Lletres Asturianes

Monólogu y tradición oral: orixe y carauterización d’un xéneru únicu

Carlos Alba "Cellero"

Resume

El monólogu asturianu ye una manifestación escénica y lliteraria esclusiva del nuesu ámbitu cultural y llingüísticu que nun recoyemos en nengún país del nuesu entornu cultural (España, Llatinoamérica y Arcu Atlánticu). Privativu de l’Asturies de fala asturiana –nun apaecen monologuistes na fastera ente los ríos Navia y Eo nin n’otres tierres del dominiu llingüísticu ástur–, el monólogu constitúi, entós, un xéneru escénicu y un soxéneru de la lliteratura dramática específicu y particular, siendo’l versu ún de los rasgos fundamentales que lu define. Nun disponemos, hasta’l momentu, d’estudios académicos, tesis o ensayos curiosos que pescuden sobre’l monólogu, anque dellos autores, más en particular de magar los años 70 del pasáu sieglu, sí que-y dedicaron pequeños trabayos y reflexones. En cualquier casu, ye claro que dende’l puntu de vista escénicu nun existe na realidá teatral otru xéneru superior nel que’l monólogu s’enriestre o del que seya soxéneru: inda que se tien representao nos descansos de les comedies de teatru costumista, el monólogu vien d’enantes, seguramente forma parte d’una tradición que continúa la de los mimos  romanos y los xuglares y nun paez mui probable que’l monólogu remaneza de les formes etnodramátiques del teatru ritual. Sí que paez enforma claro que perbaxo del monólogu hai un trabayu específicu sobre la tradición oral que desplica los rasgos que lu carautericen. Estremáu en cinco epígrafes, que van dende la consideración de la especificidá del monólogu como xéneru únicu y la so carauterización como arte escénicu, hastala necesidá de la so anovación, esti artículu fai por ufiertar una reflexón ensayística sobre esta manifestación escénica que llogró caltenese n’Asturies a lo llargo de los años y siempre con un gran éxitu de públicu.

Pallabres clave

Monólogu, tradición oral, monologuistes, versu, teatru

Artículu en pdf Descargar en PDFCompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
www.academiadelallingua.com
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana