Cursos

L’Academia de la Llingua Asturiana, como institución llingüística del Principáu d’Asturies y acordies colos sos estatutos, vien desendolcando un llabor formativu y d’espardimientu del asturianu dende l’añu 1983.

Los programes de formación de l’Academia, tienen reconocencia oficial per parte de la Conseyería d’Educación y Ciencia del Principáu d’Asturies, darréu de l’acreditación del’ALLA como “Entidá Organizadora d’Actividaes de Formación Permanente del Profesoráu”, acordies colo afitao nel Decretu 62/2001 de 28 de xunu (BOPA de 13 de xunetu) y Resolución de 3 d’ochobre de 2001 (BOPA de 20 d’ochobre). Ello afita a tolos efeutos la reconocencia de los sos programes de formación dende’l puntu de vista alministrativu (curriculum, méritos, sexenios, etc.) pal Profesoráu d’Educación Primaria y Secundaria del Principáu d’Asturies.

Otra miente, l’Academia de la Llingua Asturiana acueye dientro del so programa formativu y por mandáu espresu de la Conseyería d’Educación y Ciencia del Principáu d’Asturies, la capacitación del profesoráu de Gallego-Asturianu.

De magar 2010, y pente medies del determín tomáu ente l’Academia de la Llingua Asturiana y la Universidá d’Uviéu (BOPA númberu 63, de 17/03/2011), el programa formativu de los Cursos de Branu de la Institución encadármase al rodiu de lo que se denoma Universidá Asturiana de Branu (UABRA). La filosofía qu’empobina a la UABRA ye l’estudiu de la realidá social y cultural d’Asturies, asina como’l so espardimientu popular, tomando al asturianu como preséu fundamental de comunicación. P’algamar esti oxetivu, la UABRA entama un programa d’actividaes nel que s’inxerten cursos, conferencies, exposiciones, actuaciones musicales, amueses teatrales, etc.

Finalmente, l’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu, fai dos convocatories añales de Pruebes de Conocencia de la Llingua Asturiana“.