Cursos d’Afondamientu Cultural y Llingüísticu

Los sos destinatarios, fundamentalmente, son los maestros o llicenciaos. Amás podrán inscribise nestos cursos les persones que tengan superáu’l Cursu Avanzáu. A tolos alumnos que superen el cursu daráse-yos el Diploma del Cursu d’Afondamientu.

El profesoráu de Llingua Asturiana n’Educación Primaria y Secundaria, asina como los titulaos por esta Academia y/o pola Universidá, tienen preferencia a la hora d’inscribise nos Cursos d’Afondamientu.

Los cursos (de 35 hores llectives) tienen calter selmanal y la UABRA plantega pal presente añu 2019 los que vienen darréu:

  1. Capacitación pa la Traducción al Asturianu (29 de xunetu al 3 d’agostu de 2019).
    Esti cursu, qu’empobina Marta Mori d’Arriba, tien como oxetivu presentar sintéticamente los presupuestos teóricos que rixen la traducción a una llingua minoritaria. El trabayu d’aplicación al casu asturianu ye dafechu práuticu y nél tendráse en cuenta, de mou especial, l’exerciciu de tornes de testos lliterarios y periodísticos y de testos llegales y científicos. Nel programa formativu tamién participen como profesores Cristina Valdés Rodríguez, Alberto Fernández Costales y Héctor García Gil.
    Nota.- Tendrán prioridá na matrícula d’esti cursu los enseñantes de los Cursos d’Especialista y Espertu en Filoloxía Asturiana.
  2. Educación y nueves teunoloxíes multimedia (29 de xunetu al 3 d’agostu de 2019).
    El cursu, dirixíu por David Melendi Palacio, tien como oxetivu cimeru que l’alumnáu conoza delles aplicaciones educatives de llibre distribución aplicables a la docencia y ver el so emplegu nun entornu académicu. Nel programa formativu participen como profesores Xulio Berros Reinoso, Fernando de la Fuente Trabanco y David Guardado Diez.
  3. El patrimoniu cultural asturianu. Un averamientu dende l’enguedeyu de lo tanxible y lo intanxible (del 5 al 9 d’agostu de 2019).
    Esti cursu, dirixíu porJesús Fernández Fernández, afonda nel patrimoniu cultural asturianu, la so recuperación y actualización, dende lo material y, sobre manera, lo inmaterial. Nel programa formativu participen como profesores Xosé Antón Fernández Martínez «Ambás», Llorián García Flórez, David González Álvarez, Ramsés Ilesies Fernández, Pablo López Gómez, Santiago Rodríguez Pérez y Carlos Suari Rodrigue.
  4. De la lletra al testu: taller d’escritura creativa (del 5 al 9 d’agostu de 2019).
    L’oxetivu d’esti cursu, empobináu por Aurelio González Ovies, tien como oxetivu cimeru averase a la creación lliteraria en llingua asturiana al traviés de dellos talleres. Nel programa formativu participen como profesores Carlos Alba García «Cellero», Marta Mori d’Arriba, Berta Piñán Suárez y Pablo Rodríguez Medina..

No que cinca a estos CURSOS D’AFONDAMIENTU CULTURAL Y LLINGÜÍSTICU, la UABRA, col envís de facilitar la participación, ufierta la posibilidá de qu’una mesma persona pueda pre-inscribise en dos cursos que, temporalmente, seyan compatibles.

Inscripción: 190 €

Inclúi matrícula, agospiu en réxime de pensión completa y materiales.