L’Academia de la Llingua Asturiana, col más fondu pesar y sentimientu, llamenta tener que comunicar la muerte del miembru de númberu de la institución Xosé Bolado García

Nacíu n’Uviéu en 1946 y vecín de Xixón, Xosé Bolado llicencióse en Filosofía y Lletres (Filoloxía Románica) na Universidá d’Uviéu, especializándose llueu n’estudios lliterarios. Profesor d’Enseñances Medies, desendolcaría’l so llabor profesional n’institutos d’Asturies y de Madrid, a onde se treslladó nos últimos años de la so carrera docente.

Venceyáu yá dende finales de los 70 del pasáu sieglu XX al modernu procesu de reivindicación de la llingua asturiana, Xosé Bolado foi nomáu académicu de númberu de l’ALLA nel añu 1988, faciéndose cargu dientro de la institución de temes rellacionaos cola so especialización profesional. El primer resultáu d’esta xera cuayaría na edición de la revista de creación lliteraria moderna Lliteratura. Revista lliteraria asturiana, de la que foi direutor dende 1990 hasta 2017. Xunto con ello, Xosé Bolado tuvo tamién al cargu, a lo llargo de munches ediciones, de l’asignatura de «Lliteratura Asturiana» ufiertada nos destremaos cursos y niveles de formación de l’Academia. Collaboró igualmente cola revista Lletres Asturianes y con distintes ponencies y comunicaciones presentaes nes Xornaes Internacionales d’Estudiu.

Poeta n’asturianu y en castellanu, antólogu y críticu lliterariu, déxanos una llarga y granible obra que destaca pol rigor, la precisión del análisis y el fondu conocimientu de los temes que trataba y estudiaba. Ente ello, ha sorrayase en primer llugar l’Antoloxía poética del Resurdimientu (1989), una esbilla de la obra de diez poetes de les dos primeres xeneraciones del Resurdimientu, como a él-y prestaba más llamar, en cuantes que consideraba que tola tradición lliteraria asturiana anterior xustificaba dafechu’l falar d’esi resurdir. Tamién, la edición d’Escritores en Llingua Asturiana (1992); el fascículu «Lliteratura asturiana contemporánea» de la Historia de Asturias de La Nueva España; los capítulos «El Surdimientu. La poesía» y «El Surdimientu. El teatru» de la Historia de la Lliteratura Asturiana; los poemarios Nomade (1991, n’italianu); Conxura contra la decadencia y Na estación de los relevos (2002 y 2006, n’asturianu); Línea imperceptible al temor (1988, en castellanu)… Estudiosu fondu de la obra de Rosario d’Acuña, entamaría a publicar la producción d’esta autora dende 1985 (El Padre Juan), asoleyando en 2007 la edición d’Obras reunidas.
A esti llabor, curtiamente reseñáu equí, hai qu’amestar la presidencia del Atenéu Obreru de Xixón onde, amás de coordinar munches actividaes, conferencies, esposiciones, etc., Xosé Bolado fundaría la coleición poética «Deva».

Cola muerte de Xosé Bolado, l’Academia de la Llingua Asturiana y tolos que formamos parte d’ella perdemos a un compañeru col que siempre se podía cuntar, a un home comprometíu, cabal, atentu y cariñosu y, sobre manera, a un amigu lleal qu’enxamás escaeceremos. Sibi tibi terra levis.
Uviéu, 20 de mayu de 2021