La Universidá d’Uviéu y l’Academia de la Llingua Asturiana suspenden la UABRA na edición d’esti añu, prevista pa la primer quincena d’agostu

UABRA

La Universidá d’Uviéu y l’Academia de la Llingua Asturiana tán acabantes de decidir la suspensión de la Universidá Asturiana de Branu (UABRA) 2020, desendolcada col sofitu del Conceyu de Cangas del Narcea al entender que, anque entá podíen dase les condiciones alministratives y normatives afayadices pa la so organización, el compromisu dirixíu a garantizar la salú coleutiva del pueblu asturianu ye prioritariu.

La Universidá Asturiana de Branu (UABRA) ye una programación formativa de dos selmanes de duración, que diba llevase a efeutu en Cangas del Narcea y que se compón de 7 cursos, conferencies, conciertos y esposiciones. Esta concentración d’actividaes fai que na UABRA participen y convivan más de 150 persones, ente personal llaboral, profesoráu, alumnáu, conferenciantes y músicos.

Persabiendo que la UABRA ye una propuesta educativa de primer orde, con especial impautu na ufierta formativa añal n’asturianu y en temes y perspeutives d’Asturies, dambes instituciones llamenten fondamente la perda de la edición d’esti añu. Sicasí, igual Universidá qu’Academia, quixeron afitase xuntes nesti determín de collaborar activamente cola solución social definitiva de la crisis sanitaria abierta anguaño.

La Universidá d’Uviéu, l’Academia de la Llingua Asturiana y el Conceyu de Cangas del Narcea quieren asoleyar el so compromisu na continuidá de la UABRA y l’enfotu en celebrar una edición nueva nel branu de 2021.

Uviéu, 23 d’abril de 2020