Lletres Asturianes

‘Aquella casa llonxana’. Un tópicu al que s’acerca la mayoría los poetes

Aurelio González Ovies

Resume

La casa dexada atrás, la primixenia, dende los clásicos grecollatinos, ye unu de los símbolos más universales y recurrentes ente los poetes de toles dómines. La torna al llar abandonáu, a la casa paterna, tamién se convierte ente los autores asturianos nuna de les imáxenes que meyor representa l’añoranza pola felicidá y el paraísu perdíos. Y ye esa morada, símbolu en munches ocasiones de la figura materna, la que nos sirve d’abelugu énte la hostilidá y los reveses del mundu que nos aguarda y nos decepciona. Un locus amoenus, accesible tan solo al traviés de la evocación, que nos avera al tema de les ruines d’identidá y de memoria histórica y al de la naturaleza poderosa y voraz que los autores aprovechen como mou d’introspeición nel mundu personal. Retornar nun ye posible, pero como Odiseo, toos, tarde o aína, volvemos a esa casa primixenia, a esi llugar afayadizu nel que, anque naide nun nos espere, conocimos la felicidá y criámonos dichosos, seique más de lo que somos güei, sirviéndonos tamién como midida del pasu del tiempu y como espeyu onde comparar l’antes col agora, la magnitú del ayeri cola poquedá presente. Dempués d’aquellos años, de xuru idealizaos, toos vivimos nun destierru personal y regresar a la casa paterna pue ser, ensin más, volver a unu mesmu, pos la casa nun representa otra cosa que’l ser interior y toles sos estancies nun son sinón lo que somos nós per dientro. Voz avisadora o conciencia de muerte o d’esraizadura palpita ellí onde ñaz la sienda que lleva a la ciudá na que los poetes vense como desterraos y sienda qu’encamina, bien adulces pero definitivamente, al abandonu de caleyes, puertes, cuarterones y postigos de la infancia.

Pallabres clave

Tópicu, casa primixenia, retornu, ruines, poesía asturiana

Artículu en pdf Descargar en PDFCompartirCorreoFacebookTwitter
Lletres Asturianes
Academia de la Llingua Asturiana
C/ L’Águila 10
33003 Uviéu
T. +34 985 211 837
F. +34 985 226 816
ISSN (versión dixital): 2174-9612
ISSN (versión impresa): 0212-0534
Depósitu Llegal: U-826/82
© Academia de la Llingua Asturiana