L’escritor Xandru Martino Ruz y la periodista Pilar Rubiera Alonso, nuevos miembros de l’Academia de la Llingua Asturiana

L’Academia de la Llingua Asturiana (ALLA) decidió, na so sesión estraordinaria del xueves 15 d’abril, proponer como nuevos miembros de la institución, respeutivamente, al escritor D. Xandru Martino Ruz (académicu correspondiente) y a la periodista Dña. Pilar Rubiera Alonso (miembru h’honor).

Xandru Martino Ruz ye escritor en llingua asturiana y destaca poles sos aportaciones en cuantes a la narrativa y tien, amás, el perfil d’investigador, sobro too no que cinca a les adautaciones funcionales del léxicu del asturianu.

Pilar Rubiera ye periodista con una llarga trayeutoria na prensa escrita y vien destacando, nes décades caberes, polos sos trabayos en rellación cola información cultural y, especialmente, polo que tien que ver cola dinámica social arreyada a la llingua asturiana. Arriendes d’ello fai un llabor de collaboración cola ALLA, de gran importancia pa la so proyeición pública.

L’acoyida institucional a los nuevos académicos fairáse nel «Día de les Lletres Asturianes», 7 de mayu a les 12 h. nel Teatru Campoamor d’Uviéu, nun actu restrinxíu darréu de les condiciones de seguranza a les qu’obliga la situación derivada del COVID-19.

L’ALLA quier treslladar les sos más fondes felicitaciones, tanto a Xandru Martino como a Pilar Rubiera y enfótase en que’l so llabor siga siendo el meyor encontu pa la dignificación de la llingua asturiana.

Uviéu, 19 d’abril de 2021