Los sos destinatarios, fundamentalmente, son los maestros o llicenciaos. A estos alumnos daráse-yos el el Diploma del Cursu d'Afondamientu .

Amás podrán inscribise nestos cursos les persones que tengan superáu'l Cursu Avanzáu. A éstes daráse-yos una Certificación d'Asistencia al Cursu d'Afondamientu.

Los cursos (de 35 hores llectives) tienen calter selmanal y la UABRA plantega pal presente añu 2014 los que vienen darréu:

1. Capacitación pa la Traducción al Asturianu (28 de xunetu al 2 d'agostu de 2014).
Esti cursu, qu'empobina Cristina Valdés Rodríguez, tien como oxetivu presentar sintéticamente los presupuestos teóricos que rixen la traducción a una llingua minoritaria. El trabayu d'aplicación al casu asturianu ye dafechu práuticu y nél tendráse en cuenta, de mou especial, l'exerciciu de tornes de testos lliterarios y periodísticos y de testos llegales y científicos.

Nota.-Tendrán prioridá na matrícula d'esti cursu los enseñantes de los Cursos d'Especialista y Espertu en Filoloxía Asturiana (yá titulaos o cursando la Especialidá).

2. Internet como recursu educativu y cultural(28 de xunetu al 2 d'agostu de 2014).
El cursu ufierta nueves posibilidaes pa que’l profesoráu de Llingua Asturiana pueda manexar nuevos servicios basaos en web 2.0 y deprender estratexes pa trabayar la competencia dixital, col envís de diseñar xeres y actividaes d’aula pal deprendizax oral y escritu de la Llingua Asturiana. El so coordinador ye David Melendi Palacio. Darréu de la importancia estratéxica de la presencia asturiana na rede, ye intención de la organización de los Cursos anovar, en toles convocatories, los conteníos d'esti programa formativu.

3. Ecoloxía y Mediu Ambiente n'Asturies (del 4 al 8 d'agostu de 2014).
L’oxetivu d’esti cursu ye averase a les carauterístiques básiques del Mediu Ambiente asturianu y la problemática del so caltenimientu. Amás, d'hores llectives, el cursu compleméntase con delles sesiones de trabayu de campu nes que se van conocer, ente otres coses, los ecosistemes asturianos más emblemáticos del surocciodente del país. El so direutor ye Carlos Lastra López.

4. Cantares, bailles ya instrumentos musicales asturianos (del 4 al 8 d'agostu de 2014).
El programa d'esti cursu, empobináu por José Antonio Gómez, afonda nel conocimientu de los cantares, bailles ya instrumentos populares asturianos dende la perspeutiva de la so presencia na escuela. D'esti mou, trátense aspeutos de la presencia de bailles, cantares ya instrumentos na cultura tradicional y les fiestes populares, siempre col enclín d'amosar el so valir educativo.