Diccionariu de la Llingua Asturiana (DALLA)

  • Escriba nel campu la pallabra que quier buscar.

    Pallabra:


    malu, -a, -o: ax. Que nun tien les condiciones precises [pa daqué]. Ye mui malu xugando. 2 De poca calidá. Son unes máquines males. 3 Que perxudica l’estáu de [una persona], de [una situación]. Que llueva tanto ye malo pa les mazanes. 4 Que nun tien virtúes morales, que busca perxudicar [una persona]. Qué paisanu más malu, siempre busca griesca. 5 Que nun cumple bien [una función, un llabor]. Ye malu dando clas. 6 Difícil, que precisa munchu trabayu. Esa carretera ye mala d’echar. 7 Revolvín, bullindiegu [un neñu]. ¡Qué malu ye esti críu, nun para en tol día! 8 Dau a atacar [un animal]. Ten cuidáu col xatu que ye malu. 9 Que da una sensación poco prestosa pa los sentíos, pal ánimu. 10 D’agua, fríu [un día, el tiempu]. Llevamos una temporadina col tiempu mui malo. 11 De temperatura frío y de muncha agua [un clima, una estación]. Los iviernos son mui malos ellí. 12 Con enfermedá. Tuvi malu, con fiebre y vómitos. 13 Que tien maña pa llograr daqué, pa engañar [una persona]. 14 Que ye puta [una muyer]. || A mal acabar, de mala manera. Traxéronme a mal acabar. || A mala mano, nun sitiu mal amañosu, a desamano. || Andar en malos pasos, tar metíu n’asuntos poco llegales. || Con mal pie, con mala suerte. || Con malos güeyos, ensin apreciu, con mala intención. || Culu de mal asientu, fam. que nun ye quien a parar munchu tiempu nun sitiu. || Dar mala espina, producir mala impresión. || Dar mala vida, tratar mal. || De mal añu, flacu, ensin salú. || De mal conforme, difícil de conformar. || De mal contentu, difícil de contentar. || De mal día, de diario [la ropa]. || De mal xeitu, apartándose de la direición correuta. || De mala boca, ensin tolos dientes [el ganáu]. || De mala data, enfadáu, enfocicáu. 2 Pasáu de tiempu [un alimentu]. || De mala facha, meticón, dau a metese n’asuntos ayenos. || De mala fe, con maldá. || De mala gana, ensin querer, ensin tener gana [facer daqué]. || De mala manera, mal. || De mala secta, que nun tien virtúes morales, que busca perxudicar [una persona]. || De males, de mal humor. 2 Enfadaes [dos persones]. || Enemigu malu, diañu, demoniu. || Facer mal mercáu, comprar o vender mal. || Facer mal paquete, poder envolvese mal [daqué]. || Facer mala sangre, fam. enfadar, alteriar l’ánimu. || Mal afeutu, carga, estorbu. Dexáime, que nun quiero ser un mal afeutu. || Mal caréu, mala intención. || Mal rayu, *espresión cola que se maldiz. || Mal riscu, *espresión que s’emplega pa maldicir. || Mal sumiciu lu suma, *espresión que s’emplega pa maldicir, pa desear un mal a daquién. || Mala boca, costume de falar diciendo cagamentos, pallabres malsonantes. || Mala fe, mala intención. 2 Maldá. || Mala idea, mala intención. Tien mui mala idea dicime eso. || Mala guedeya, mal caráuter, tratu oriscu y foscu. || Mala morrina te lleve, *espresión cola que se maldiz a daquién, cola que se desea un mal a daquién. || Mala morrina te mate, *espresión cola que se maldiz a daquién, cola que se desea un mal a daquién. || Mala muyer, puta. || Mala sangre, fam. mal caráuter. || Mala tenyera cuesa a daquién, *espresión cola que se maldiz a daquién, cola que se desea un mal a daquién. || Mala torca cueya, *espresión cola que se maldiz, cola que se desea un mal a daquién. || Mala yerba, persona o xente de mal enclín, de males intenciones. || Males pulgues, fam. mal humor, enfadu. || Malos semblantes, cargazón de l’atmósfera. || Más malu que’l pecáu (coxu), fam. que nun tien virtúes morales, que busca perxudicar [una persona]. || Muyer de mala vida, puta. || Nun estallar mala castaña en boca, *espresión que se diz cuando se piensa que daqué bono nun va asocede-y a daquién. || Per mal camín, faciendo les coses afayadices [pa nun llograr un fin]. || Pescáu del mal nome, Brama raii, palombeta, pexe [de forma arredondiada y de color gris]. || Pexe d’agua mala, Cetorhinus maximus, pexe escualu [de pelleyu gordo que tien un fégadu pergrande del que se saca aceite]. || Pola de males, obligando, a la fuercia. || Poles males, obligando, a la fuercia. || Poner mala cara a [daquién] o a [daqué], nun amosar bones intenciones pa [daqué] o con [daquién]. || Sacar el diente de mal añu, fam. fartucase comiendo. || Sacar la tripa de mal añu, fam. fartucase comiendo. || Tener mala boca, ser repunante [pa comer]. 2 Falar mal d’otros davezu. || Tener mala cuenta [daqué], ser muncho, ser por demás. Lo que yo anduvi anueche mala cuenta tien.


    Copyright (C) 2015 Academia de la Llingua Asturiana

  • Escueya la busca que quier facer. Si hai más de 500 resultaos tien d'axustar la consulta.

    • Buscar pallabres que
    • Buscar definiciones qu'inxeran

    Copyright (C) 2015 Academia de la Llingua Asturiana