desenvolvimientu de los PEVA, los sos componentes, los sos resultaos educativos y los sos efectos na normalización social del idioma. De primeres, un percorríu pela bibliografía global y particular d’esti dominiu dibuxa un marcu teórico-conceptual que fala de grandes potenciales y desafíos metodolóxicos au asitiar el casu de la llingua asturiana, qu’inda nun xenerare investigación nenguna hasta güei. Darréu, cola esposición del diseñu metodolóxicu, amosaráse’l calter mestu de la investigación na que s’enconta esti testu, una busca d’información qu’amiesta ferramientes cualitatives y cuantitatives como la observación, la entrevista y el cuestionariu. Too siguío, en dos apartaos dixebraos pero consecutivos, asoléyase una esbilla de los resultaos collechaos: un averamientu etnográficu basáu nos datos empíricos y un estudiu evaluativu fundamentáu estadísticamente. Xuntando les dos llinies metodolóxiques de la investigación nuna síntesis final, conoceráse por qué y cómo se desenvolvió’l campu del enseñu virtual del asturianu nesti cuartu de sieglu postreru, los sos efectos positivos na normalización llingüística y los resultaos desiguales de los PEVA na so misión pedagóxica. Peracabando l’artículu, dándo-yos traza de propuestes, formúlense en positivo una riestra de conclusiones, les más sólides de la investigación, aguardando qu’esti tipu de programes xorrezan nel futuru sobre la reflexón de la esperiencia.

Pallabres clave

llingua minoritaria, alfabetización, normalización, pedagoxía, internet, etnografía

Artículu en pdf Descargar en PDFCompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
www.academiadelallingua.com
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana