Diccionariu de la Llingua Asturiana

Cuando l’Academia de la Llingua saca a la lluz el Diccionariu de la Llingua Asturiana (DALLA) en xunu del añu 2000, remátase’l llabor normativu entamáu coles Normes Ortográfiques, siguíu cola Gramática y acompangáu col inventariu toponímicu Nomes de conceyos, parroquies, pueblos y llugares del Principáu d’Asturies.

El DALLA entendiólu l’Academia como una erbía afayadiza pal llogru de la escritura d’un idioma que quier allugase nel so territoriu históricu y responder perdafechu a la complexa realidá y a les necesidaes espresives de los sos falantes y usuarios. Asina ye como foi concebíu, como un diccionariu normativu. Pero sabía l’Academia qu’esa normativa como taría bien axustada sedría, d’un llau, almitiendo con prudencia los cultismos o empréstamos que se xulgaren necesarios en viendo’l camín pel qu’empobinen toles llingües de la nuesa rodiada y dexando la puerta entornada a otros que nun s’inxirieron aguardando que sían los usuarios los que faigan ver o non la so necesidá futura. D’otra parte, un bon llector pescanciará darréu cómo s’acoyó cola más llarga amplitú la collaboración léxica de toles fasteres y estayes del dominiu llingüísticu.

Diccionariu de la Llingua Asturiana. Academia de la Llingua Asturiana, 2000.

Diccionariu de la Llingua Asuriana. Academia de la Llingua Asturiana, reimpresión 2007. [60,10€] [CONSULTAR]