Cultures algama’l númberu 24 con un monográficu sobre lleendes y ayalgues

CULTURES. Revista Asturiana de Cultura anueva’l formatu de los artículos,  inxer seición de reseñes y fai alcordanza del antropólogu José Luis García

Tres del monográficu de la música (qu’ocupare los númberos 22 y 23), CULTURES. Revista Asturiana de Cultura, editada pola Academia de la Llingua, vuelve a la cai con otru volume temáticu, nesta ocasión dedicáu al campu d’investigación de les lleendes y les ayalgues. Tres del entamu, iguáu pol direutor de la revista, Roberto González-Quevedo, nueve contribuciones más dan cuerpu a la parte principal de la edición, toes elles con un formatu anováu qu’agora inxerta resúmenes y pallabres clave n’inglés.

El primeru d’ellos, d’Alberto Álvarez Peña, fai un percorríu per dalgunes ayalgues asturianes al traviés del testimoniu oral recoyíu alredor de dalgunos ayalgueros y gacetes. Antonio Alonso de la Torre García y Francisca Iglesias Álvarez escriben de les tradiciones nesti ámbitu atropaes nos valles d’El Ríu de Trubia. Dende esa mesma dedicación a los espacios culturales concretos hai otres cuatro contribuciones. María Esther García López fala de los tesoros en La Montaña (Valdés) y n’Oneta (Villayón). Martin de Villar axunta delles ayalgues nel territoriu eonaviegu. Y, p’acabu nesti bloque de miraes de cercanía, Xosé Antón Fernández Martínez «Ambás» apurre un rellatu autoetnográficu asitiáu nel so escenariu familiar, en Salcéu, Grau.

D’otra banda, Yolanda Cerra Bada, fai delles observaciones sobre Peña Tu y les lleendes d’ayalgues venceyaes al monumentu. N’otru analís tresversal, Amalia Trancho Menéndez estudia les tresformaciones alredor de la tradición de los ciprianinos. Abriendo’l focu dende l’ámbitu asturianu, Nicolás Bartolomé Pérez fai una estensa contribución a la investigación de los manuscritos de tesoros escondíos nes tradiciones ibériques. P’acabu, Andrés Padilla Cerón fala de les lleendes d’ayalgues en Linares y Sierra Morena (Andalucía).

Nel apartáu de reseñes, Roberto González-Quevedo, anota la obra Antropología de Juan Oliver Sánchez. Faciendo reflexón de reuniones y xornaes d’estudiu celebraes n’Asturies nos últimos tiempos, Carlos Suari Rodrigue recueye l’actividá académica y cultural que se desenvolvió nel Congresu Internacional “Los Xuegos Tradicionales Güei”, Yolanda Cerra Bada del “Tardíu en Llacín” y Xuan Fernández Piloñeta del “Seminariu d’Estudios Asturianos” de la Fundación Belenos. Pieslla’l númberu l’alcordanza que Roberto González-Quevedo fai de José Luis García García, gran antropólogu asturianu fináu esti añu.