LLIBRERÍA LLINGÜÍSTICA: Onomástica de Trubia (Asturies)

Pablo Suárez García, Onomástica de Trubia (Asturies). Uviéu, Academia de la Llingua Asturiana & Universidá d’Uviéu, 2016. «Llibrería llingüística» nu 28.

Asoléyase nesti volume la tercer y última parte de la tesis del autor, presentada na Universidá d’Uviéu en 2007. Con esta cabera entrega, que sigue al estudiu llingüísticu La fala de Trubia (Asturies): estudiu sincrónicu y diacrónicu, asoleyáu nel númberu 27 d’esta mesma coleición, y al Vocabulariu de Trubia (Uviéu, ALLA, 2010), complétase la publicación de tolos materiales estudiaos na citada tesis. Tres una «Nota previa» y un «Entamu» de presentación de los conteníos del volume, la obra (640 páxines) organízase en dos grandes y percuriaos estudios onomásticos titulaos respeutivamente «Estudiu etimolóxicu de la toponimia de Trubia» y «Los sobrenomes en Trubia». El primeru ocupa les páxines 15 a 494 ya inclúi dos apartaos complementarios: «Documentacion medieval» ya «Índiz alfabéticu de principales etimos estudiaos». El segundu capitulu, igualmente complementáu con un «Llistáu alfabéticu de sobrenomes atropaos», ocupa les páxines 495 a la 626 ya inclúi tamién nomes propios ya hipocorísticos. Síguelos nes páxines 627 a la 638 una completa bibliografía mui especializada. El material toponímico que s’estudia nel primer capítulu yá s’asoleyara en 2003 y 2006 respeutivamente, nos númberos 99 y 113 de la Coleición «Toponimia» de l’ALLA, roblaos conxuntamente con Rosa Ros Zuazua.

MÁZCARA: Pa L’Habana

Xurde Fernández, Pa L’Habana. Uviéu, ALLA, 2016. «Mázcara» nu 18.

Premiu del Concursu de Teatru de l’Academia na so edición del añu 2013. Con tres actos y trece escenes y nun escenariu escuru y fúnebre estructuráu físicamente en dos niveles, un suétanu abaxo y un cuartu arriba, y siempre nun ambiente afogadizu y mísere, dos personaxes principales denomaos coles últimes lletres del alfabetu, vixilen a un tercer personaxe A, secuestráu por X. El pagu prometíu a Y y Z por esti trabayu ye un viaxe a L’Habana, el llugar suañáu onde podrán dexar atrás la vida qu’hasta ahora llevaron.

Lliteratura. Revista lliteraria asturiana

Lliteratura. Revista lliteraria asturiana. nu 3 (2016) Uviéu, ALLA.
Nueva entraga d’esta revista lliteraria editada pa celebrar el XXXVII Día de les Lletres Asturianes. Nesti númberu participen en «Narrativa» Ánxel Álvarez Llano, Diego Nieto, Elisabet Felgueroso, Xuan Porta y Josep Carles Laínez. En «Poesía» alcontramos testos de Berta Piñán, José Luis Rendueles, Raquel Fernández Menéndez, Ana Vega, Alfonso López Alfonso, Andrés Astur Treceño García y Luis Salas Riaño. La seición de «Ensayu» presenta testos de Vicente García Oliva, Xuan Xosé Sánchez Vicente y Víctor Suárez Piñero. La estaya «Varia» ufre un trabayu de Miguel Allende. Zarra’l númberu un «Crítica» de Marta Mori.

CULTURES. Revista Asturiana de Cultura

Cultures. Revista Asturiana de Cultura. nu 19 (2015) Uviéu, ALLA.
Nuevu númberu de la Revista de Cultures de l’Academia de la Llingua. Nella úfrense artículos d’estremáu calter de Roberto González-Quevedo («Paisax y cultura n’Asturies (II). Los oratorios como oxetivación d’idees y valores»), Manuel Francisco Matarín Guil («Las ermitas de ánimas de la comarca de los ríos Andarax y Nacimiento (Almería)»), Xuan Pedrayes Obaya («Catálogu de los oratorios en Conceyu Villaviciosa»), Ramsés Ilesies Fernández & Xosé Antón Fernández «Ambás» («Aguilandeiros de San Xuan en Villapañada (Grau)»), Carme Pedrayes Toyos («Vezos y creyencies en conceyu Villaviciosa»), Roberto González-Quevedo («Categorización de cultura ya naturaleza nos cuentos populares d’animales»). La revista sigue cola «Faza d’histories de vida» colos trabayos de Milio’l del Nido («Mio tíu Milio») y Pepe Monteserín («Pa vaques, le mio hermanu» y «L’octavu pasaxeru»). El númberu zárralu la estaya «Reseñes» de Juan Alfonso Fernández García («En Ca’l Gaiteiru o l’entamu de la reconstrucción historicista de la gaita n’Asturies»).

LLITERATURA. Revista Lliteraria Asturiana

Lliteratura. Revista lliteraria asturiana. nu 31 (2015) Uviéu, ALLA.
Nueva entraga d’esta revista lliteraria pa celebrar el XXXVI Día de les Lletres Asturianes na que participen en «Narrativa» Mª Esther García López, Miguel Rojo, Inaciu Galán y González, Vicente García Oliva y Xurde Álvarez. En «Poesía» alcontramos testos de Xosé Bolado, Xurde Fernández, Marta Mori, Ricardo Saavedra Fernández-Combarro, Miguel Rodríguez Monteavaro, Sofía Castañón y Naomi Suárez González. Esti númberu tamién recueye un especial dedicáu a María Teresa González a cargu de Xuan Xosé Sánchez Vicente.La seición de «Ensayu» presenta testos de Néstor Villazón y Ramón Cueva. La estaya «Traducción» ufre los trabayos de Inaciu Galán y González y Víctor Suárez Piñero. Zarra’l númberu un «Varia» de Roberto González Quevedo.