Estatutu y oficialidá. Llingua Asturiana y televisión

Estatutu y oficialidá

El Día de les Lletres Asturianes de 2005 l’Academia de la Llingua Asturiana daba anuncia pública de la so “Propuesta d’un alcuerdu social y políticu sobre la llingua y cultura d’Asturies”, nel qu’habríen participar, amás del Gobiernu del Principáu d’Asturies, les fuerces polítiques, los sindicatos y les organizaciones sociales y culturales. La “Propuesta”, encadarmada al rodiu de cinco exes, foi presentada darréu a los axentes sociales citaos, que, mayoritariamente, acoyéronla de mou favoratible. Llamentablemente la Federación Socialista (FSA-PSOE) nun taba naquel entós en disposición d’averase a un alcuerdu consensuáu como’l que se proponía, darréu que’l primer puntu yera’l d’asumir la declaración de co-oficialidá de la llingua asturiana (y del gallego-asturianu nel so territoriu) na próxima reforma del Estatutu. Por mor d’ello, l’ALLA nun siguió allanare col discutiniu del “Alcuerdu”. Ello nun quita un res pa que la institución siga trabayando, col mesmu enfotu de siempre, pol llogru d’esa reconocencia d’oficialidá y enconte’l labor que nel mesmu sen se fai dende otres instituciones, organizaciones o estayes sociales.

L’ALLA camienta que’l grau de converxencia social sobre esti tema ye de tantu altor qu’a lo cabero algamaremos, de xuru, un Estatutu que puea ser consensáu por toles fuerces polítiques y onde tolos asturianos y asturianes mos sintamos representaos y abellugaos. Y ello porque:

  1. La mayoría de la población asturiana, como afiten los estudios fechos al respeutive, ta a favor d’esa declaración de cooficialidá y ye consciente de que la nuesa ye una sociedá billingüe y asina quier que siga siendo; pero, al empar, quier un billingüismu equilibráu onde l’emplegu d’una o otra llingua nun tenga más llende que la que-y ponga la llibre eleición del ciudadanu.
  2. L’emplegu de la llingua propia, en tolos ámbitos (públicos y privaos), en tolos rexistros (orales y escritos) y a tolos niveles y efeutos ye un derechu fundamental del individuu. Y nes sociedaes democrátiques los gobiernos y les lleis tán obligaos a reconocer esi derechu y a dar seguranza del exerciciu llibre del mesmu.
  3. El Principáu d’Asturies ye una Comunidá Autónoma del Estáu Español. Y nesti contestu -el del Estáu Español- nun hai otra solución xurídica válida que la que se dio nes otres comunidaes billingües: la declaración de co-oficialidá nel Estatutu d’Autonomía, acordies col mandáu de la Constitución Española. Ello pue combinase con situaciones polítiques estremaes que nun tien por qué averase a les que se tán viviendo nesti momentu n’otres comunidaes del Estáu.
  4. Ye verdá que la realidá sociollingüística d’Asturies tien les sos propies carauterístiques y a ello tendrá qu’axustase la Llei de Normalización de la Llingua Asturiana, qu’ha desendolcar los aspeutos básicos de la puesta en práutica de la oficialidá.
  5. Cada vegada resulta más chocante y difícil de pescanciar que les mesmes fuerces polítiques que n’Asturies nieguen esi derechu fundamental, defendan nel Congresu de los Diputaos en Madrid proposiciones non de llei instando al Gobiernu a “afalar, en collaboración coles Comunidaes Autónomes, iniciatives empobinaes a garantizar el respetu y proteición de les llingües españoles, como elementu esencial del nuesu patrimoniu común; a curiar que se dea seguranza a los ciudadanos del derechu y la llibertá d’escoyer y emplegar cualesquier de les dos llingües de la comunidá; a potenciar y afitar un diálogu granible ente toes elles, sobre manera nel tarrén de la cultura y la educación”.
  6. Y finalmente, porque la propuesta de l’ALLA ye realista y moderada dafechu. Nella pídese a los partíos políticos con representación parllamentaria que seyan ellos los qu’escueyan el modelu de redaición del artículu que recueya la oficialidá del idioma que más s’axuste a les condiciones sociolóxiques d’Asturies; que seyan ellos los que digan hasta ónde quieren llegar coles midíes normalizadores, a qué ritmu y con qué fases; y arriendes d’ello, que pongan techu a la dotación presupuestaria pa facer efeutiva la normalización. Y que too ello lo faigan velando siempre pa que se llogre l’aceutación social y política de les midíes normalizadores.

Llingua Asturiana y Televisión

El 12 de payares de 2003 l’Academia de la Llingua Asturiana comparecía na Xunta Xeneral del Principáu d’Asturies p’amosar la so posición en rellación cola presencia qu’habría tener la Llingua Asturiana nel futuru Ente Públicu de Comunicación del Principáu d’Asturies. Pasaos más de dos años d’aquella comparecencia ensin que se tomare determín políticu sobre esti asuntu magar que yá se ficieron les pruebes pa la seleición de los profesionales y que, al empar, yá se tán emitiendo dalgunos programes, l’ALLA xulga afayadizo, nesti momentu, afitar otra vuelta’l so posicionamientu en rellación con esti asuntu, posicionamientu que tresmitió reiteradamente a los responsables del Ente Públicu de Comunicación y del so Conseyu d’Alministración nes xuntes calteníes al respeutive netos meses d’atrás y que se resume no que vien darréu:

  1. L’Academia de la Llingua Asturiana camienta que la TV Asturiana ha tar diseñada de mou que contribuya a vertebrar territorial, social y culturalmente Asturies y que valga d’instrumentu eficaz pa la recuperación, espardimientu, dignificación y normalización social de la llingua asturiana.
  2. El tratamientu de les llingües asturiana y castellana na TV habrá ser equiparable a tolos efeutos. Ello lleva apareyao necesariamente lo siguiente:
    1. Que l’espaciu dedicáu a la emisión en llingua asturiana seya un 50% del total de la programación.
    2. Que nun se dea nengún tipu de discriminación nel repartu de les bandes horaries d’audiencia.
    3. Que nun se dea nengún tratu desigual na axudicación de los diferentes tipos de programes. Esto ye, qu’en llingua asturiana se faga la mesma mena de programes (informativos, de debate, culturales, etc.) y na mesma proporción qu’en llingua castellana.
  3. La proporción d’emplegu de la llingua asturiana habrá aumentar hasta facese mayoritaria nos otros dos medios del Ente Públicu de Comunicación: radio y prensa dixital. Ello derívase, per un llau, del fechu de la necesidá (y facilidá) d’averar l’asturianu a les nueves teunoloxíes (fundamentalmente, internet) y, per otru, a la favoratible acoyida y el refrendu social que vienen teniendo ente la población les esperiencies d’emplegu radiofónicu de la llingua asturiana (Cadena Ser, Cope, Onda Cero, Radio Sele, etc.).

Prueba de conocencia de la llingua asturiana (xineru 2006)

CONVOCATORIA DE XINERU*

L’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu, fadrá dos convocatories añales onde van poder evaluase diches conocencies. Nesi sen, da anuncia de les sos iniciatives pal conocimientu xeneral:

  1. Nos meses de xineru y mayu celébrense les pruebes, abiertes a toles persones interesaes.
  2. Unos quince díes enantes de les pruebes va abrise un plazu de matrícula.
  3. A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución.
  4. Les persones que nun superen les pruebes del nivel 1 podrán presentase a nueves convocatories toles vegaes que-yos pruya.
  5. Pal bon resultáu d’estes pruebes habrá tenese un dominiu básicu de les estayes que vienen darréu:
    1. ESTAYA LLINGÜÍSTICA
      1. Teoría gramatical: conocencia y dominiu del funcionamientu gramatical del asturianu y de la normativa académica.
      2. Práutica escrita: emplegu amañosu de la llingua, puestu en práutica gracies a exercicios gramaticales y de composición escrita.
      3. Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador.
    2. ESTAYA DE LLINGUA Y SOCIEDÁ
      Conocencia del allugamientu de la llingua dientro de la sociedá asturiana asina como del procesu de normalización en que ta inxerta.
  6. La prueba va tener dos partes, una escrita (dictáu, torna, exercicios gramaticales, redaición) y otra falada (conversación).

Nota. Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2005, 6ª ed.; Gramática de la Llingua Asturiana, ALLA, Uviéu, 2001, 3ª ed.).

Asina mesmo, aconséyase la llectura de testos fechos acordies cola normativa, como los asoleyaos por esta Academia.

* En resultes d’esto, el 28 de xineru de 2006 va facese la prueba semestral. El plazu de matrícula ye del 16 al 26 de Xineru.

Resultáu de los Concursos de l’Academia de la Llingua Asturiana 2005

Actes de los Concursos d’Investigación

Aconceyáu’l Xuráu de los Concursos de Recoyida de Material Toponímico, Recoyida oral de léxicu asturianu y d’Investigación Llingüística que convoca l’Academia de la Llingua Asturiana correspondientes al añu 2005, formáu por Ana María Cano González como presidenta, José Luis García Arias como vocal y Corsino García Gutiérrez faciendo de secretariu, apáutase nos siguientes alcuerdos:

Na estaya de Recoyida de material topónimico:

  1. Premiar con 600 euros el trabayu tituláu Toponimia de la parroquia de Tuiza, del que ye autora Noemí González García.
  2. Dar un accésit de 300 euros al trabayu tituláu Toponimia de Llangréu. Parroquies de Tiuya y La Felguera, del que ye autor Jorge Alberto García Fernández.
  3. Dar un accésit de 150 euros al trabayu tituláu Toponimia de la Montaña de Ríu Negru. Conceyu de Valdés, del que ye autora Esther García López.
  4. Dar un accésit de 150 euros al trabayu tituláu Toponimia de la parroquia de Sobrefoz (Ponga), del que ye autor Xe M. Sánchez.

Na estaya de Recoyida oral de léxicu asturianu:

  1. Dexar ermu’l concursu.

Na estaya d’Investigación Llingüística:

  1. Dexar ermu’l concursu.

Aconceyáu’l Xuráu del Concursu d’investigación sobre lliteratura asturiana que convoca l’Academia de la Llingua Asturiana correspondiente al añu 2005, formáu por Miguel Ramos Corrada como presidente, Antonio Fernández Insuela como vocal, faciendo de secretariu Alfonso Martín Caso, apáutase na siguiente resolución:

  1. Premiar con un accésit de 150 euros el trabayu tituláu Los porfolios, presentáu por Pablo Rodríguez Medina.

Acta del Concursu de Llectures pa Rapazos

Aconceyáu’l Xuráu del Concursu de Llectures pa Rapazos que convoca l’Academia de la Llingua Asturiana correspondiente al añu 2005, formáu por Urbano Rodríguez Vázquez como presidente, Vicente García Oliva como vocal, faciendo de secretariu Pablo Xuan Manzano Rodríguez, apáutase na siguiente resolución:

  1. Dar el premiu de 600 euros, ex aequo, a les obres titulaes Los inventos de mio padre, de la que ye autor Enriue Carballeira, y Tapín de Picupáu, de la ue ye autor Pablo Rodríguez Medina.

Acta del Concursu de Creación Lliteraria. Premiu “Llorienzu Novo Mier”

Aconceyáu’l Xuráu del Concursu de Creación Lliteraria. Premiu “Llorienzu Novo Mier” que convoca l’Academia de la Llingua Asturiana correspondiente al añu 2005, formáu por Miguel Ramos Corrada como presidente, Lourdes Álvarez García como vocal y faciendo de secretariu José Ramón Iglesias Cueva, apáutase na siguiente resolución:

  1. Dexar ermu’l concursu.

Acta del Concursu de Recoyida de Material Lliterario Oral

Aconceyáu’l Xuráu del Concursu de Recoyida de material lliterario oral que convoca l’Academia de la Llingua Asturiana correspondiente al añu 2005, formáu por Roberto González-Quevedo González como presidente, Antonio Fernández Insuela como vocal, faciendo de secretariu Alfonso Martín Caso, apáutase na siguiente resolución:

  1. Premiar con 600 euros el trabayu tituláu Dichos, refranes, cuentos ya otres narraciones de Villamexín (Proaza), del que ye autor Antonio Alonso de la Torre.

Acta del Concursu de Teatru

Aconceyáu’l Xuráu del Concursu de Teatru que convoca l’Academia de la Llingua Asturiana correspondiente al añu 2005, formáu por Miguel Ramos Corrada como presidente, Mª Paz Fonticiella Gutiérrez como vocal, faciendo de secretariu Adolfo Camilo Díaz, apáutase na siguiente resolución:

  1. Premiar con 600 euros la obra titulada Cantu de gaviotes, del que ye autor Pablo Rodríguez Medina.

Acta del Concursu de Recoyida de Material Lliterario Escrito. Premiu “Federico G.-Fierro Botas”

Aconceyáu’l Xuráu del Concursu de Recoyida de Material Lliterario Escrito. Premiu Federico G.-Fierro Botas que convoca l’Academia de la Llingua Asturiana correspondiente al añu 2005, formáu por Ana María Cano González como presidenta, José Luis García Arias como vocal y Corsino García Gutiérrez faciendo de secretariu, apáutase nel siguiente alcuerdu:

  1. Premiar con un accésit de 300 euros el trabayu tituláu “Charlas”: testos contra’l socialenchufismu (El Noroeste, 1932-1933), del que ye autor Rafael Rodríguez Valdés.
  2. Dar un accésit de 150 euros al trabayu tituláu Testos n’asturianu na revista Asturias de L’Habana. Facsímil de los númberos 1-50 (9 d’agostu de 1914-11 de xunetu de 1915), del que ye autor Ramiro González Delgado.
  3. Dar un accésit de 150 euros al trabayu tituláu Un cartafueyu non recoyíu d’Aladino Fuente Vega, del que ye autor José Luis Campal Fernández.

Acta del Concursu de Curtios Cinematográficos

Aconceyáu’l Xuráu del Concursu de Curtios Cinematográficos que convoca l’Academia de la Llingua Asturiana correspondiente al añu 2005, formáu por Roberto González-Quevedo González como presidente, Xosé Bolado García como vocal, faciendo de secretariu Xosé Antón González Riaño, apáutase na siguiente resolución:

  1. Premiar con 1.200 euros el trabayu tituláu Marcha d’echase, del que ye direutor Joaquín F. Collado.

Uviéu, 11 de mayu de 2005

 

Concursos de l’Academia 2006

CONCURSOS D’INVESTIGACIÓN

L’Academia de la Llingua Asturiana, naguando pol llogru d’una llingua dignificada y persabiendo que la investigación ye ún de los meyores encontos de toa reivindicación, fai convocatoria de cuatro premios pa obres en llingua asturiana según s’afita nestes bases:

  1. Convócase un premiu de 600 € pa un trabayu de recoyida de material toponímico oral, ensin asoleyar, qu’abarque la totalidá d’una parroquia, grupu de parroquies o Conceyu, siguiendo’l modelu afitáu na coleición «Toponimia» asoleyada por esta Academia.
  2. Convócase un premiu de 600 € pa un trabayu de recoyida oral de léxicu asturianu ensin asoleyar.
  3. Convócase un premiu de 600 € pa un trabayu d’investigación llingüística ensin asoleyar que tenga aspeutos llingüísticos o sociollingüísticos d’Asturies como oxetu d’estudiu, dende una perspeutiva sincrónica o diacrónica. El trabayu pue cincar aspeutos xenerales o específicos.
  4. Convócase un premiu de 600 € pa un trabayu d’investigación sobre lliteratura asturiana (oral o escrita) que seya orixinal ensin asoleyar, que nun pase de 100 fueyes tamañu foliu.
  5. A xuiciu del xuráu podrán dase hasta 3 accésits, ún de 300 € y dos de 150 €, en caúna de les modalidaes citaes. Los premios podrán quedar ermos.
  6. Podrán presentase toles persones a les que-yos pruya pero non los miembros de númberu de l’Academia de la Llingua Asturiana.
  7. Nun podrán concursar a estos premios les tesis doctorales.
  8. Los trabayos presentaránse por triplicao na Academia de la Llingua Asturiana (C/ Marqués de Santa Cruz 6-2u – Uviéu) o unviaránse per corréu certificáu (Apartáu 574 – 33080 Uviéu) enantes del día 15 de xineru de 2006. Nun se tornará nengún trabayu al so autor.
  9. El xuráu o xuraos formaránlu tres persones escoyíes pola Academia de la Llingua Asturiana.
  10. L’Academia ye dueña de los trabayos premiaos asina como de los beneficios que puedan siguise darréu. Si pasaos dos años nun viere la lluz dalgún de los trabayos premiaos el so autor pue disponer llibremente pal so asoleyamientu.
  11. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  12. El xuráu entiende les llendes d’esta convocatoria.
  13. Participar na convocatoria lleva inxerío aceutar perdafechu estes bases.

LLECTURES PA RAPAZOS

Con oxetu de llograr una bona lliteratura pa rapazos y rapacinos y al mesmu tiempu pa dir algamando’l material pedagóxico afayadizo, l’Academia de la Llingua Asturiana llama a dos concursos:

  • De llectures (cuentos, rellatos, poesía, teatru, métodos de deprendimientu de la llingua, etc.) pa rapacinos d’Enseñanza Primaria.
  • De llectures (cuentos, rellatos, poesía, teatru, métodos de deprendimientu de la llingua, etc.) pa rapazos d’Enseñanza Secundaria y de Bachilleratu.

Los finxos d’estos concursos son:

  1. Puen participar toles persones interesaes col númberu d’obres que–yos pete.
  2. La temática ye llibre y sedrá valoratible’l tipu d’illustración que s’axunte al testu. El premiu pue quedar ermu.
  3. Premiaráse’l trabayu o trabayos ganadores cola so imprentación y 600 €. Daránse 25 exemplares al so autor. A xuiciu del xuráu’l premiu podrá ser repartíu.
  4. Nun s’almitirán les traducciones.
  5. Los trabayos presentaránse por triplicao (orixinal y dos copies) na Academia de la Llingua Asturiana (C/ Marqués de Santa Cruz 6–2u – Uviéu) o unviaránse per corréu certificáu (Apartáu 574 – 33080 Uviéu) enantes del día 15 de xineru de 2006 nun sobre ensin remite. Dientro’l sobre habrá dir otru, zarráu, coles señes del que concursa.
  6. Los trabayos premiaos son propiedá de l’Academia asina como los beneficios que puedan siguise darréu. Si pasaos dos años nun viere la lluz dalgún de los trabayos premiaos el so autor podrá disponer llibremente pal so asoleyamientu.
  7. Les obres non premiaes nun se tornarán a los autores pero estos podrán, pela so parte, faer usu de les copies non presentaes.
  8. Puen participar tolos miembros d’esta Academia pero non los de númberu.
  9. El xuráu o xuraos formaránlu tres persones escoyíes pola Academia de la Llingua Asturiana.
  10. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  11. El xuráu entiende les llendes d’esta convocatoria.
  12. Participar na convocatoria lleva inxerío aceutar perdafechu estes bases.

CREACIÓN LLITERARIA PREMIU “Llorienzu Novo Mier”

L’Academia de la Llingua Asturiana llama a tolos escritores y persones enfotaes a un concursu de creación lliteraria en prosa dientro d’estos finxos:

  1. Puen participar toles persones interesaes col númberu d’obres que–yos pete.
  2. Premiaráse aquella obra ensin asoleyar qu’a xuiciu del xuráu presente más valir lliterariu. El premiu pue quedar ermu.
  3. La temática ye llibre. La llargura’l rellatu ha tener, polo menos, 50 fueyes, estremaes les llinies a dos espacios.
  4. L’Academia comprométese a asoleyar la obra premiada. Les obres non premiaes nun se tornarán a los sos autores pero estos podrán, pela so parte, faer usu de les copies non presentaes.
  5. L’Academia ye dueña de los trabayos premiaos asina como de los beneficios que puedan siguise darréu. Si pasaos dos años nun viere la lluz dalgún de los trabayos premiaos el so autor pue disponer llibremente pal so asoleyamientu.
  6. Premiaráse’l trabayu ganador cola so imprentación y con 600 €. Daránse 25 exemplares al so autor.
  7. Los trabayos presentaránse por triplicao na Academia de la Llingua Asturiana (C/ Marqués de Santa Cruz 6-2u – Uviéu) o unviaránse per corréu certificáu (Apartáu 574 – 33080 Uviéu) enantes del día 15 de xineru de 2006 nun sobre ensin remite. Dientro’l sobre habrá dir otru, zarráu, coles señes del que concursa.
  8. Puen participar tolos miembros d’esta Academia pero non los de númberu.
  9. El xuráu o xuraos formaránlu tres persones escoyíes pola Academia de la Llingua Asturiana.
  10. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  11. El xuráu entiende les llendes d’esta convocatoria.
  12. Participar na convocatoria lleva inxerío aceutar perdafechu estes bases.

CONCURSU DE RECOYIDA DE MATERIAL LLITERARIO ORAL

L’Academia de la Llingua Asturiana llama a tolos escritores, investigadores y persones enfotaes a un concursu de recoyida de material lliterario oral asturiano dientro d’estos finxos:

  1. Puen participar toles persones interesaes col númberu de trabayos que–yos pete.
  2. Premiaráse aquel trabayu ensin asoleyar qu’a xuiciu del xuráu presente más valir. Tendráse en cuenta la calidá de los materiales presentaos y les referencies que s’aporten.
  3. L’Academia comprométese a asoleyar el trabayu o trabayos premiaos. Los trabayos non premiaos nun se tornarán a los sos autores pero estos podrán, pela so parte, faer usu de les copies non presentaes.
  4. L’Academia ye dueña de los trabayos premiaos asina como de los beneficios que puedan siguise darréu. Si pasaos dos años nun viere la lluz dalgún de los trabayos premiaos el so autor pue disponer llibremente pal so asoleyamientu.
  5. Premiaráse’l trabayu ganador cola so imprentación y con 300 €. Daránse 25 exemplares al so autor.
  6. A xuiciu del xuráu podrán dase hasta 3 accésits , ún de 600 € y dos de 150 €. Los premios podrán quedar ermos.
  7. Los trabayos presentaránse por triplicao na Academia de la Llingua Asturiana (C/ Marqués de Santa Cruz 6-2u – Uviéu) o unviaránse per corréu certificáu (Apartáu 574 – 33080 Uviéu) enantes del día 15 de xineru de 2006 nun sobre ensin remite. Dientro’l sobre habrá dir otru, zarráu, coles señes del que concursa.
  8. Puen participar tolos miembros d’esta Academia pero non los de númberu.
  9. El xuráu o xuraos formaránlu tres persones escoyíes pola Academia de la Llingua Asturiana.
  10. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  11. El xuráu entiende les llendes d’esta convocatoria.
  12. Participar na convocatoria lleva inxerío aceutar perdafechu estes bases.

CONCURSU DE TEATRU

L’Academia de la Llingua Asturiana llama a tolos escritores y persones enfotaes a un concursu de teatru n’asturianu dientro d’estos finxos:

  1. Puen participar toles persones interesaes col númberu d’obres que–yos pete.
  2. Premiaráse aquella obra ensin asoleyar qu’a xuiciu del xuráu presente más valir lliterariu. El premiu pue quedar ermu.
  3. La temática ye llibre.
  4. L’Academia comprométese a asoleyar la obra premiada. Les obres non premiaes nun se tornarán a los sos autores pero estos podrán, pela so parte, faer usu de les copies non presentaes.
  5. L’Academia ye dueña del trabayu premiáu asina como de los beneficios que puedan siguise darréu. Si pasaos dos años nun viere la lluz la obra premiada, el so autor pue disponer llibremente pal so asoleyamientu.
  6. Premiaráse’l trabayu ganador cola so imprentación y con 600 €. Daránse 25 exemplares al so autor.
  7. Los trabayos presentaránse por triplicao na Academia de la Llingua Asturiana (C/ Marqués de Santa Cruz 6-2u – Uviéu) o unviaránse per corréu certificáu (Apartáu 574 – 33080 Uviéu) enan – tes del día 15 de xineru de 2006 nun sobre ensin remite. Dientro’l sobre habrá dir otru, zarráu, coles señes del que concursa.
  8. Puen participar tolos miembros d’esta Academia pero non los de númberu.
  9. El xuráu o xuraos formaránlu tres persones escoyíes pola Academia de la Llingua Asturiana.
  10. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  11. El xuráu entiende les llendes d’esta convocatoria.
  12. Participar na convocatoria lleva inxerío aceutar perdafechu estes bases.

CONCURSU DE RECOYIDA DE MATERIAL LLITERARIO ESCRITO
Premiu “Federico G.-Fierro Botas”

L’Academia de la Llingua Asturiana llama a tolos escritores, investigadores y persones enfotaes a un concursu de recoyida de material lliterario escrito dientro d’estos finxos:

  1. Puen participar toles persones interesaes col númberu de trabayos queyos pete.
  2. La recompilación habrá ser, necesariamente, de testos asoleyaos o ensin asoleyar escritos enantes de 1970.
  3. Premiaráse aquel trabayu ensin asoleyar qu’a xuiciu del xuráu presente más valir. Tendráse en cuenta la calidá de los materiales presentaos, les referencies que s’aporten y la organización de los datos.
  4. L’Academia comprométese a asoleyar el trabayu o trabayos premiaos. Los trabayos non premiaos nun se tornarán a los sos autores pero estos podrán, pela so parte, faer usu de les copies non presentaes.
  5. L’Academia comprométese a asoleyar el trabayu o trabayos premiaos nes coleiciones «Llibrería Facsimilar» o «Cartafueyos de Lliteratura Escaecida» siempre y cuando nun se planteguen problemes de drechos d’autor. Los trabayos non premiaos nun se tornarán a los sos autores pero éstos podrán pela so parte, faer usu de les copies non presentaes.
  6. L’Academia ye dueña de los trabayos premiaos asina como de los beneficios que puedan siguise darréu. Si pasaos dos años nun viere la lluz dalgún de los trabayos premiaos el so autor pue disponer llibremente pal so asoleyamientu.
  7. Premiaráse’l trabayu ganador cola so imprentación y con 600 €. Daránse 25 exemplares al so autor.
  8. A xuiciu del xuráu podrán dase hasta 3 accésits , ún de 300 € y dos de 150 €. Los premios podrán quedar ermos.
  9. Los trabayos presentaránse por triplicao na Academia de la Llingua Asturiana (C/ Marqués de Santa Cruz 6-2u – Uviéu) o unviaránse per corréu certificáu (Apartáu 574 – 33080 Uviéu) enantes del día 15 de xineru de 2006 nun sobre ensin remite. Dientro’l sobre habrá dir otru, zarráu, coles señes del que concursa.
  10. Puen participar tolos miembros d’esta Academia pero non los de númberu.
  11. El xuráu o xuraos formaránlu tres persones escoyíes pola Academia de la Llingua Asturiana.
  12. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  13. El xuráu entiende les llendes d’esta convocatoria.
  14. Participar na convocatoria lleva inxerío aceutar perdafechu estes bases.

CONCURSU DE CURTIOS CINEMATOGRÁFICOS

L’Academia de la Llingua Asturiana, naguando pol llogru d’una llingua normalizada na sociedá, llama a tolos realizadores y persones enfotaes a un concursu de curtios cinematográficos dientro d’estos finxos:

  1. Puen participar toles persones interesaes col númberu d’obres que-yos pete.
  2. Premiaráse aquella obra orixinal qu’a xuiciu del xuráu tenga más valir llingüísticu, teniendo siempre en cuenta la calidá artística de los trabayos presentaos.
  3. Puen presentase a esti Concursu toles obres feches dientro del añu 2006.
  4. La temática ye llibre.
  5. Premiaráse’l trabayu ganador con 1.200 €. El premiu pue quedar ermu.
  6. Los trabayos presentaránse en formatu DVD y por triplicao na Academia de la Llingua Asturiana (C/Marqués de Santa Cruz 6-2u – Uviéu) o unviaránse per corréu certificáu (Apartáu 574 – 33080 Uviéu) enantes del día 15 de xineru de 2006.
  7. El xuráu o xuraos formaránlu un máximu de cinco persones escoyíes pola Academia de la Llingua Asturiana.
  8. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  9. El xuráu entiende les llendes d’esta convocatoria.
  10. Participar nesta convocatoria lleva inxerío aceutar perdafechu estes bases.

XXVI Día de les Lletres Asturianes. Teatru Campoamor d’Uviéu. Vienres 6 de mayu, 20 h.

Novedaes pal Día de les Lletres Asturianes

L’Academia de la Llingua Asturiana da anuncia de qu’esti añu l’actu oficial del Día de les lletres Asturianes fairáse’l día 6 de mayu, vienres, a les 20 hores nel Teatru Campoamor d’Uviéu.

Na solemne sesión académica tomarán posesión como nuevos miembros de l’Academia D. Xosé Ramón Iglesias Cueva (académicu de númberu) y Dña. Marta Mori d’Arriba (académica correspondiente).

Arriendes del discursu institucional de la Presidenta de l’Academia de la Llingua Asturiana, habrá una actuación musical na que participarán’l gaiteru José Manuel Tejedor y el grupu folk Lliberdón.

L’Academia de la Llingua Asturiana, amás de lo anterior y como novedá más bultable, quier facer esti añu un homenaxe al traxe asturianu del país y encamienta, darréu d’ello, a los asistentes que, na midida de les sos posibilidaes, lleven traxe asturianu como simbolización del so compromisu cola cultura d’Asturies.

Llueu del actu académicu, habrá una espicha, abierta a la participación de tola xente, nel restaurante La Gruta, con bailles y música asturiana.

L’Academia de la Llingua Asturiana aguarda cuntar cola to asistencia a estos actos de cellebración del XXVI Día de les Lletres Asturianes.