Diccionariu Etimolóxicu de la Llingua Asturiana

Como resultáu d’una llarga ellaboración qu’entamó cola recoyida de los materiales nos años ochenta del sieglu XX y qu’abarca tol Dominiu Llingüísticu Ástur, el material d’esti Diccionariu Etimolóxicu de la Llingua Asturiana (DELLA) preséntense acordies cola estructura a la que nos foi averando l’autor nos destremaos volúmenes de les Propuestes Etimolóxiques asoleyaos ente 1975 y 2014. D’esta miente, les entraes del DELLA encadármense del mou que vien darréu:

1) Lema: la forma principal y que se pue camentar como normativa magar qu’en dellos casos, por razones concretes del estudiu etimolóxicu, nun diga cola entrada principal del Diccionariu de la Llingua Asturiana (DALLA).

2) Variantes d’espresión: onde s’inxerten les variantes dialeutales del lema y ónde s’alluguen xeográficamente (referíes a conceyos de los que se tienen datos, magar que les fontes puen tamién ser dacuando lliteraries o documentales).

3) Información semántica, que tamién s’asitia xeográficamente.

4) Documentación histórica (en llatín o en romance ástur): onde s’ufierta documentación del usu del términu estudiáu, inxiriendo la documentación más antigua que se conoz y que, delles vegaes, ye anterior a lo que se documenta n’otros diccionarios etimolóxicos.

5) Propuesta etimolóxica, onde García Arias desendolca l’estudiu etimolóxicu de la pallabra en cuestión, afondando naquelles específicamente asturianes o que tienen falta d’un estudiu etimolóxicu fondu y non tanto naquelles pallabres panromániques y que yá taríen estudiaes n’otros diccionarios etimolóxicos.

Asina, pasu ente pasu, va iguándose esti proyeutu cimeru pa la filoloxía asturiana y románica que ye’l DELLA.

El Diccionariu Etimolóxicu de la Llingua Asturiana asoléyase en tomos:

Tomu I (A-B). Universidá d’Uviéu & Academia de la Llingua Asturiana, 2017.

Tomu II (C-D). Universidá d’Uviéu & Academia de la Llingua Asturiana, 2019.

Tomu III (E-F). Universidá d’Uviéu & Academia de la Llingua Asturiana, 2019.